 របស់ឧកញ៉ា ពុង ឃាវសែ ដែលបានប៉ះពាល់ដីស្រែចម្ការរបស់ពួកគាត់។){kind=link}
ពលរដ្ឋជាច្រើនគ្រួសារនៅខេត្តកណ្តាល កំពុងប្រមូលគ្នាចេញតវ៉ាទាមទារឱ្យអាជ្ញាធរជួយដោះស្រាយទំនាស់ដីធ្លីរវាងអ្នកភូមិជាង ៦០គ្រួសារជាមួយក្រុមហ៊ុនអភិវឌ្ឍន៍វាលយន្តហោះថ្មី អូស៊ីអាយស៊ី (OCIC) របស់ឧកញ៉ា ពុង ឃាវសែ ដែលបានប៉ះពាល់ដីស្រែចម្ការរបស់ពួកគាត់។
ក្រុមពលរដ្ឋទាំងនោះបានបោះតង់សង់ខ្ទមនៅតំបន់ដីមានជម្លោះនៅភូមិអំពៅព្រៃ ឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល និងខ្លះទៀតនៅតាមដងផ្លូវ ដើម្បីតៀមតវ៉ារកដំណោះស្រាយឲ្យបានសមរម្យសម្រាប់គ្រួសារពួកគាត់។
តំណាងពលរដ្ឋឱ្យដឹងថា មូលហេតុដែលអ្នកភូមិនាំគ្នាធ្វើបែបនេះ គឺដោយសារតែអាជ្ញាធរដែលពាក់ព័ន្ធ មិនអើពើរកដំណោះស្រាយចំពោះទុក្ខកង្វល់រួមរបស់ពលរដ្ឋក្នុងមូលដ្ឋាននោះទេ។
តំណាងពលរដ្ឋដដែលបានបញ្ជាក់ទៀតថា ដីស្រែចម្ការទាំងនោះជាដីកេរដូនតារបស់ពួកគាត់ ដែលបានអាស្រ័យផលជាង ៤០ឆ្នាំមកហើយ ប៉ុន្តែបែរជាត្រូវបានក្រុមហ៊ុនហាមឃាត់ និងរារាំងមិនឱ្យពួកគាត់ចូលទៅធ្វើស្រែបង្កបង្កើនផលចិញ្ចឹមជីវិតលើដីនៅតំបន់នោះជាច្រើនឆ្នាំមកហើយ។
រីឯការហាមឃាត់នេះ គឺខាងភាគីក្រុមហ៊ុនមិនទាន់មានគោលការណ៍ច្បាស់លាស់ផ្តល់សំណងសមរម្យដល់អ្នកភូមិនៅឡើយទេ។
អ្នកភូមិអំពៅព្រៃ បានស្រែកទាមទារយុត្តិធម៌ជាង ៣ឆ្នាំមកហើយក្រោយពីពួកគាត់ទទួលដំណឹងថា រដ្ឋាភិបាលសម្រេចដកហូតដីស្រែចម្ការកេរឪពុកម្តាយរបស់ពួកគាត់អស់រាប់រយហិកតារ ដើម្បីប្រគល់ឱ្យក្រុមហ៊ុនឯកជនអភិវឌ្ឍអាកាសយានដ្ឋានថ្មីរបស់ឧកញ៉ា ពុង ឃាវសែ ដែលគេស្គាល់ថាជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន។ ពលរដ្ឋទាមទារឱ្យរដ្ឋាភិបាលអន្តរាគមន៍ឱ្យក្រុមហ៊ុនផ្តល់សំណងសមរម្យ ដើម្បីឱ្យអ្នកភូមិមានដើមទុនខ្លះទិញដីបង្កបង្កើនផលចិញ្ចឹមជីវិតនៅកន្លែងផ្សេង។
ក្រុមហ៊ុនអភិវឌ្ឍវាលយន្តហោះថ្មី អូស៊ីអាយស៊ី (OCIC) របស់ឧកញ៉ា ពុង ឃាវសែ បានបោះទុនវិនិយោគប្រមាណ ១៥០០លានដុល្លារ ដើម្បីកសាងវាលយន្តហោះថ្មីស្តង់ដារអន្តរជាតិ។ គម្រោងអភិវឌ្ឍន៍នេះ លាតសន្ធឹងលើផ្ទៃដីជាង ២៦០០ហិកតារក្នុងឃុំចំនួន៤ ក្នុងខេត្តកណ្ដាល និងខេត្តតាកែវ៕