ប្រធានសហជីពទ្រទ្រង់បុគ្គលិកកម្មករខ្មែរ កញ្ញា ឈឹម ស៊ីថរ ទទួលបានពានរង្វាន់អ្នកការពារសិទ្ធិមនុស្ស និងលទ្ធិប្រជាធិបតេយ្យ Per Anger ពីរដ្ឋាភិបាលស៊ុយអែត សម្រាប់ឆ្នាំ២០២៤ នេះ ក្នុងនាមកញ្ញាជាអ្នកការពារសិទ្ធិមនុស្សដ៏ស្វិតស្វាញរហូតក្លាយជាអ្នកទោសមនសិការរបស់រដ្ឋាភិបាលកម្ពុជា ដែលត្រូវរស់នៅក្នុងពន្ធនាគារទាំងអយុត្តិធម៌សព្វថ្ងៃនេះ។
គេហទំព័រអន្តរជាតិមួយដែលមានឈ្មោះថា Forum For Levande Historia បានចេញផ្សាយអត្ថបទមួយកាលពីថ្ងៃទី១៨ ខែមេសា ឆ្នាំ២០២៤ នេះ ដោយដាក់ចំណងជើងថា ២០២៤ ឈឹម ស៊ីថរ។
គេហទំព័រនេះបានសរសេរថា អ្នកឈ្នះរង្វាន់ Per Anger ឆ្នាំ២០២៤ គឺកញ្ញា ឈឹម ស៊ីថរ ដោយសារតែអ្នកការពារសិទ្ធិមនុស្សរូបនេះបានស៊ូទ្រាំនឹងការយាយី ព្រមទាំងការគំរាមកំហែងជាច្រើនឆ្នាំ រហូតជាប់គុកដែលមិនអាចមកប្រទេសស៊ុយអែត ដើម្បីទទួលរង្វាន់នេះបាន។
ប្រភពដដែលលើកឡើងថា កញ្ញា ឈឹម ស៊ីថរ បានក្លាយជាឥស្សរជនឈានមុខគេក្នុងការតស៊ូដើម្បីធ្វើឱ្យក្រុមហ៊ុនណាហ្គាវើលដ៍ និងរដ្ឋាភិបាលកម្ពុជា គោរពសិទ្ធិសេរីភាពក្នុងការបង្កើតសមាគម និងច្បាប់ការងារ ដែលត្រូវបានធានាការពារដោយរដ្ឋធម្មនុញ្ញកម្ពុជា ដូច្នេះកញ្ញាមានលក្ខណៈសម្បត្តិស័ក្តិសមជាអ្នកដឹកនាំស្ត្រីវ័យក្មេង និងជាគំរូសម្រាប់មនុស្សគ្រប់រូបក្នុងការតស៊ូដើម្បីសេរីភាព សិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
ជាងនេះទៀត កញ្ញា ឈឹម ស៊ីថរ ក៏មានបំណងចង់ឲ្យកម្មករទាំងអស់នៅកម្ពុជា យល់ដឹងកាន់តែច្បាស់ថា ការតស៊ូមតិនានា គឺជាសិទ្ធិរបស់ពលរដ្ឋគ្រប់រូប ប៉ុន្តែយ៉ាងណាក៏ដោយ ការតស៊ូនេះកំពុងស្ថិតក្នុងការរឹតត្បិតសេរីភាពនៃការបញ្ចេញមតិ និងសិទ្ធិក្នុងការបង្កើតសហជីពធ្ងន់ធ្ងរ ខណៈការចាប់ខ្លួនអ្នកតស៊ូដើម្បីសិទ្ធិសេរីភាពដាក់ពន្ធនាគារ ការបំភិតបំភ័យ និងការធ្វើទុក្ខបុកម្នេញលើមេដឹកនាំសហជីព និងអ្នកការពារសិទ្ធិមនុស្សនានា ក៏កាន់តែកើតមានខ្លាំងឡើងដែរក្នុងពេលជាមួយគ្នានេះ។
គេហទំព័រដដែលរៀបរាប់ថា ជាច្រើនឆ្នាំមកនេះ កញ្ញា ឈឹម ស៊ីថរ ទទួលរងនូវការយាយីការគំរាមកំហែង និងអំពើហិង្សាគ្រប់រូបភាព ប៉ុន្តែកញ្ញានៅតែបន្តការតស៊ូដើម្បីយុត្តិធម៌ ហើយពេលនេះ កញ្ញាក៏កំពុងជាប់ពន្ធនាគាររង់ចាំការកាត់ទោសថែមទៀត ប៉ុន្តែទោះបីជាស្ថិតក្នុងជីវភាពលំបាកយ៉ាងណាក៏ដោយ ក៏កញ្ញា ឈឹម ស៊ីថរ នៅតែបន្តលើកទឹកចិត្តដល់អ្នកជាប់ឃុំដទៃទៀតដែរសព្វថ្ងៃនេះ។
