នៅលើពិភពលោកនេះមានរឿងប្លែកៗជាច្រើនទៅលើមេដឹកនាំ។ មេដឹកនាំខ្លះត្រូវបានពលរដ្ឋនាំគ្នាដាក់បណ្ដាសាដោយសារទង្វើក្បត់ជាតិ និងកំហុសផ្សេងៗទៀត។ មេដឹកនាំខ្លះគឺយ៉ាងហោចណាស់ក៏ត្រូវបានពលរដ្ឋគប់ពងមាន់ស្អុយដាក់ ឬគប់ស្បែកជើង និងធ្វើបាតុកម្មដេញចុះពីតំណែង។ មេដឹកនាំខ្លះ ពលរដ្ឋខ្លួនឯងបន់ស្រន់ឱ្យតែអស់អំណាច។ តែក៏មានមេដឹកនាំខ្លះ ពលរដ្ឋយំសោកសម្រែកព្រោះតែស្ដាយមេដឹកនាំរូបនោះ។ ទាំងនេះសុទ្ធតែមានរឿងផ្សេងៗគ្នាកើតឡើងនៅលើពិភពលោក។
សម្រាប់ប្រធានាធិបតីបារាំង Emmanuel Macron មិនត្រូវបានពលរដ្ឋប្រទេសនេះដាក់បណ្ដាសាថាជាមេដឹកនាំក្បត់ជាតិនោះទេ ប៉ុន្តែមេដឹកនាំបារាំងវ័យក្មេងជាងគេនេះ រងមួយកំផ្លៀងយ៉ាងអាម៉ាស់ពីពលរដ្ឋខ្លួនឯង។
បណ្ដាញផ្សាយព័ត៌មាន CNN បានសរុបព្រឹត្តិការណ៍នេះដោយចុះផ្សាយថា ប្រធានាធិបតី Emmanuel Macron ត្រូវបានបុរសម្នាក់នៅក្នុងហ្វូងមហាជនទះកំផ្លៀង ខណៈដែលលោកបម្រុងនឹងនិយាយទៅកាន់សាធារណជនក្នុងដំណើរទស្សនកិច្ចនៅភាគអាគ្នេយ៍ប្រទេសបារាំង កាលពីថ្ងៃពុធ ទី៩ ខែមិថុនា។
នៅពេលដែលលោក Macron ដើរទៅកាន់ជួបសួរសុខទុក្ខពលរដ្ឋ ហើយចាប់ដៃបុរសម្នាក់នៅក្នុងហ្វូងមហាជន មួយរំពេចនោះ លោកត្រូវបានស្វាគមន៍ភ្លាមៗដោយការទះមួយកំផ្លៀងរបស់បុរសនោះ។
បុរសនោះពេលកំពុងកាន់ដៃខាងស្ដាំរបស់លោក Macron គឺបុរសនោះកាន់យ៉ាងជាប់ ហើយស្ទុះទះកំផ្លៀងថ្ពាល់ខាងឆ្វេងរបស់លោក Macron តែម្ដង ហើយស្រែកខ្លាំងនូវពាក្យថា “Macronie” ដែលជាសូរសព្ទប្រជាជនបារាំងនិយមប្រើក្នុងសង្គមបារាំងជំនាន់មុន ហើយពួកគេប្រើសម្រាប់តំណែងប្រធានាធិបតី Macron បច្ចុប្បន្ន។
ពេលនោះ អង្គរក្សរបស់លោក Macron ក៏ស្ទុះអន្តរាគមន៍យ៉ាងឆាប់រហ័ស ដោយបានចាប់បុរសនោះហើយការពារប្រធានាធិបតី។ ប៉ុន្តែលោក Macron ត្រូវមួយកំផ្លៀងទៅហើយ។ ទោះជាយ៉ាងណា លោក Macron នៅតែបន្តធ្វើទស្សនកិច្ចរបស់លោកដដែល។
មួយរំពេចមុនពេលលោក ម៉ាក្រុង រងការទះមួយកំផ្លៀង គឺគេឮសម្រែកពីជនល្មើសដែលបានស្រែកថា Montjoie Saint-Denis ដែលជាសម្រែកក្នុងពេលប្រយុទ្ធគ្នាកាលនៅក្នុងយុគមជ្ឈិមសម័យនៃប្រទេសបារាំងក្នុងរាជវង្ស Capetian ដែលគ្រប់គ្រងប្រទេសបារាំងពីសតវត្សរ៍ទី១០ ដល់សតវត្សរ៍ទី១៨។
