អ្នកឃ្លាំមើលនិយាយថា ការផ្តល់លុយពីសំណាក់មេដឹកនាំបក្សកាន់អំណាចលោក ហ៊ុន សែន ក្នុងឋានៈជានាយករដ្ឋមន្ត្រី ឱ្យអ្នកគាំទ្រគណបក្សប្រជាជនកម្ពុជាលោក សាពូន មីដាដា ទោះក្នុងទំហំទឹកប្រាក់ ៣០ម៉ឺន ឬ ៤០ម៉ឺន ឬរាប់លានដុល្លារអាមេរិកក៏ដោយ ក៏ត្រូវចាត់ទុកថាជាទង្វើសូកប៉ាន់ ហើយត្រូវធ្វើការស៊ើបអង្កេត។
សកម្មជនខ្មែរក្នុងទីក្រុងឡងប៊ិច លោក មួង ណារ៉េត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៥ ខែមេសា ឆ្នាំ២០២៤ នេះថា ការផ្តល់លុយពីសំណាក់មេដឹកនាំបក្សកាន់អំណាច និងជាប្រធានព្រឹទ្ធសភា លោក ហ៊ុន សែន ក្នុងឋានៈជានាយករដ្ឋមន្ត្រីខ្មែរ ទៅដល់មនុស្សមួយចំនួននាពេលកន្លងមក គ្រាន់តែដើម្បីសូកប៉ាន់ឱ្យអ្នកទាំងនោះវាយប្រហារលើបក្សប្រឆាំងប៉ុណ្ណោះ ព្រោះថាបើគាត់ពិតជាមានចិត្តសន្តោសមែន ពលរដ្ឋខ្មែរច្រើនណាស់ដែលក្រីក្រ ហេតុអ្វីគាត់មិនជួយឱ្យពួកគេមានជីវភាពធូរធារដោយប្រើលុយទាំងនោះ។
លោក មួង ណារ៉េត លើកឡើងថា ចំនួនលុយដែលលោក ហ៊ុន សែន ធ្លាប់សូកប៉ាន់ទៅឱ្យមនុស្សមួយចំនួនក្នុងគោលដៅវាយប្រហារបក្សប្រឆាំង ដូចជា ការផ្តល់លុយឱ្យលោក សាន្ត ប៊ុនធឿន និងអ្នកនាង ធី សុវណ្ណថា ព្រមទាំងលោក សាពូន មីដាដា និងមនុស្សជាច្រើនទៀត ជាដើម គឺជាទង្វើដែលស្ថិតក្នុងការសង្ស័យជាទីបំផុត ព្រោះថាតំណែងតួនាទីរបស់លោក ហ៊ុន សែន ក្នុងឋានៈជានាយករដ្ឋមន្ត្រី ឬជាប្រធានព្រឹទ្ធសភានៅពេលនេះ អាចទទួលប្រាក់ខែបានត្រឹមតែពី ២០០០ដុល្លារទៅ ៣០០០ដុល្លារប៉ុណ្ណោះ ដូច្នេះលុយដ៏ច្រើនសន្ធឹកសន្ធាប់ទាំងនោះ មិនដឹងថាគាត់ទទួលបានពីប្រភពណានោះទេ ហើយគេមិនដឹងថា តើស្របច្បាប់ ឬមិនស្របច្បាប់នោះដែរ។
សកម្មជនខ្មែរក្រៅស្រុករូបនេះបញ្ជាក់ថា ការផ្តល់លុយដ៏ច្រើនសន្ធឹកសន្ធាប់នេះ តែងតែធ្វើឡើងដោយផ្ទាល់រវាងបុគ្គលទាំងនោះជាមួយលោក ហ៊ុន សែន ដោយមិនចរាចរជាផ្លូវការតាមធនាគារ ដូច្នេះទោះលោក ហ៊ុន សែន អះអាងថាការផ្តល់លុយនោះក្នុងទម្រង់បែបណាក៏ដោយ ក៏ស្ថិតក្នុងការសង្ស័យដែរ ខណៈស្ថាប័នរដ្ឋាភិបាលនានា ដូចជា ក្រសួងសេដ្ឋកិច្ច និងហិរញ្ញវត្ថុ ជាដើម ក៏មិនដែលប្រកាសពីចំនួនលុយដែលលោក ហ៊ុន សែន បានផ្តល់ឱ្យបុគ្គលទាំងនោះដែរ។
លោក មួង ណារ៉េត គូសបញ្ជាក់ថា ការចរាចរសាច់ប្រាក់ក្រៅប្រព័ន្ធធនាគារបែបនេះ ទោះត្រូវចាត់ចូលទៅអំពើអ្វីក៏បានដែរ ដូចជា អំពើពុករលួយ ជាដើម ហើយការស៊ើបអង្កេតត្រូវតែធ្វើឡើងជាដាច់ខាត ស្របពេលដែលលោក ហ៊ុន សែន មានឋានៈជាអ្នកដឹកនាំជាន់ខ្ពស់បែបនេះទៀតនោះ ព្រោះថាការស៊ើបអង្កេតលើរូបគាត់ចំពោះទង្វើដែលគួរឱ្យសង្ស័យបែបនេះ គឺដើម្បីផ្តល់សេចក្តីទុកចិត្តដល់ពលរដ្ឋលើរូបគាត់ទៅថ្ងៃមុខបន្តទៀត។
