សាលាដំបូងរាជធានីភ្នំពេញ សម្រេចចេញដីកាបញ្ឈប់ឱ្យចាប់ខ្លួនតំណាងរាស្ត្រគណបក្សសង្គ្រោះជាតិ លោក គង់ សភា ចាប់ពីពេលនេះ បន្ទាប់ពីព្រះមហាក្សត្រខ្មែរសម្រេចលើកលែងទោសឱ្យមន្ត្រីជាន់ខ្ពស់គណបក្សសង្គ្រោះជាតិរូបនេះតាមសំណើរបស់នាយករដ្ឋមន្ត្រីកម្ពុជាលោក ហ៊ុន ម៉ាណែត។
ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ លោក ច្រឹង ខ្មៅ នៅថ្ងៃទី២៥ ខែមេសា ឆ្នាំ២០២៤ នេះ ចេញដីកាបង្គាប់ដល់សមត្ថកិច្ចឱ្យបញ្ឈប់ការចាប់ខ្លួនលោក គង់ សភា តំណាងរាស្ត្រគណបក្សសង្គ្រោះជាតិខេត្តស្វាយរៀង ចាប់ពីពេលនេះតទៅ។ ការចេញដីកាបញ្ឈប់ការចាប់ខ្លួននេះ ធ្វើឡើងបន្ទាប់ពីព្រះមហាក្សត្រខ្មែរសម្រេចលើកលែងទោសឱ្យមន្ត្រីជាន់ខ្ពស់គណបក្សសង្គ្រោះជាតិរូបនេះ តាមសំណើរបស់នាយករដ្ឋមន្ត្រីកម្ពុជាលោក ហ៊ុន ម៉ាណែត កាលពីពេលថ្មីៗនេះ។
កាលពីថ្ងៃទី២៤ ខែមេសា ឆ្នាំ២០២៤ ព្រះករុណាព្រះបាទសម្តេច ព្រះបរមនាថ សីហមុនី បានចេញព្រះរាជក្រឹត្យមួយត្រាស់បង្គាប់លើកលែងទោសឱ្យតំណាងរាស្ត្រគណបក្សសង្គ្រោះជាតិលោក គង់ សភា ដែលត្រូវសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគាររយៈពេល ៨ឆ្នាំ កាលពីឆ្នាំ២០២២ កន្លងទៅ បន្ទាប់ពីលោក គង់ សភា ទទួលស្គាល់កំហុស និងស្នើសុំឱ្យលោក ហ៊ុន ម៉ាណែត អន្តរាគមន៍លើកលែងទោស ដើម្បីឱ្យលោកអាចវិលទៅស្រុកខ្មែរវិញកាលពីពេលថ្មីៗនេះ។
កាលពីថ្ងៃទី៩ ខែកុម្ភៈ ឆ្នាំ២០២៤ អតីតតំណាងរាស្ត្រគណបក្សសង្គ្រោះជាតិមណ្ឌលស្វាយរៀង លោក គង់ សភា បានចេញលិខិតមួយដោយស្នើសុំឱ្យនាយករដ្ឋមន្ត្រីកម្ពុជាលោក ហ៊ុន ម៉ាណែត ជួយអន្តរាគមន៍លើកលែងទោសឱ្យរូបលោក ដែលតុលាការបានផ្ដន្ទាទោសកន្លងមក ព្រមទាំងសុំឱ្យទម្លាក់ចោលនូវបទចោទប្រកាន់ទាំងអស់ផងដែរ។
ក្នុងលិខិតនោះ លោក គង់ សភា រៀបរាប់ថា លោកមានការសោកស្តាយយ៉ាងខ្លាំងនូវទង្វើរបស់ខ្លួនដែលធ្លាប់តែប្រឆាំងនឹងរដ្ឋាភិបាលកម្ពុជាកន្លងមក ខណៈលោក ហ៊ុន ម៉ាណែត ក៏បានទទួលយកការស្នើសុំនេះដែរ។
លោក គង់ សភា គឺជាមន្ត្រីជាន់ខ្ពស់គណបក្សសង្គ្រោះជាតិម្នាក់ក្នុងចំណោមមន្ត្រីជាន់ខ្ពស់គណបក្សសង្គ្រោះជាតិជាច្រើននាក់ទៀត ដូចជា លោក សម រង្ស៊ី និងលោក អេង ឆៃអ៊ាង ជាដើម ដែលត្រូវបានកាត់ទោសដោយកំបាំងមុខពីសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ កន្លងទៅ ឱ្យជាប់ពន្ធនាគាររយៈពេល ៨ឆ្នាំ ពីបទរួមគំនិតក្បត់ បន្ទាប់ពីលោករងនូវការចោទប្រកាន់ថាបានចូលរួមក្នុងដំណើរមាតុភូមិនិវត្តន៍របស់មេដឹកនាំប្រឆាំងលោក សម រង្ស៊ី កាលពីឆ្នាំ២០១៩ កន្លងទៅនោះ។