Montjoie Saint-Denis គឺប្រៀបបានទៅនឹងបាវចនាមួយត្រូវបានគេស្គាល់ជាទូទៅនៅប្រទេសបារាំង ថាជាខ្សែភាពយន្តបែបកំប្លែងផង និងបែបរវើរវាយផងហើយ ត្រូវបានសម្ដែងម្ដងទៀតឆ្នាំ១៩៩៣ ដែលមានចំណងជើងថា «Les Visiteurs»។
ខ្សែភាពយន្តនេះរំឭកអំពីរឿងរ៉ាវសតវត្សរ៍ទី៩ និងទី១២ និងរំឭកមន្តអាគមរបស់បុរសខ្លាំងក្នុងសាច់រឿងនោះ។ ប៉ុន្តែដោយសារតែពេលវេលា គឺរឿងនេះក៏បានរសាត់បាត់នៅក្នុងសង្គមទំនើបនេះ។
បុរសអាយុ ២៨ឆ្នាំ ២នាក់ គឺជនដៃដល់ដែលបានរួមគំនិតគ្នាទះកំផ្លៀងលោក ម៉ាក្រុង និងម្នាក់ទៀតដែលនៅជាមួយបុរសរូបនោះ ត្រូវបានចាប់ខ្លួនយកទៅឃុំនៅប៉ុស្តិ៍ប៉ូលិសនៅប៉ុន្មាននាទីក្រោយមក។
ការិយាល័យរដ្ឋអាជ្ញានៃទីក្រុង Valence បានប្រាប់ទូរទស្សន៍ CNN ថា ជនដៃដល់ត្រូវបានចោទពីបទប្រើអំពើហិង្សាប្រឆាំងនឹងបុគ្គលដែលកាន់អំណាចសាធារណៈ។ ជនសង្ស័យពេលនេះត្រូវដាក់ឱ្យស្ថិតក្រោមការស៊ើបអង្កេតតាមបទចោទពីបទរំលោភអ្នកមានអំណាចសាធារណៈ គឺបុគ្គលនោះអាចជាប់ពន្ធនាគាររយៈពេល ៣ឆ្នាំ និងពិន័យជាប្រាក់ ៤ម៉ឺន ៥ពាន់អឺរ៉ូ ឬជិត ៥ម៉ឺន ៥ពាន់ដុល្លារ។
បុរសទីមួយដែលទះកំផ្លៀងប្រធានាធិបតី ត្រូវបានគេជឿថាមានមាននិន្នាការស្តាំនិយម និងជាមនុស្សបែបរាជានិយម ងប់ងុលនឹងរឿងរ៉ាវប្រវត្តិសាស្ត្របារាំង និងមន្តអាគមនៅយុគសម័យកណ្ដាល។
នៅលើទំព័រ Instagram របស់បុរសរូបនោះ បានពណ៌នាខ្លួនលោកថាជាផ្នែកមួយនៃសហព័ន្ធជាតិនៃសិល្បៈក្បាច់គុនអឺរ៉ុបតាំងពីបុរាណកាល។ លោកតែងតែបង្ហោះរូបភាពសម្លៀកបំពាក់ពីយុគសម័យកណ្តាល ហើយមានកាន់ដាវវែងមួយជានិមិត្តរូបនៃអំណាចអាណាចក្រ។
ភ្លាមៗមុនពេលកើតហេតុ គឺលោក ម៉ាក្រុង បានឈរនៅក្បែរបុរសពីរនាក់ផ្សេងទៀតក្នុងពេលលោកធ្វើបទសម្ភាសន៍ជាមួយទូរទស្សន៍ដែលក្នុងនោះមានម្នាក់និយាយថា មានរឿងជាច្រើនដែលយើងចង់និយាយទៅលោក ម៉ាក្រុង។
ផ្ទះរបស់ជនសង្ស័យទាំងពីរត្រូវបានគេដឹងថាស្ថិតនៅក្នុងភូមិមួយនៅភាគខាងជើងនៃសង្កាត់ Tain-l’Hermitage។ ចំណែកជនសង្ស័យទី២ ត្រូវបានគេរាយការណ៍ថាជាមនុស្សស្រឡាញ់ងប់ងុលនៃក្បាច់គុនក្នុងការប្រយុទ្ធនៅយុគមជ្ឈិមសម័យ។