កាលពីថ្ងៃទី២៤ ខែមេសា ឆ្នាំ២០២៤ លោក សាពូន មីដាដា អះអាងថា កាលពីជាង ១១ឆ្នាំមុន លោកធ្លាប់ទទួលបានប្រាក់ ៦លាន ៧សែនដុល្លារអាមេរិក ព្រមទាំងផ្ទះវីឡានៅបុរី ប៉េងហួត បឹងស្នោ និងឡានម៉ាកសឺដេស ពណ៌ក្រហម ខ្សែកប្រាំតម្លឹងស្រោបពេជ្រ ១២ការ៉ាតពីលោក ហ៊ុន សែន និងអ្នកស្រី ប៊ុន រ៉ានី។
យ៉ាងណាក៏ដោយ ក្រោយការលើកឡើងរបស់លោក សាពូន មីដាដា បែបនេះ មេដឹកនាំបក្សកាន់អំណាចលោក ហ៊ុន សែន ប្រតិកម្មថា លោកមិនបានឱ្យលុយជិត ៧លានដុល្លារដល់លោក សាពូន មីដាដា ទេ តែលោកសារភាពថាលោកធ្លាប់ផ្តល់លុយឱ្យលោក សាពូន មីដាដា មែន ប៉ុន្តែត្រឹមតែ ៣០ម៉ឺនដុល្លារអាមេរិកប៉ុណ្ណោះ។
ជុំវិញបញ្ហានេះ គេសង្កេតឃើញថា លោក ហ៊ុន សែន តែងតែផ្តល់លុយក្នុងទំហំរាប់សិបម៉ឺនដុល្លាររហូតដល់រាប់លានដុល្លារអាមេរិក ទៅឱ្យមនុស្សមួយចំនួននាពេលកន្លងមក។ ជាក់ស្តែង កាលពីថ្ងៃទី២១ ខែសីហា ឆ្នាំ២០២២ លោក ហ៊ុន សែន អះអាងថា ក្រុមគ្រួសាររបស់លោកបានផ្តល់លុយឱ្យលោក សាន្ត ប៊ុនធឿន ច្រើនណាស់ ដើម្បីទិញផ្ទះរស់នៅ រួមទាំងផ្តល់ជាប្រាក់ខែ ៥០០ដុល្លារអាមេរិកក្នុងមួយខែថែមទៀត ចាប់ពីឆ្នាំ២០១៨ មក។
ទាក់ទិននឹងបញ្ហានេះ ប្រភពគួរឱ្យទុកចិត្តខ្លះទម្លាយថា លោក ហ៊ុន សែន ធ្លាប់ផ្តល់ជាលុយសុទ្ធឱ្យលោក សាន្ត ប៊ុនធឿន ប្រមាណជាកន្លះលានដុល្លារអាមេរិក ហើយចាប់តាំងពីពេលនោះ ជីវភាពរបស់លោក សាន្ត ប៊ុនធឿន ក៏ប្រែជាហឺហារ និងធ្វើសកម្មភាពវាយប្រហារបក្សប្រឆាំងគ្រប់រូបភាពតែម្តង។
ជាងនេះទៀត មានភស្តុតាងជាច្រើនដែលគេរកឃើញថា លោក ហ៊ុន សែន ធ្លាប់បានផ្តល់លុយប្រមាណជា ១លានដុល្លារអាមេរិកឱ្យអតីតសកម្មជនបក្សប្រឆាំង អ្នកនាង ធី សុវណ្ណថា ក្នុងបំណងឱ្យអតីតសកម្មជនបក្សប្រឆាំងរូបនេះ វាយបក និងបំបែកបំបាក់បក្សប្រឆាំងវិញកាលពីឆ្នាំ២០១៧ កន្លងទៅ។
តំណាងរាស្ត្រគណបក្សសង្គ្រោះជាតិលោក អ៊ុំ សំអាន លើកឡើងថា លោក ហ៊ុន សែន តែងតែយកលុយដែលបានមកពីការលួចទ្រព្យសម្បត្តិជាតិ ទៅទិញមនុស្សឱ្យបម្រើខ្លួន ដោយការជេរប្រមាថ និងលាបពណ៌បក្សប្រឆាំងអស់រាប់លានដុល្លារអាមេរិកកន្លងមក ហើយលុយដែលគាត់យកទៅទិញមនុស្សទាំងនោះ បើយកទៅអភិវឌ្ឍ និងសាងសង់ស្ពាន បានរាប់រយស្ពានឯណោះ។
ទាក់ទិននឹងបញ្ហានេះ សារព័ត៌មាន The Cambodia Daily មិនទាន់អាចទាក់ទងប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បាននៅឡើយទេរហូតដល់ម៉ោងផ្សាយនេះ ដើម្បីសុំការបំភ្លឺថា តើអង្គភាព ACU នឹងបើកការស៊ើបអង្កេតលើលោក ហ៊ុន សែន ឬអត់ ជុំវិញករណីផ្តល់លុយសុទ្ធរាប់សិបម៉ឺនដុល្លារដល់តារាចម្រៀង សកម្មជននយោបាយ និងអ្នកសារព័ត៌មាននោះ?៕