នៅក្នុងរយៈពេល ៦ខែចុងក្រោយនេះ សមរភូមិជាច្រើនដែលទ័ពអ៊ុយក្រែន វាយយកបានពីរុស្ស៊ី កាលពីក្នុងយុទ្ធនាការវាយបកនៅពាក់កណ្ដាលឆ្នាំ២០២៣ កំពុងធ្លាក់ក្នុងដៃកងទ័ពរុស្ស៊ី វិញហើយ។
អ៊ុយក្រែន បានប្រាប់ក្រុមផ្ដល់ជំនួយថា អ៊ុយក្រែនកំពុងចុះខ្សោយខ្លាំងណាស់នូវការវាយបកវិញ ដោយសារខ្វះគ្រាប់កាំភ្លើងធំ មីស៊ីលរយៈចម្ងាយឆ្ងាយ និងប្រព័ន្ធការពារដែនអាកាស។
លោកប្រធានាធិបតីអ៊ុយក្រែន វូឡូឌីមៀរ ហ្សេឡេនស្គី បានទទូចទៅក្រុមសមាជិកណាតូ ក្រុមបស្ចិមប្រទេស ក្រុមប្រទេសឧស្សាហកម្ម G-7 ជាពិសេសសហរដ្ឋអាមេរិក ត្រូវបន្ថែមជំនួយយោធាជាបន្ទាន់ បើពុំនោះទេ ទីតាំងជាច្រើននឹងបន្តធ្លាក់ក្នុងដៃកងទ័ពរុស្ស៊ី។
លោក ហ្សេឡេនស្គី បានថ្លែងដូចនេះស្របពេលប្រធានាធិបតីរុស្ស៊ី លោក វ៉្លាឌីមៀរ ពូទីន បានចេញបទបញ្ជាឱ្យកងទ័ពរបស់លោកវាយយកឱ្យបានខេត្តចំនួន ២ នៅក្នុងតំបន់ដុនបាស ភាគខាងកើតប្រទេសអ៊ុយក្រែន ដែលមានខេត្តដូណេត និងខេត្តលូហាន។
តំបន់ដុនបាស មានផ្ទៃដីជិត ៦ម៉ឺនគីឡូម៉ែត្រក្រឡា។ តំបន់នេះធ្លាក់ក្នុងសង្គ្រាមស៊ីវិលដោយសារក្រុមកម្លាំងបំបែករដ្ឋវាយយកទឹកដីមកគ្រប់គ្រង ដោយក្រុងមូស្គូ ជាអ្នករៀបចំជំនួយសព្វាវុធតាំងពីឆ្នាំ២០១៤ នៅពេលក្រុងមូស្គូ កាត់យកបានជ្រោយឧបទ្វីបគ្រីមៀរ តាមរយៈប្រធានាធិបតីអ៊ុយក្រែន លោក វិចទ័រ យ៉ាណាកូវិច បានចុះហត្ថលេខាយល់ព្រមប្រគល់ដែនដីនេះឱ្យនៅក្នុងចំណុះប្រទេសរុស្ស៊ី។
ប៉ុន្តែភ្លាមៗនោះ ប្រជាជនអ៊ុយក្រែន និងកងទ័ពរបស់ប្រទេសនេះ បានធ្វើបាតុកម្មទូទាំងប្រទេសដេញលោក វិចទ័រ យ៉ាណាកូវិច ចេញពីតំណែង ហើយកាត់ទោសពីទោសក្បត់ជាតិ។ លោក វិចទ័រ និងគ្រួសាររបស់គាត់ បានរត់ភៀសខ្លួនភ្លាមទៅនៅប្រទេសរុស្ស៊ី មកដល់ពេលនេះ។
តាមការចុះផ្សាយរបស់សារព័ត៌មានរុស្ស៊ី បានឱ្យដឹងថា រុស្ស៊ីបង្កើនកម្លាំងទ័ព និងវាយលុកយ៉ាងខ្លាំងលើទ័ពអ៊ុយក្រែន ដោយបាញ់កាំភ្លើងធំមួយថ្ងៃដល់ទៅជាង ៣ម៉ឺនគ្រាប់ និងបាញ់មីស៊ីលរាប់សិបគ្រាប់សឹងរាល់ថ្ងៃ ដែលធ្វើឱ្យអ៊ុយក្រែន រងគ្រោះកាន់តែធ្ងន់ធ្ងរ។