គេហទំព័រអន្តរជាតិដដែលនេះ បញ្ជាក់ថា គណៈវិនិច្ឆ័យពានរង្វាន់អះអាងថា កញ្ញា ឈឹម ស៊ីថរ ទទួលបានរង្វាន់ Per Anger Prize នៅឆ្នាំនេះ គឺដោយសារតែការធ្វើការងារមិនចេះនឿយហត់ និងការប្ដេជ្ញាចិត្តដើម្បីលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា ហើយភាពក្លាហាន និងការលះបង់ដ៏មហិមារបស់កញ្ញា គឺជាការបំផុសគំនិតក្នុងការតស៊ូដើម្បីយុត្តិធម៌ ទោះជាប់គុកក៏មិនព្រមចុះចាញ់ដែរ។
កញ្ញា ឈឹម ស៊ីថរ ធ្លាប់និយាយថា «គេអាចដាក់គុកខ្ញុំបាន ប៉ុន្តែគេមិនអាចបិទស្មារតីប្រយុទ្ធរបស់ខ្ញុំបានឡើយ»។
មន្ត្រីគ្រប់គ្រងខាងផ្នែកសិទ្ធិការងារនៃអង្គការសង់ត្រាល់ លោក ឃុន ថារ៉ូ បានប្រាប់សារព័ត៌មាន The Cambodia Daily នៅមុនការផ្សាយនេះបន្តិចថា ការផ្តល់ជូនពានរង្វាន់ Per Anger Prize ផ្នែកសិទ្ធិមនុស្ស និងប្រជាធិបតេយ្យរបស់រដ្ឋាភិបាលរបស់ប្រទេសស៊ុយអែត គឺជាកិត្តិយស ជាសេចក្តីថ្លៃថ្នូរ និងជាគុណតម្លៃសម្រាប់ ស៊ីថរ និងសកម្មជនសិទ្ធិមនុស្សដទៃទៀត ដែលបានចូលរួមសកម្មភាពទាមទារឱ្យមានការគោរពសិទ្ធិមនុស្ស សិទ្ធិការងារ និងនីតិរដ្ឋនៅកម្ពុជា។
លោកបន្តថា វាគឺជាលើកដំបូងបង្អស់ក្នុងរយៈពេល ២០ឆ្នាំដែលពានរង្វាន់នេះត្រូវបានប្រគល់ជូនសកម្មជនសិទ្ធិការងារនៅកម្ពុជា ដែលបង្ហាញពីការគាំទ្ររបស់បណ្តាប្រទេសលោកសេរី ដែលប្រកាន់គោលការណ៍ប្រជាធិបតេយ្យ និងការគោរពសិទ្ធិមនុស្ស។
ក្នុងឱកាសនេះ លោកសូមអំពាវនាវទៅកាន់រដ្ឋាភិបាលកម្ពុជា ឲ្យពិនិត្យពិចារណា និងទម្លាក់ចោលបទចោទប្រកាន់មកលើកញ្ញា ឈឹម ស៊ីថរ និងថ្នាក់ដឹកនាំសហជីព សកម្មជនសហជីព និងសកម្មជនសិទ្ធិមនុស្សដទៃទៀត រួមទាំងជំរុញឲ្យមានការដោះស្រាយសំណុំរឿងវិវាទការងារនេះផងដែរ ក្នុងបុព្វហេតុលើកកម្ពស់លំហសេរីភាពផ្នែកសមាគមនៅកម្ពុជា។
ពានរង្វាន់ Per Anger គឺជារង្វាន់អន្តរជាតិមួយរបស់រដ្ឋាភិបាលស៊ុយអែត សម្រាប់សិទ្ធិមនុស្ស និងលទ្ធិប្រជាធិបតេយ្យ។ រង្វាន់នេះត្រូវបានបង្កើតឡើងក្នុងឆ្នាំ២០០៤ ដើម្បីជាការចងចាំពីការខិតខំប្រឹងប្រែងរបស់អ្នកការទូតឈ្មោះ Per Anger ដែលគាត់បានធ្វើកិច្ចការអំឡុងសង្គ្រាមលោកលើកទីពីរ ក្នុងការជួយសង្គ្រោះជនជាតិយូដា និងជនជាតិហុងគ្រី ពីអំពើឃោរឃៅនានានៅពេលនោះ។