ក្រៅពីជាប់ទោសខាងលើ តំណាងរាស្ត្របក្សប្រឆាំងរូបនេះក៏ត្រូវរងការចោទប្រកាន់ពីបទល្មើសផ្សេងទៀតដែរ។ ជាក់ស្តែង កាលពីថ្ងៃទី១៧ ខែកក្កដា ឆ្នាំ២០២៣ លោក គង់ សភា ក៏ត្រូវបានគណៈកម្មការរៀបចំការបោះឆ្នោតរាជធានីភ្នំពេញ (PEC) ពិន័យជាប្រាក់ចំនួន ១០លានរៀល ព្រមទាំងលុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឱ្យគេបោះឆ្នោតចំនួន ២០ឆ្នាំថែមទៀត។ វិធានការនេះ ធ្វើឡើងបន្ទាប់ពីលោក គង់ សភា រងនូវការចោទប្រកាន់ពីបទធ្វើសកម្មភាពណែនាំ និងញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោតក្នុងដំណើរការបោះឆ្នោតកាលពីខែកក្កដា ឆ្នាំ២០២៣ កន្លងទៅនោះ។
ជាងនេះទៀត លោក គង់ សភា ក៏រងនូវការបញ្ជាឱ្យចាប់ខ្លួនពីសាលដីកាសាលាដំបូងរាជធានីភ្នំពេញដែរ ក្នុងចំណោមសកម្មជនសង្គមជាង ១០នាក់ផ្សេងទៀត (១៥នាក់) និងមន្ត្រីបក្សប្រឆាំងមួយចំនួនទៀត ដូចជា លោក ហូរ វ៉ាន់ និងលោក អ៊ូ ច័ន្ទឫទ្ធិ ជាដើម ដែលត្រូវដាក់ពន្ធនាគាររយៈពេល ២ឆ្នាំ និងពិន័យជាប្រាក់ចំនួន ៤លានរៀលកាលពីចុងខែតុលា ឆ្នាំ២០២១ កន្លងទៅ។
ក្រៅពីការចោទប្រកាន់តាមផ្លូវច្បាប់ តំណាងរាស្ត្រគណបក្សសង្គ្រោះជាតិរូបនេះក៏ធ្លាប់រងការវាយដំពីសមាជិកនៃកងអង្គរក្សលោក ហ៊ុន សែន នៅក្រៅរដ្ឋសភាកាលពីឆ្នាំ២០១៥ ដែរ ខណៈជនដៃដល់បានរងនូវការផ្ដន្ទាទោសក្នុងរយៈពេលខ្លី ប៉ុន្តែពួកគេបែរជាទទួលបានការតែងតាំងតួនាទីជាមន្ត្រីជាន់ខ្ពស់ក្នុងជួររដ្ឋាភិបាលទៅវិញ។
រយៈពេលជាច្រើនឆ្នាំមកនេះ លោក គង់ សភា បាននិរទេសខ្លួនទៅរស់នៅក្រៅប្រទេស បន្ទាប់ពីគណបក្សសង្គ្រោះជាតិត្រូវបានរំលាយកាលពីចុងឆ្នាំ២០១៧ កន្លងទៅ ប៉ុន្តែពួកគេក៏បានរងនូវការចោទប្រកាន់ជាបន្តបន្ទាប់ទៀតដែរ ក្រោយពេលដែលលោកធ្វើសកម្មភាពនយោបាយនៅក្រៅប្រទេសជាបន្តបន្ទាប់កន្លងមកនេះ។
ទាក់ទិននឹងបញ្ហានេះ ក្រោយពីគណបក្សសង្គ្រោះជាតិត្រូវតុលាការកំពូលក្រុងភ្នំពេញប្រកាសរំលាយបាន ២ឆ្នាំ គឺនៅឆ្នាំ២០១៩ មន្ត្រីជាន់ខ្ពស់មួយចំនួននៃគណបក្សនេះ បានស្នើសុំការលើកលែងទោស និងសុំសិទ្ធិធ្វើនយោបាយពីព្រះមហាក្សត្រជាបន្តបន្ទាប់ ក្នុងចំណោមនោះ មន្ត្រីខ្លះបានដាក់ពាក្យទៅក្រសួងមហាផ្ទៃ ដើម្បីបើកគណបក្សនយោបាយដោយខ្លួនឯង ខណៈមន្ត្រីខ្លះទៀតក៏បានស្នើសុំការលើកលែងទោសពីមេដឹកនាំបក្សកាន់អំណាចលោក ហ៊ុន សែន និងចុះចូលជាមួយគណបក្សប្រជាជនកម្ពុជាផងដែរ។
ជាក់ស្តែង លោក គង់ គាំ អតីតទីប្រឹក្សាជាន់ខ្ពស់គណបក្សសង្គ្រោះជាតិ និងលោក គង់ បូរ៉ា អតីតតំណាងរាស្ត្រគណបក្សសង្គ្រោះជាតិ ដែលត្រូវឪពុក និងបងប្រុសរបស់លោក គង់ សភា ក៏បានទទួលសិទ្ធិធ្វើនយោបាយពីព្រះមហាក្សត្រកាលពីថ្ងៃទី២ ខែមករា ឆ្នាំ២០១៩ កន្លងទៅដែរ ខណៈមន្ត្រីបក្សប្រឆាំងផ្សេងទៀត ដូចជា អ្នកស្រី លី ស្រីវីណា អ្នកស្រី ថាក់ ឡានី លោក សុន ឆ័យ ជាដើម ក៏បាននាំគ្នាសុំការលើកលែងទោស និងសុំសិទ្ធិធ្វើនយោបាយឡើងវិញទៀត ខណៈលោក ជា ប៉ូច ក៏បានប្រកាសផ្តាច់ទំនាក់ទំនងជាមួយលោក សម រង្ស៊ី នៅពេលនេះដែរ៕