សាលាដំបូងរាជធានីភ្នំពេញសម្រេចផ្តន្ទាទោសលោករ៉ាត់ រត្នមុនីឲ្យជាប់ពន្ធនាគារ២ឆ្នាំដោយត្រូវអនុវត្តទោសទាំងស្រុង និងបង្គាប់សងសំណងជំងឺចិត្តដល់ដើមបណ្ដឹង២នាក់ក្នុងម្នាក់ទឹកប្រាក់ចំនួន៣៥លានរៀល។
ចៅក្រមជំនុំជម្រះនៃសាលាដំបូងក្រុងភ្នំពេញលោកកូយ សៅនិយាយនៅថ្ងៃទី២៦ខែមិថុនានេះថា តុលាការសម្រេចដូច្នេះ ក្រោយពីបានស្តាប់ចម្លើយសាក្សី សេចក្តីសន្និដ្ឋានរបស់តំណាងអយ្យការសេចក្តីសន្និដ្ឋានរបស់មេធាវីចុងចោទនិងចម្លើយរបស់ជនជាប់ចោទនិងពិចារណាត្រឹមត្រូវតាមច្បាប់។
ប៉ុន្តែលោករ៉ាត់ រត្នមុនីចាត់ទុកការសម្រេចរបស់តុលាការបែបនេះគឺអយុត្តិធម៌ណាស់ចំពោះរូបលោកនិងបដិសេធការចោទទាំងនេះមកលើរូបលោក។ លោករត្នមុនីនៅតែប្រកាន់ជំហរដដែលថា លោកគ្រាន់តែជាអ្នកបកប្រែធម្មតាហើយគ្មានចំណែកណាមួយនៅក្នុងការទទួលខុសត្រូវលើការចងក្រងនិងខ្លឹមសារនៃរឿង«ម្តាយខ្ញុំ លក់ខ្ញុំ»ដែលផលិតដោយសារព័ត៌មានRussia Todayនោះទេ។
មេធាវីការពារក្តីលោករត្នមុនីគឺលោកឡោ ជុនធីឲ្យដឹងថា លោកមិនពេញចំពោះការសម្រេចរបស់តុលាការបែបនេះទេ ដោយលោកនៅតែអះអាងថា កូនក្តីរបស់លោកមិនបានប្រព្រឹត្តដូចការចោទប្រកាន់ឡើយ។
លោកនឹងប្តឹងទាស់ការសម្រេចរបស់តុលាការសាលាដំបូងក្រុងភ្នំពេញទៅសាលាឧទ្ធរណ៍។ ក្រុមអង្គការអន្តរជាតិនានាចាត់ទុកថា ការចាប់ខ្លួន និងការចោទប្រកាន់មកលើមន្រ្តីសង្គមស៊ីវិលរូបនេះ គឺជារឿងអយុត្តិធម៌ និងទាមទារឲ្យតុលាការទីក្រុងភ្នំពេញដោះលែងសកម្មជនសិទ្ធិការងាររូបនេះឲ្យមានសេរីភាពជាបន្ទាន់។
នាយកអង្គការលើកលែងទោសអន្តរជាតិប្រចាំតំបន់អាស៊ីបូព៌ានិងអាស៊ីអាគ្នេយ៍លោកនីកូឡាស បេគីលីន(Nicholas Bequelin)បានបញ្ជាក់នៅក្នុងសេចក្ដីថ្លែងការណ៍របស់ខ្លួនកាលពីថ្ងៃទី៣០ឧសភា ថា លោករ៉ាត់ រត្នមុនី បានជាប់ទោសដោយសារតែតួនាទីរបស់លោកក្នុងការបង្ហាញរឿងរ៉ាវដ៏គួរឱ្យតក់ស្លុត ស្ដីពីការកេងប្រវ័ញ្ចផ្លូវភេទលើកុមារនៅកម្ពុជា។ លោកបន្តថា បទចោទប្រកាន់ក្លែងក្លាយលើសកម្មជនសិទ្ធិការងាររូបនេះត្រូវបានគេរៀបចំឡើងដើម្បីធ្វើទុក្ខបុកម្នេញទៅលើអ្នកដែលចូលរួមលាតត្រដាងការណ៍ពិតអំពីបញ្ហាដែលកំពុងរីករាលដាល និងភាពអសកម្មខ្លាំងរបស់រដ្ឋាភិបាលកម្ពុជាតែប៉ុណ្ណោះ៕