យុវជន និងក្រុមអង្គការសង្គមស៊ីវិលបាននាំគ្នាធ្វើយុទ្ធនាការលើបណ្ដាញសង្គម ដោយទាមទារឱ្យទម្លាក់បទចោទ និងដោះលែងសកម្មជនបរិស្ថាន ដោយថាភាពសកម្មនិយមក្នុងកិច្ចការពារបរិស្ថាន និងធនធានធម្មជាតិមិនមែនជាសកម្មភាពខុសច្បាប់។
អង្គការសង្គមស៊ីវិលដែលធ្វើយុទ្ធនាការលើបណ្ដាញសង្គមហ្វេសប៊ុក ដោយលើកជាបដាសរសេរពាក្យ «ខ្ញុំស្រឡាញ់បរិស្ថាន និងភ្ជាប់ជាមួយឈ្មោះសកម្មជនបរិស្ថានទាំង ៦នាក់» ហើយថា ភាពសកម្មនិយមក្នុងកិច្ចការពារបរិស្ថាន និងធនធានធម្មជាតិ មិនមែនជាសកម្មភាពខុសច្បាប់នោះទេ។ ជាងនេះទៅទៀត អង្គការសង្គមស៊ីវិលអំពាវនាវឱ្យមានការចូលរួមក្នុងកិច្ចការពារបរិស្ថាន និងជួយគាំទ្រដល់អ្នកការពារបរិស្ថានដែលកំពុងជាប់ឃុំផងដែរ។
ក្រុមអង្គការសង្គមស៊ីវិលដែលធ្វើយុទ្ធនាការនេះ មានដូចជាអង្គការលីកាដូ មជ្ឈមណ្ឌលសិទ្ធិមនុស្សកម្ពុជា ហៅកាត់ CCHR សមាគមបណ្ដាញយុវជនកម្ពុជា (CYN) និងអង្គការសមធម៌កម្ពុជា ជាដើម។
មិនមែនតែអង្គការសង្គមស៊ីវិលទេ ក៏មានយុវជនមួយចំនួនបានចូលរួមធ្វើយុទ្ធនាការនេះដែរ ដោយអ្នកខ្លះបានសរសេរលើបណ្ដាញសង្គមហ្វេសប៊ុក ទាមទារឱ្យទម្លាក់បទចោទប្រកាន់ និងដោះលែងសកម្មជនបរិស្ថាន និងអ្នកខ្លះទៀតបានចែករំលែកបន្តដោយភ្ជាប់ជាមួយពាក្យ «ខ្ញុំស្រឡាញ់បរិស្ថាន គ្មានកំហុសទេ។ សូមដោះលែងសកម្មជនបរិស្ថាន»។
មន្ត្រីគម្រោងតស៊ូមតិនៃគម្រោងអ្នកការពារព្រៃឈើ នៃសមាគមបណ្ដាញយុវជនកម្ពុជា លោក សាន់ ម៉ាឡា លើកឡើងថា ការធ្វើយុទ្ធនាការនេះដើម្បីជួយលើកទឹកចិត្តដល់សកម្មជនបរិស្ថានដែលកំពុងជាប់ឃុំនៅពន្ធនាគារ ដោយសារការខិតខំចូលរួមការពារបរិស្ថាន និងធនធានធម្មជាតិ។
លោកបន្តថា ការទាមទារឱ្យទម្លាក់បទចោទ និងដោះលែងសកម្មជនបរិស្ថានឱ្យមានសេរីភាពវិញ ដោយសារសកម្មភាពរបស់ពួកគាត់ធ្វើកន្លងមកដើម្បីការពារផលប្រយោជន៍សង្គមជាតិ ហើយសកម្មភាពទាំងនេះមិនមែនជាបទឧក្រិដ្ឋ និងអំពើញុះញង់ដែលបង្កឱ្យមានភាពវឹកវរ និងខូចខាតដល់ផលប្រយោជន៍សង្គមជាតិឡើយ។
