លោក ហ៊ុន សែន បានប្រតិកម្មខ្លាំងៗថា ក្រសួងសុខាភិបាលជាប់អារម្មណ៍អភិរក្សនិយម មិនព្រមបញ្ចេញឧបករណ៍តេស្ដរហ័សទៅតាមបណ្តាខេត្តដើម្បីទប់ស្កាត់ជំងឺ Covid-19 ខណៈជំងឺ Covid-19បំប្លែងខ្លួនប្រភេទថ្មី DELTA កំពុងឆ្លងចូលកម្ពុជាទៅហើយនោះ។
ការព្រមាននេះ ធ្វើឡើងក្នុងកម្មវិធីផ្សាយផ្ទាល់ពិសេសដើម្បីដោះស្រាយបញ្ហាជំងឺ Covid-19 ដែលកំពុងរីករាលដាលនៅកម្ពុជា តាមប្រព័ន្ធវីដេអូនៅថ្ងៃព្រហស្បតិ៍ សប្តាហ៍នេះ។
លោក ហ៊ុន សែន នៅថ្ងៃទី១ ខែកក្កដា ឆ្នាំ២០២១ នេះបានប្រតិកម្មខ្លាំងៗចំពោះរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងរដ្ឋលេខាធិការក្រសួងសុខាភិបាល អ្នកស្រី យក់ សម្បត្តិ យ៉ាងចាស់ដៃថា ក្រសួងសុខាភិបាលត្រូវមានការទទួលខុសត្រូវឲ្យបានច្បាស់លាស់ ព្រោះថាបរិក្ខារសុខាភិបាលមិនមែនយកមកដេកឱបនោះទេ ប៉ុន្តែត្រូវបញ្ជូនទៅតាមបណ្តាខេត្តដើម្បីប្រើប្រាស់ឲ្យបានទាន់ពេលវេលា។
លោកអះអាងថា កម្ពុជាមិនខ្វះលុយនោះទេ ដូច្នេះក្រសួងសុខាភិបាលត្រូវពិនិត្យមើលកិច្ចការរបស់ខ្លួនថា តើក្រសួងមានតម្រូវការអ្វីបន្ថែមទៀត ដើម្បីទប់ស្កាត់នូវការឆ្លងរាលដាលនៃជំងឺ Covid-19 នេះឲ្យមានប្រសិទ្ធភាព ព្រោះថារដ្ឋាភិបាលរបស់លោកមិនទាន់ខ្វះលុយដល់កម្រិតដួលរលំដោយសារជំងឺ Covid-19 ក្នុងរយៈពេលជិត ២ឆ្នាំកន្លងមកនេះទេ។
លោក ហ៊ុន សែន បញ្ជាក់ថា តើមន្ត្រីសុខាភិបាលទាំងនោះធ្វើជាមន្ត្រីបច្ចេកទេសរបៀបម៉េច ព្រោះការងារកន្លងមកទាល់តែលោកបញ្ជាបាននាំគ្នាធ្វើ លោកបញ្ជាម្តងធ្វើការម្តង លោកបញ្ជាពីរដងធ្វើការពីរដងបែបនេះ។
លោកគូសបញ្ជាក់ថា ការពិនិត្យ និងធ្វើតេស្ដបានកាន់តែឆាប់ គឺអាចគ្រប់គ្រងការឆ្លងនៃជំងឺនេះបានកាន់តែលឿន ហេតុអ្វីមន្ត្រីសុខាភិបាលទាំងនោះធ្វើការយូរហើយមិនយល់ពីបញ្ហានេះ។
បែបនេះក្តី អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១ ខែកក្កដា នេះថា លោក ហ៊ុន សែន យកនយោបាយមុខមាត់ខ្លួនឯងទៅសង្កត់បច្ចេកទេសសុខាភិបាល ប៉ុន្តែបែរទម្លាក់កំហុសលើក្រសួងសុខាភិបាលដែលគាត់មិនផ្ដល់អំណាចឲ្យចាត់ចែងការងារនោះទាំងស្រុងទៅវិញ។