ក្រុមអ្នកវិភាគមកពីវិទ្យាស្ថានសិក្សាសង្គ្រាមដែលមានមូលដ្ឋាននៅក្រុងវ៉ាស៊ីនតោន រួមទាំងរដ្ឋមន្ត្រីការពារជាតិសហរដ្ឋអាមេរិក លោក ឡយ អូស្ទីន ព្រមានថា បើសហរដ្ឋអាមេរិក ជាពិសេសសភាជាន់ទាបរបស់អាមេរិកនៅតែអូសពេលវេលាចំពោះការអនុម័តជំនួយយោធាទៅឱ្យអ៊ុយក្រែន ឱ្យទាន់ស្ថានការណ៍ វាគឺជាការផ្ដល់ឱកាសឱ្យរុស្ស៊ី ឈ្នះសង្គ្រាម ហើយសហរដ្ឋអាមេរិកនឹងមានកំហុសយ៉ាងអាម៉ាស់។
ចំពោះលោក ចូ បៃដិន ដែលជាប្រធានាធិបតីអាមេរិក ក៏បានថ្លែងថា បើអ៊ុយក្រែន ចាញ់សង្គ្រាម អឺរ៉ុបនឹងជួបគ្រោះថ្នាក់ ហើយអាមេរិកនឹងអស់ឥទ្ធិពលជាប្រទេសមហាអំណាចដែលជួយរកសន្តិភាព និងយុត្តិធម៌សម្រាប់ប្រទេសទន់ខ្សោយ។
មិនតែប៉ុណ្ណោះ ក្រុមមេដឹកនាំបស្ចិមប្រទេស មេដឹកនាំណាតូ ក៏ព្រមានគណបក្សសាធារណរដ្ឋផងដែរ ប៉ុន្តែបានស្នើបក្សនេះឱ្យឆាប់ដូរជំហរជាបន្ទាន់ចំពោះការរាំងខ្ទប់ជំនួយសម្រាប់អ៊ុយក្រែន។ តែពេលនេះ អ៊ុយក្រែន មានសង្ឃឹមវិញហើយ ព្រោះតែសភាតំណាងរាស្ត្រសហរដ្ឋអាមេរិកកាលពីថ្ងៃទី២០ ខែមេសា បានអនុម័តកញ្ចប់ជំនួយសរុប ៩៥ពាន់លានដុល្លារ ទាំងសម្រាប់អ៊ុយក្រែន អ៊ីស្រាអែល និងកោះតៃវ៉ាន់ ក្នុងនោះ អ៊ុយក្រែន ទទួលបានជិត ៦១ពាន់លានដុល្លារ។
ភ្លាមៗក្រោយទទួលបានដំណឹងដ៏ល្អ ស្ដីពីការបោះឆ្នោតយល់ព្រមលើគម្រោងកញ្ចប់ថវិកាជួយអ៊ុយក្រែន ជិត ៦១ពាន់លានដុល្លារ ដែលអ៊ុយក្រែនទន្ទឹងរង់ចាំជាយូរខែមកហើយនេះ បាននាំឲ្យប្រធានាធិបតីអ៊ុយក្រែន លោក ហ្សេឡេនស្គី បានបង្ហោះសារវីដេអូមួយភ្លាម ដោយថ្លែងអំណរគុណដល់សហរដ្ឋអាមេរិក។ លោកបានលើកឡើងថា ថវិកានេះនឹងមកជួយសង្គ្រោះជីវិតប្រជាជនអ៊ុយក្រែន និងជួយឲ្យអ៊ុយក្រែនឈ្នះសង្គ្រាម ហើយលោក ពូទីន នឹងត្រូវតែបរាជ័យ។
កញ្ចប់ថវិកានេះមានទំហំទឹកប្រាក់ជិត ៦១ពាន់លានដុល្លារ ដែលផ្ដោតខ្លាំងលើជំនួយសព្វាវុធដែលអ៊ុយក្រែន បានទទូចសុំ ហើយក៏មានជំនួយផ្សេងទៀតផងសម្រាប់ជួយប្រជាជន និងមន្ត្រីរដ្ឋការនៃរដ្ឋាភិបាលលោក ហ្សេឡេនស្គី។