លោក សាន់ ម៉ាឡា ចាត់ទុកការធ្វើទុក្ខបុកម្នេញដោយការចាប់ខ្លួន និងច្បាប់ក្រមព្រហ្មទណ្ឌអនុវត្តលើសកម្មជនបរិស្ថានមិនបានចំណេញអ្វីដល់រដ្ឋាភិបាលឡើយ។ ផ្ទុយទៅវិញ វិធានការនេះនឹងធ្វើឱ្យកេរ្តិ៍ឈ្មោះរបស់រដ្ឋាភិបាលកាន់តែអាក្រក់ទៅ ហើយកម្ពុជានឹងរងសម្ពាធពីសហគមន៍អន្តរជាតិកាន់តែច្រើនឡើង។
ចៅក្រមស៊ើបសួរសាលាដំបូងរាជធានីភ្នំពេញ បានចោទប្រកាន់សកម្មជនបរិស្ថាន ៣នាក់ រួមមានយុវជន លី ចាន់ដារ៉ាវុទ្ធ យុវជន យឹម លាងហ៊ី និងកញ្ញា ស៊ុន រដ្ឋា ព្រមទាំងស្ថាបនិកចលនាមាតាធម្មជាតិ លោក អាឡិច ហ្គន់សាឡេស ដេវីតសុន (Alejandro Gonzalez Davidson) ពីបទ «រួមគំនិតក្បត់» និង «ប្រមាថអង្គព្រះមហាក្សត្រ»។
សកម្មជនបរិស្ថាន យុវជន លី ចាន់ដារ៉ាវុទ្ធ យុវជន យឹម លាងហ៊ី និងកញ្ញា ស៊ុន រដ្ឋា ត្រូវបានបញ្ជូនទៅឃុំខ្លួននៅពន្ធនាគារព្រៃស បន្ទាប់ពីត្រូវបានចាប់ខ្លួនកាលពីថ្ងៃទី១៦ ខែមិថុនា ឆ្នាំ២០២១ អំឡុងពេលពួកគេចុះថតវីដេអូទឹកស្អុយហូរចូលទន្លេនៅម្តុំមុខព្រះបរមរាជវាំង។
ចាប់ពីខែកញ្ញា ឆ្នាំ២០២០ មក មានសកម្មជនចលនាមាតាធម្មជាតិចំនួន ៦នាក់ ត្រូវបានចោទប្រកាន់ និងឃុំខ្លួននៅពន្ធនាគារ ក្នុងនោះយុវជន លី ចាន់ដារ៉ាវុទ្ធ យុវជន យឹម លាងហ៊ី និងកញ្ញា ស៊ុន រដ្ឋា លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី។ ការចោទប្រកាន់ និងឃុំខ្លួនសកម្មជនបរិស្ថាននៅពន្ធនាគារ ធ្វើឡើងបន្ទាប់ពីពួកគេចូលរួមយ៉ាងសកម្មក្នុងកិច្ចការពារបរិស្ថាន និងធនធានធម្មជាតិនៅកម្ពុជា។
ក្រោយពីមានការចោទប្រកាន់ និងឃុំខ្លួនសកម្មជនបរិស្ថានទាំង ៣នាក់នោះ ក៏មានប្រតិកម្មជាច្រើនពីសាធារណជន អង្គការសង្គមស៊ីវិលជាតិ និងអន្តរជាតិ រួមទាំងស្ថានទូតធំៗប្រចាំនៅកម្ពុជា ក្នុងនោះស្ថានទូតអាមេរិក ស្ថានទូតស៊ុយអែត និងអូស្ត្រាលី ជាដើម ដោយពួកគេទាមទារឱ្យរដ្ឋាភិបាលដោះលែង និងទម្លាក់ចោលបទចោទប្រកាន់ទៅលើយុវជនបរិស្ថានទាំងនោះឱ្យមានសេរីភាពឡើងវិញ៕