បញ្ញវន្តខ្មែរនៅក្រៅស្រុក អះអាងថា អនុរដ្ឋមន្ត្រីការបរទេសរបស់សហរដ្ឋអាមេរិក គួរបង្ហាញជំហរម៉ឺងម៉ាត់ក្នុងពេលជួបជជែកជាមួយលោកនាយករដ្ឋមន្ត្រី ហ៊ុន សែន ក្នុងការជំរុញឲ្យមេដឹកនាំរូបនេះដោះលែងមេបក្សប្រឆាំងឲ្យមានសេរីភាពឡើងវិញ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៣១ ខែឧសភា នេះថា ក្រុមប្រឹក្សាឃុំសង្កាត់ទាំង ៥០០៧នាក់របស់បក្សប្រឆាំង ត្រូវនាំគ្នាចេញមកតវ៉ាជាសាធារណៈនៅចំពេលវត្តមានរបស់អ្នកការទូតសហរដ្ឋអាមេរិក រូបនេះ ជាមួយលោក ហ៊ុន សែន។ លោកអះអាងថា ប្រសិនបើក្រុមប្រឹក្សាឃុំសង្កាត់បក្សប្រឆាំងមិនចេញមកតវ៉ាចំពេលនេះទេ ហើយអនុរដ្ឋមន្ត្រីការបរទេសរូបនេះនៅតែបន្តឥរិយាបថការទូតទន់ភ្លន់ដដែលទៀតនោះ ដំណើរទស្សនកិច្ចនេះនឹងមិនបានជាប្រយោជន៍សម្រាប់ពលរដ្ឋខ្មែរនោះឡើយ ផ្ទុយទៅវិញ នឹងធ្វើឲ្យរដ្ឋាភិបាលលោក ហ៊ុន សែន កាន់តែបានចិត្តក្នុងការដំឡើងអំណាចផ្ដាច់ការរបស់ខ្លួនតែប៉ុណ្ណោះ។ លោកអះអាងថា អ្នកស្រី វីនឌី ស៊ើមែន (Wendy Sherman) គួរបញ្ជាក់ឲ្យបានច្បាស់ចំពោះមុខក្រុមលោក ហ៊ុន សែន ថា រដ្ឋអំណាចលោក ហ៊ុន សែន ត្រូវតែដោះលែងលោក កឹម សុខា និងផ្ដល់សិទ្ធិឲ្យអ្នកនយោបាយប្រឆាំងចូលទីលានប្រកួតឡើងវិញនៅក្នុងឆ្នាំ២០២១ នេះ ប្រសិនបើលោក ហ៊ុន សែន ចង់មានទំនាក់ទំនងល្អជាមួយសហរដ្ឋអាមេរិកបន្តទៀតនោះ។
ការអះអាងរបស់លោក គឹម សុខ គឺធ្វើឡើងបន្ទាប់ពីតំណាងរាស្ត្រសហរដ្ឋអាមេរិក ២រូប បានស្នើសុំឲ្យអនុរដ្ឋមន្ត្រីការបរទេសអាមេរិក ទាមទារឲ្យលោក ហ៊ុន សែន ទម្លាក់ចោលនូវរាល់បទចោទនានាទៅលើប្រធានគណបក្សសង្គ្រោះជាតិ លោក កឹម សុខា ក្នុងពេលបច្ចុប្បន្ននេះ។
កាលពីថ្ងៃទី៣០ ខែឧសភា ឆ្នាំ២០២១ តំណាងរាស្ត្រសហរដ្ឋអាមេរិកដ៏មានឥទ្ធិពល ២រូប ក៏ជាតំណាងរាស្ត្រដែលទទួលការគាំទ្រពីតំណាងរាស្ត្រផ្សេងទៀតរបស់អាមេរិកក្នុងការបង្កើតឲ្យមានច្បាប់ដាក់ទណ្ឌកម្មកម្ពុជាទាក់ទងទៅនឹងការរំលោភសិទ្ធិមនុស្ស និងគោលការណ៍ប្រជាធិបតេយ្យកន្លងមក។
