មីស៊ីលរបស់អ៊ីស្រាអែល បានបើកការវាយប្រហារទៅលើគោលដៅជាច្រើនស្ថិតនៅក្នុងទឹកដីអ៊ីរ៉ង់ កាលពីព្រឹកព្រលឹមថ្ងៃសុក្រ ទី១៩ ខែមេសា នេះ បន្ទាប់ពីអ៊ីស្រាអែល ព្រមានថានឹងសងសឹកចំពោះការវាយប្រហារដោយមីស៊ីល និងដ្រូនរបស់អ៊ីរ៉ង់ កាលពីសប្ដាហ៍មុន ដែលបានបាញ់មកលើអ៊ីស្រាអែល។
ទីភ្នាក់ងារសារព័ត៌មានអ៊ីរ៉ង់ជាច្រើនក៏បានឱ្យដឹងថា ស្នូរផ្ទុះបានផ្ទុះលាន់ឮនៅឯអាកាសយានដ្ឋានមួយក្នុងទីក្រុង Isfahan នៅភាគកណ្ដាលប្រទេសអ៊ីរ៉ង់។ ចំណែកបណ្ដាញផ្សាយព័ត៌មាន CNN របស់សហរដ្ឋអាមេរិកវិញ ក៏បានរាយការណ៍ដែរថា អ៊ីស្រាអែលបាញ់រយៈពេលខ្លីដោយវាយប្រហារពីយន្តហោះដ្រូន និងបាញ់មីស៊ីលលើអ៊ីរ៉ង់។
កាលពីរំលងអាធ្រាត្រថ្ងៃសៅរ៍សប្ដាហ៍មុន ថ្ងៃទី១៣ ចូលដល់ថ្ងៃអាទិត្យ ទី១៤ មេសា អ៊ីរ៉ង់បានបាញ់មីស៊ីល និងដ្រូនជាង ៣៥០គ្រាប់លើអ៊ីស្រាអែល។ ការវាយប្រហាររបស់អ៊ីរ៉ង់ នេះ គឺជាការសងសឹកទៅនឹងការវាយប្រហាររបស់អ៊ីស្រាអែល លើស្ថានកុងស៊ុលអ៊ីរ៉ង់ ក្នុងទីក្រុងដាម៉ាស ប្រទេសស៊ីរី កាលពីថ្ងៃទី១ មេសា ដោយសម្លាប់មនុស្ស ១៣នាក់ ក្នុងនោះមានឧត្ដមសេនីយ៍អ៊ីរ៉ង់ ២នាក់ផងដែរ។
ប៉ុន្តែការវាយប្រហារសងសឹករបស់អ៊ីរ៉ង់ នេះ មិនបានបង្កការខូចខាតធ្ងន់ធ្ងរនោះទេ ហើយមីស៊ីល និងដ្រូនភាគច្រើនរបស់អ៊ីរ៉ង់ ត្រូវបានបាញ់ទម្លាក់ដោយប្រព័ន្ធការពារដែនអាកាសរបស់អ៊ីស្រាអែល ដោយមានការជួយពីសហរដ្ឋអាមេរិក អង់គ្លេស បារាំង និងប្រទេសសម្ព័ន្ធមិត្តអាមេរិកក្នុងតំបន់មជ្ឈិមបូព៌ា។
តាមគេហទំព័រអាកាសចរណ៍ FlightRadar24 បានឱ្យដឹងថា រដ្ឋាភិបាលអ៊ីរ៉ង់ បានបញ្ជាទៅក្រុមហ៊ុនអាកាសចរណ៍នានា ផ្លាស់ប្ដូរផ្លូវហោះហើរភ្លាមៗដែលត្រូវឆ្លងកាត់ដែនអាកាសអ៊ីរ៉ង់ តាមរយៈការបង្វែរទិសដៅទៅចុះចតនៅអាកាសយានដ្ឋានផ្សេង ឬត្រឡប់ទៅកាន់ទីចេញដំណើររបស់ខ្លួនវិញ។
គេហទំព័រតាមដានការហោះហើរ FlightRadar24 បានឱ្យដឹងទៀតថា អ៊ីរ៉ង់បានបិទអាកាសយានដ្ឋានក្នុងទីក្រុង Tehran, Shiraz និង Isfahan ហើយត្រូវលុបចោលនូវជើងហោះហើរមកពីតំបន់ភាគខាងលិច។