ចំណែកលោក ចូ បៃដិន បានអបអរភ្លាមៗដោយបានលើកឡើងថា សភាសហរដ្ឋអាមេរិកបានធ្វើរឿងមួយដែលស័ក្តិសមបំផុតនៅក្នុងប្រវត្តិសាស្ត្រ។
ប៉ុន្តែចំពោះរុស្ស៊ី វិញ បានប្រតិកម្មថា ជំនួយថវិការបស់អាមេរិកនេះ នឹងមកសម្លាប់ប្រជាជនអ៊ុយក្រែន កាន់តែច្រើនជាងមុនទៀត ហើយប្រទេសអ៊ុយក្រែនកាន់តែវិនាសធ្ងន់ធ្ងរ។
អ្នកនាំពាក្យរបស់វិមានក្រឹមឡាំង បានហៅជំនួយរបស់អាមេរិកឱ្យអ៊ុយក្រែន ថាដូចជាយកសាំងទៅជួយពន្លត់ភ្លើងទៅវិញទេ ហើយក៏មិនអាចធ្វើឱ្យរុស្ស៊ី ដកថយការវាយលុកនោះដែរ។
កញ្ចប់ថវិកាជំនួយដែលសភាអាមេរិកយល់ព្រមអនុម័តនេះ មានទំហំសរុបរហូតដល់ ៩៥ពាន់លានដុល្លារ។ ក្នុងចំណោមថវិកាជំនួយ ៩៥ពាន់លានដុល្លារនោះ ៦០ពាន់ ៨៤០លានដុល្លារ នឹងត្រូវផ្ដោតទៅលើវិបត្តិសង្គ្រាមនៅអ៊ុយក្រែន ជាចម្បង ក្នុងនោះ ២៣ពាន់លានដុល្លារ សម្រាប់បំពេញអាវុធរបស់យោធាអាមេរិកឡើងវិញ។ ថវិកា ២៦ពាន់លានដុល្លារសម្រាប់វិបត្តិសង្គ្រាមអ៊ីស្រាអែល និងក្រុមហាម៉ាស ក្នុងនោះ ៩ពាន់ ១០០លានដុល្លារសម្រាប់តម្រូវការផ្នែកមនុស្សធម៌ និង ៨ពាន់ ១២០លានដុល្លារ សម្រាប់តំបន់ឥណ្ឌូ-ប៉ាស៊ីហ្វិក ក្នុងនោះរួមមានទាំងសម្រាប់កោះតៃវ៉ាន់។
សហរដ្ឋអាមេរិក គឺជាអ្នកផ្ដល់សព្វាវុធធំបំផុតសម្រាប់ប្រទេសអ៊ុយក្រែន នៅក្នុងសង្គ្រាមប្រឆាំងការឈ្លានពានរបស់រុស្ស៊ី ដែលបានផ្ទុះឡើងចាប់តាំងតែពីខែកុម្ភៈ ឆ្នាំ២០២២ មក ប៉ុន្តែសភាសហរដ្ឋអាមេរិក មិនបានអនុម័តកញ្ចប់ថវិកាជំនួយទ្រង់ទ្រាយធំណាមួយឡើយសម្រាប់អ៊ុយក្រែន គិតចាប់ពីខែធ្នូ ឆ្នាំ២០២២ មក ដោយសារបញ្ហាខ្វែងគំនិតគ្នារវាងបក្សប្រជាធិបតេយ្យ និងបក្សសាធារណរដ្ឋ។
ឥឡូវនេះ មិនមែនមានតែប្រធានាធិបតីអ៊ុយក្រែន នោះទេដែលបានសម្ដែងអរគុណសភាសហរដ្ឋអាមេរិក គឺមេដឹកនាំណាតូ លោកអគ្គលេខាធិការ ជែនស្តូល ស្ទែនបឺក ក្រុមមេដឹកនាំអឺរ៉ុបជាច្រើន បានហៅសេចក្ដីសម្រេចរបស់សភាសហរដ្ឋអាមេរិក គឺជាសញ្ញាវាយសំពងទៅលើរបបនៅក្រុងមូស្គូ ដែលជាអ្នកបញ្ឆេះសង្គ្រាមនៅអ៊ុយក្រែន៕