អង្គការអន្តរជាតិចំនួន ៩ បានចូលរួមក្នុងការងារផ្តល់ពានរង្វាន់ Per Anger នៅឆ្នាំ២០២៤ នេះ ដូចជា អង្គការ Civil Rights Defenders អង្គការ Kvinna Foundation អង្គការ We Effect អង្គការ Church of Sweden និងអង្គការចំនួនប្រាំទៀត។
កាលពីអំឡុងខែកុម្ភៈ ឆ្នាំ២០២៤ ប្រធានសហជីពទ្រទ្រង់បុគ្គលិកកម្មករខ្មែរ កញ្ញា ឈឹម ស៊ីថរ ធ្លាប់ទទួលបានពានរង្វាន់អ្នកការពារសិទ្ធិមនុស្សសកលលោក ដែលផ្តល់ដោយសហរដ្ឋអាមេរិកម្តងរួចមកហើយ ប៉ុន្តែត្រូវរដ្ឋាភិបាលកម្ពុជាចាត់ទុកថាការផ្ដល់ពានរង្វាន់នេះ ជាទង្វើដែលជំរុញ ឬផ្តល់កម្លាំងដល់ក្រុមជាក់លាក់ដែលបានត្រៀមខ្លួនរួចជាស្រេច ក្នុងការកេងយកប្រយោជន៍ពីស្ថានការណ៍ ដើម្បីបម្រើរបៀបវារៈលាក់ពុតរបស់ខ្លួនដែលពួនជ្រកក្រោមស្លាកសិទ្ធិមនុស្ស និងប្រជាធិបតេយ្យទៅវិញ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនយ៉ាងហិង្សាកាលពីដើមខែមករា ឆ្នាំ២០២២ អំឡុងពេលកញ្ញាព្យាយាមចូលរួមធ្វើកូដកម្មជាមួយក្រុមកូដករផ្សេងទៀត និងត្រូវបានឃុំខ្លួនបណ្ដោះអាសន្នក្នុងពន្ធនាគារអស់រយៈពេល ២ខែ ប៉ុន្តែកញ្ញាត្រូវបានដោះលែងឱ្យនៅក្រៅឃុំវិញ កាលពីខែមីនា ឆ្នាំ២០២២ កន្លងទៅនេះ។ កញ្ញាត្រូវបានសមត្ថកិច្ចក្រុងភ្នំពេញ ចាប់ខ្លួនសាជាថ្មីទៀត កាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ នៅអាកាសយានដ្ឋានអន្តរជាតិភ្នំពេញ បន្ទាប់ពីកញ្ញាចូលរួមមហាសន្និបាតពិភពលោកនៃសហព័ន្ធសហជីពអន្តរជាតិ ITUC នៅទីក្រុង Melbourne ប្រទេសអូស្ត្រាលី។
ទាក់ទិននឹងបញ្ហានេះ សហរដ្ឋអាមេរិក អូស្ត្រាលី និងសហព័ន្ធសហជីពអន្តរជាតិ ITUC បានចេញសេចក្តីថ្លែងការណ៍កាលពីពេលកន្លងទៅថា ការចោទប្រកាន់ពីបទព្រហ្មទណ្ឌលើកញ្ញា ឈឹម ស៊ីថរ ពីការអនុវត្តសិទ្ធិសហជីព និងការចោទប្រកាន់ថាបានរំលោភលើលក្ខខណ្ឌនៃការនៅក្រៅឃុំសម្រាប់ការចូលរួមកិច្ចប្រជុំសហជីព គឺមិនមានភាពស្របគ្នាជាមួយនឹងគោលការណ៍ច្បាប់ជាមូលដ្ឋានរបស់អង្គការពលកម្មអន្តរជាតិ ILO ដែលរដ្ឋាភិបាលកម្ពុជាបានផ្តល់សច្ចាប័នដោយស្ម័គ្រចិត្តកាលពីថ្ងៃទី២៣ ខែសីហា ឆ្នាំ១៩៩៩ និងរដ្ឋធម្មនុញ្ញរបស់ខ្លួនឡើយ៕