ក្រុមហ៊ុនអាកាសចរណ៍អន្តរជាតិ Flydubai បានឱ្យដឹងថា គណៈអភិបាលក្រុមហ៊ុនបានលុបចោលជើងហោះហើរទាំងអស់ទៅកាន់អ៊ីរ៉ង់ ដោយចាប់ពីម៉ោងនេះតទៅ។
តែជាមួយគ្នានេះ កងទ័ពអ៊ីរ៉ង់ បានឱ្យដឹងថា កងកម្លាំងរបស់ខ្លួនបានបាញ់ទម្លាក់ដ្រូនជាច្រើនគ្រឿង បន្ទាប់ពីមានសេចក្ដីរាយការណ៍ពីស្នូរផ្ទុះនៅក្បែរទីក្រុង Isfahan ស្ថិតនៅភាគខាងកណ្ដាលនៃប្រទេស។
អ្នកនាំពាក្យកងទ័ពអាកាសអ៊ីរ៉ង់ Hossein Dalirian បាននិយាយថា ដ្រូនជាច្រើនគ្រឿងត្រូវបានប្រព័ន្ធការពារដែនអាកាសអ៊ីរ៉ង់ បាញ់ទម្លាក់ដោយជោគជ័យ។
ប៉ុន្តែបើតាមទីភ្នាក់ងារសារព័ត៌មានអ៊ីរ៉ង់ ការផ្ទុះចំនួន ៣លើកបានកើតឡើងនៅក្បែរមូលដ្ឋានទ័ពអាកាស Shekari ស្ថិតក្បែរទីក្រុង Isfahan ប៉ុន្តែមិនបានបង្កការខូចខាតអ្វីដល់រោងចក្រនុយក្លេអ៊ែរក្នុងទីក្រុង Isfahan ឡើយ។
ពីបុរីញូវយ៉កឯណោះវិញ ប្រភពព័ត៌មានពីមន្ត្រីអង្គការសហប្រជាជាតិ បានឱ្យដឹងថា រដ្ឋមន្ត្រីការបរទេសអ៊ីរ៉ង់ Hossein Amirabdollahian បានទទូចឱ្យក្រុមប្រឹក្សាសន្តិសុខចាប់បង្ខំឱ្យអ៊ីស្រាអែល បញ្ឈប់សកម្មភាពកងទ័ពវាយប្រហារលើអ៊ីរ៉ង់ តែបើមិនបញ្ឈប់ទេ អ៊ីរ៉ង់នឹងវាយប្រហារបកវិញ។
លោករដ្ឋមន្ត្រីការបរទេសអ៊ីរ៉ង់ បន្តថា អ៊ីរ៉ង់មានសិទ្ធិវាយការពារខ្លួន ហើយក៏មានសិទ្ធិវាយបកភ្លាមៗលើអ៊ីស្រាអែល។
ពិភពលោកកំពុងដាក់ការព្រួយបារម្ភថា បើអ៊ីស្រាអែល នៅតែបន្តវាយប្រហារលើអ៊ីរ៉ង់ ថែមទៀត ហើយបែរជាអ៊ីរ៉ង់ វាយបកវិញ វានឹងទាញទៅរកសង្គ្រាមវាយប្រយុទ្ធគ្នាយ៉ាងធ្ងន់ធ្ងរ ហើយនឹងក្លាយជាសង្គ្រាមដ៏ធំបំផុតនៅក្នុងតំបន់មជ្ឈិមបូព៌ា។
អគ្គលេខាធិការអង្គការសហប្រជាជាតិ អង់តូនីញូ ហ្គូតារ៉េ បានថ្លែងពីទីក្រុងញូវយ៉ក ដោយអំពាវនាវដល់ភាគីទាំងពីរឆាប់បន្ថយភាពតានតឹងជាបន្ទាន់ ខណៈប្រទេសឧស្សាហកម្ម G-7 និងសហភាពអឺរ៉ុប ក៏បានប្រាប់ទៅអ៊ីស្រាអែល បញ្ឈប់ជាបន្ទាន់ពីការវាយប្រហារទៅលើប្រទេសអ៊ីរ៉ង់ ដែរ៕