លោក Steve Chabot មកពីគណបក្សសាធារណរដ្ឋ និងលោក Alan Lowenthal មកពីគណបក្សប្រជាធិបតេយ្យ បានសរសេរលិខិតរួមគ្នាមួយច្បាប់ទៅកាន់អនុរដ្ឋមន្ត្រីការបរទេសអាមេរិក អ្នកស្រី Wendy Sherman មុនដំណើរទស្សនកិច្ចរបស់គាត់ទៅកាន់ប្រទេសកម្ពុជា នៅដើមខែមិថុនា ឆ្នាំ២០២១ ខាងមុខនេះ។ លោក Steve Chabot និងលោក Alan Lowenthal បានស្នើសុំឲ្យអ្នកស្រីអនុរដ្ឋមន្ត្រីការបរទេសអាមេរិក Wendy Sherman ក្នុងដំណើរទស្សនកិច្ចទៅប្រទេសកម្ពុជា ដោយចង់ឃើញអ្នកស្រីថ្លែងទៅកាន់លោកនាយករដ្ឋមន្ត្រី ហ៊ុន សែន ក្នុងជំនួបមួយនេះ ដែលនឹងលើកឡើងអំពីការទម្លាក់ចោលនូវរាល់បទចោទប្រកាន់ទៅលើប្រធានគណបក្សសង្គ្រោះជាតិ លោក កឹម សុខា ដែលកំពុងរងការរឹតត្បិតសេរីភាពពីរដ្ឋាភិបាលរបស់លោក ហ៊ុន សែន ក្នុងពេលបច្ចុប្បន្ននេះ។
ក្នុងដំណើរទស្សនកិច្ចរបស់អ្នកស្រី Wendy Sherman នឹងបញ្ជាក់ឡើងវិញពីការប្ដេជ្ញាចិត្តរបស់សហរដ្ឋអាមេរិក ចំពោះភាពចាំបាច់របស់អាស៊ាន និងលើកឡើងនូវបញ្ហាទ្វេភាគីជាមួយប្រមុខការទូតកម្ពុជា និងមន្ត្រីជាន់ខ្ពស់របស់រដ្ឋាភិបាលកម្ពុជាមួយចំនួន និងរួមទាំងការជួបសន្ទនាជាមួយអង្គការសង្គមស៊ីវិលផងដែរ ។
ប្រធានគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចក្រុងភ្នំពេញចាប់ខ្លួនកាលពីខែកញ្ញា ឆ្នាំ២០១៧ ដាក់ពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាម។ ការចាប់លោក កឹម សុខា ទាំងយប់នោះ គឺធ្វើឡើងក្រោមបទចោទពីបទក្បត់ជាតិតាមប្រសាសន៍របស់លោកនាយករដ្ឋមន្ត្រី ហ៊ុន សែន។
យ៉ាងណាក៏ដោយ មកទល់នឹងពេលនេះ លោក កឹម សុខា នៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ បើទោះបីជាតុលាការក្រុងភ្នំពេញនៅតែបន្តបិទសិទ្ធិសេរីភាពរបស់លោកក្នុងពេលបច្ចុប្បន្ននេះក៏ដោយ។
ពាក់ព័ន្ធនឹងបញ្ហានេះ កាលថ្ងៃទី១២ ខែមេសា ឆ្នាំ២០២១ ឯកអគ្គរដ្ឋទូតប្រទេសអូស្ត្រាលី ប្រចាំនៅកម្ពុជា លោក ប៉ាប់ប្លូ កាំង បានអះអាងថា លោកនឹងបន្តតស៊ូមតិដើម្បីរកដំណោះស្រាយឱ្យបានទាន់ពេលវេលា និងប្រកបដោយតម្លាភាពលើស្ថានការណ៍បច្ចុប្បន្នរបស់ប្រធានបក្សប្រឆាំង លោក កឹម សុខា៕