នៅតាមបណ្តេញសង្គម Facebook និង Twitter មនុស្សម្នាក់ៗបង្ហោះសារជេរប្រមាថគ្នា រើសអើងប្រកាន់ពូជសាសន៍ និងមាក់ងាយមកលើថ្នាក់ដឹកនាំប្រទេស។ ជាមួយគ្នានេះ លោក Jean Castex នាយករដ្ឋមន្ត្រីបារាំង បានប្រកាសថា អ្នកនយោបាយក៏ដូចជាពលរដ្ឋបារាំងទាំងអស់ ត្រូវតែស្ទុះឡើងការពារស្ថាប័នកំពូលរបស់រដ្ឋ ដែលជាសសរទ្រូងនៃលទ្ធិប្រជាធិបតេយ្យ។ លោកថាលទ្ធិប្រជាធិបតេយ្យ គឺជាការតស៊ូមតិ មិនមែនស្តែងឡើងតាមរយៈអំពើហិង្សានោះទេ។
ចំណែកមេដឹកនាំស្តាំនិយមឈ្មោះ Marine Le Pen ដែលជាគូប្រជែងនយោបាយដ៏ធំបំផុតរបស់លោក Macron បាននិយាយថាការវាយប្រហារមកលើរូបកាយរបស់ប្រធានាធិបតី គឺមិនអាចទទួលយកបានឡើយ។ អ្នកស្រី Marine Le Pen បានបន្ថែមថា យើងអាចវាយប្រហារគាត់លើឆាកនយោបាយ ប៉ុន្តែអំពើហិង្សាណាមួយប្រឆាំងនឹងបុគ្គល ត្រូវថ្កោលទោសនៅក្នុងសង្គមប្រជាធិបតេយ្យ។
លោក Macron ស្ថិតនៅក្នុងតំបន់នោះដើម្បីជួបម្ចាស់ភោជនីយដ្ឋាននានា មុនការបន្ធូរបន្ថយការរឹតត្បិតប្រទេសដោយសារតែការវាយលុកនៃជំងឺកូវីដ១៩។
បច្ចុប្បន្ន លោក Macron កំពុងធ្វើឱ្យមានការចាប់អារម្មណ៍យ៉ាងខ្លាំងដោយការបោះឆ្នោតប្រធានាធិបតីបារាំង នឹងត្រូវធ្វើឡើងមិនដល់មួយឆ្នាំទៀតនោះទេ ហើយប្រទេសនេះនៅសល់តែ ១០ថ្ងៃទៀតប៉ុណ្ណោះនឹងមានព្រឹត្តិការណ៍បោះឆ្នោតក្នុងតំបន់ គឺនៅថ្ងៃទី២០ និង ២៧ ខែមិថុនា នេះ។
កាលពីចុងខែមេសា ប្រធានាធិបតីម៉ាក្រុង បានប្រាប់សារព័ត៌មានថាលោកចង់ទៅតំបន់ឆ្ងាយៗដើម្បីទាក់ទងជាមួយប្រជាជន។ តែក្រុមអ្នកប្រឆាំងនយោបាយរបស់លោកនិយាយថា ការចេញទៅក្រៅក្រុងរបស់ប្រធានាធិបតីនៅពេលនេះ គឺជាការធ្វើយុទ្ធនាការឃោសនាបោះឆ្នោតតែប៉ុណ្ណោះ។ តែយ៉ាងណា លោក ម៉ាក្រុង មិនមែនជាអ្នកនយោបាយបារាំងដំបូងគេដែលត្រូវបានរងការទះកំផ្លៀងពេលទៅជួបពលរដ្ឋនោះទេ គឺកាលពីខែមករា ឆ្នាំ២០១៧ អតីតនាយករដ្ឋមន្ត្រី Manuel Valls ក៏ត្រូវបានពលរដ្ឋទះកំផ្លៀងដូចគ្នានេះដែរ គឺនៅពេលដែលលោកទៅទស្សនាទីក្រុង Lamballe នៅ Brittany។
លោក Manuel Valls ធ្លាប់ធ្វើជានាយករដ្ឋមន្ត្រីនៅចន្លោះឆ្នាំ២០១៤ និង ២០១៦ ក្រោមការដឹកនាំរបស់លោកប្រធានាធិបតី Francois Hollande៕