មន្ត្រីជាន់ខ្ពស់ទទួលបន្ទុកសិទ្ធិមនុស្សនៅកម្ពុជា ជំរុញឱ្យរដ្ឋាភិបាលដោះលែងអ្នកទោសនយោបាយ និងអ្នកទោសមនសិការដែលត្រូវបានអាជ្ញាធរឃុំខ្លួនសព្វថ្ងៃនេះ ដើម្បីបន្ធូរបន្ថយវិបត្តិនយោបាយបច្ចុប្បន្ន និងដើម្បីរក្សាកិត្តិយសរបស់កម្ពុជា ឱ្យស្មើមុខស្មើមាត់លើឆាកអន្តរជាតិបន្តទៀត។
ការលើកឡើងនេះ ធ្វើឡើងបន្ទាប់ពីសាលាដំបូងរាជធានីភ្នំពេញ បានចេញលិខិតអញ្ជើញមេធាវីការពារក្តីលោក រ៉ុង ឈុន ឱ្យចូលរួមសវនាការរបស់ប្រធានសហជីពរូបនេះបន្ទាប់ពីតុលាការបានចោទប្រកាន់ និងបានចាប់ឃុំខ្លួនអស់រយៈពេលជាច្រើនខែកន្លងមកនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៣ ខែមិថុនា នេះថា ប្រសិនបើតុលាការកម្ពុជា ពិនិត្យមើលលទ្ធភាពដែលអាចដោះលែងលោក រ៉ុង ឈុន ឬទម្លាក់រាល់បទចោទនានាលើអ្នកទោសមនសិការផ្សេងទៀតនោះ គឺសញ្ញាមួយដែលបង្ហាញថា កម្ពុជា កំពុងឈានទៅរកការបើកនូវលំហប្រជាធិបតេយ្យឡើងវិញនៅពេលនេះ។
លោកអះអាងថា ដើម្បីចៀសវាងនូវការរិះគន់នានាពីប្រទេសលោកសេរីទៅលើរដ្ឋាភិបាល និងប្រព័ន្ធយុត្តិធម៌នៅកម្ពុជាបន្តទៀត ព្រមទាំងអាចបន្តរឹតចំណងការទូតឱ្យបានកាន់តែប្រសើរផងនោះ លុះណាតែរដ្ឋាភិបាល និងស្ថាប័នពាក់ព័ន្ធ បញ្ឈប់ការរឹតត្បិតសេរីភាពបញ្ចេញមតិ និងងាកទៅគោរពគោលការណ៍សិទ្ធិមនុស្សឱ្យបានត្រឹមត្រូវឡើងវិញ។
លោកបញ្ជាក់ថា ការធ្វើបែបនេះ គឺជាការដឹកនាំមួយដ៏ល្អដែលអាចឱ្យភាគីពាក់ព័ន្ធទាំងអស់អាចចូលរួមកសាងសង្គមជាតិរបស់ពួកគេ ជាពិសេសរដ្ឋាភិបាលក៏ចៀសផុតពីការដាក់សម្ពាធនានារបស់សហគមន៍អន្តជាតិផងដែរ។
តំណាងអយ្យការអមសាលាដំបូងរាជធានីភ្នំពេញ លោក សេង ហៀង បានចេញលិខិតកាលពីថ្ងៃទី១ ខែមិថុនា ឆ្នាំ២០២១ អញ្ជើញមេធាវីការពារក្តីលោក រ៉ុង ឈុន គឺលោក ឡោ ជុនធី ឱ្យចូលរួមសវនាការនៅថ្ងៃទី៨ ខែមិថុនា ឆ្នាំ២០២១ ខាងមុខនេះលើករណីលោក រ៉ុង ឈុន ដែលតុលាការបានចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម កាលពីចុងខែកក្កដា ឆ្នាំ២០២០ កន្លងទៅនោះ។
ជុំវិញបញ្ហានេះ កាលពីចុងខែឧសភា ឆ្នាំ២០២១ តំណាងមេធាវីការពារក្តីឱ្យលោក រ៉ុង ឈុន គ្រោងដាក់ពាក្យបណ្តឹងចំនួន២ ទៅសាលាដំបូងរាជធានីភ្នំពេញផងដែរ រួមមានបណ្តឹងស្នើសុំឱ្យតុលាការបើកផ្លូវសម្រាប់មេធាវីការពារក្តី បានចូលជួបលោក រ៉ុង ឈុន ដែលកំពុងជាប់ឃុំនៅក្នុងមណ្ឌលអប់រំកែប្រែ «ម១» និងបណ្តឹងមួយទៀត ស្នើឱ្យដោះលែងកូនក្ដីរបស់ខ្លួនបាននៅក្រៅឃុំបណ្ដោះអាសន្នក្រោយការឃុំខ្លួនបណ្ដោះអាសន្នរង់ចាំសវនាការបានធ្វើលើសនីតិវិធី។
ប្រធានសហភាពការងារកម្ពុជា និងជាសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីចុងខែកក្កដា ឆ្នាំ២០២០ កន្លងទៅនោះ។
ការចាប់ខ្លួននេះ ធ្វើឡើងបន្ទាប់ពីលោកបានធ្វើអត្ថាធិប្បាយ និងចេញសេចក្តីថ្លែងការណ៍ជុំវិញបញ្ហាដីធ្លីរបស់ពលរដ្ឋក្នុងខេត្តត្បូងឃ្មុំ ដែលជាប់ពាក់ព័ន្ធជាមួយនឹងបញ្ហាព្រំដែនរវាងកម្ពុជា-វៀតណាម។
បន្ទាប់ពីការចាប់ខ្លួន លោក រ៉ុង ឈុន ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សង្គម និងចេញដីកាឱ្យឃុំខ្លួនបណ្ដោះអាសន្ននៅពន្ធនាគារព្រៃសរហូតដល់សព្វថ្ងៃនេះ។
គិតចាប់តាំងពីខែកក្កដា ឆ្នាំ២០២០ ដែលអាជ្ញាធរកម្ពុជា ឃុំខ្លួនលោក រ៉ុង ឈុន នៅមណ្ឌលអប់រំកែប្រែ «ម១» រហូតមកដល់ខែមិថុនា ឆ្នាំ២០២១ នេះ មានរយៈពេលប្រមាណជាង ១០ខែហើយ ក្រោយពេលដែលតុលាការពន្យារពេលបើកសវនាការក្រោមហេតុផលនៃការរីករាលដាលនៃជំងឺ Covid-19។
ច្បាប់ស្ដីពីការឃុំខ្លួនបណ្ដោះអាសន្ន មាត្រា១ ចែងថា ទោះស្ថិតក្នុងករណីណាក៏ដោយ ការឃុំខ្លួនបណ្ដោះអាសន្ននេះមិនឱ្យលើសពី ៤ខែឡើយ ប៉ុន្តែការសម្រេចរបស់ចៅក្រមដែលមានមូលហេតុច្បាស់លាស់ រយៈពេលនេះអាចបន្តឃុំខ្លួនដល់ ៦ខែបាន ប្រសិនបើមានការចាំបាច់ក្នុងការស៊ើបអង្កេត៕