លោកអះអាងថា ក្នុងការចែកចាយបរិក្ខារសុខាភិបាលនេះ លោក ហ៊ុន សែន មិនគួរបន្ទោសទៅលើក្រសួងសុខាភិបាលទាំងស្រុងបែបនេះទេ ព្រោះថាការទទួលខុសត្រូវលើកិច្ចការនេះ គឺស្ថិតលើខ្លួនផ្ទាល់តែម្តង ត្បិតលោក ហ៊ុន សែន គឺជាប្រធានគណៈកម្មការជាតិប្រយុទ្ធនឹងជំងឺ Covid-19 ខណៈរដ្ឋមន្ត្រីក្រសួងសុខាភិបាល លោក ម៉ម ប៊ុនហេង គ្រាន់តែជាអនុប្រធាននៃគណៈកម្មការនេះប៉ុណ្ណោះ។
លោក គឹម សុខ បញ្ជាក់ថា តាមលោកសង្កេតកន្លងមក បរិក្ខារបច្ចេកទេសសុខាភិបាលដែលទាក់ទងនឹងការព្យាបាលជំងឺ Covid-19 គឺត្រូវបានគ្រប់គ្រងដោយក្រសួងសុខាភិបាល ប៉ុន្តែនៅក្រោមឥទ្ធិពលជំនួញក្រុមគ្រួសារត្រកូល ហ៊ុន ជាពិសេសគឺស្ថិតក្រោមការគ្រប់គ្រងរបស់លោក ហ៊ុន ម៉ាណែត និងភរិយារបស់គាត់តែម្តង។ ដូច្នេះ ការចែកចាយបរិក្ខារសុខាភិបាលដែលប៉ះពាល់ប្រយោជន៍គ្រួសារត្រកូល ហ៊ុន គឺច្បាស់ជាមន្ត្រីទាំងនោះមិនហ៊ានសម្រេចនោះទេ។
លោកគូសបញ្ជាក់ថា លោក ហ៊ុន សែន សម្រេចចិត្តខុសដោយខ្លួនតាំងពីជំហានដំបូងមកម្ល៉េះ ព្រោះថាគាត់មានគំនិតទុច្ចរិតប្រើឱកាសជំងឺ Covid-19 ដើម្បីជាប្រយោជន៍មុខមាត់នយោបាយរបស់គាត់ផង និងប្រមូលលុយពីការរីករាលដាលនៃជំងឺនេះផង ប៉ុន្តែនៅពេលដែលស្ថានការណ៍ជ្រុលហួស គាត់បែរជាទម្លាក់កំហុសទៅលើអ្នកដទៃ ឬក្រសួងសុខាភិបាលដូចក្នុងពេលនេះជាដើម។
កាលពីថ្ងៃទី១៤ ខែមិថុនា ឆ្នាំ២០២១ ប្រមុខរដ្ឋាភិបាលកម្ពុជា បានចេញសេចក្តីសម្រេចបង្កើតគណៈកម្មការជាតិប្រយុទ្ធនឹងជំងឺ Covid-19 ដែលមានលោក ហ៊ុន សែន ជាប្រធាន លោក ស ខេង លោក ទៀ បាញ់ លោក ប៊ិន ឈិន ជាអនុប្រធាន ចំណែកលោក អូន ព័ន្ធមុនីរ័ត្ន ជាអនុប្រធានប្រចាំការ និងលោក ម៉ម ប៊ុនហេង ជាអនុប្រធានផងដែរ។
ជុំវិញការឆ្លងវីរុស Covid-19 នេះ ក្រសួងសុខាភិបាលបានអះអាងនៅថ្ងៃទី១ ខែកក្កដា ឆ្នាំ២០២១ នេះថា ខ្លួនរកឃើញអ្នកឆ្លងវីរុស Covid-19 ថ្មីចំនួន ៩៩៩នាក់ និងអ្នកជាសះស្បើយថ្មីចំនួន ៧១៥នាក់ ខណៈអ្នកស្លាប់ថ្មីមានចំនួន ២៦នាក់។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ៥ម៉ឺន ១ពាន់នាក់ហើយ និងអ្នកដែលជាសះស្បើយសរុបមានចំនួនជាង ៤ម៉ឺន ៤ពាន់នាក់ ដោយឡែកអ្នកស្លាប់សរុបបានកើនឡើងដល់ ៦២៨នាក់ហើយនៅពេលនេះ៕