យ៉ាងហោចណាស់មានអ្នកជំងឺចំនួនជាង ៨០នាក់បានស្លាប់ដោយជំងឺកូវីដ-១៩ ដែលចំនួននេះខ្ពស់មិនធ្លាប់មានចាប់តាំងពីផ្ទុះព្រឹត្តិការណ៍សហគមន៍ ២០ កុម្ភៈ ខណៈអ្នកឆ្លងជំងឺនេះក៏មិនមានការថយចុះដែរ។
របាយការណ៍របស់ក្រសួងសុខាភិបាល បានឱ្យដឹងថា ចាប់ពីថ្ងៃទី២៩ ខែមិថុនា ដល់ថ្ងៃទី១ ខែកក្កដា ឆ្នាំ២០២១ អ្នកស្លាប់ដោយសារជំងឺកូវីដ-១៩ បានកើនឡើងជាបន្តបន្ទាប់ ពោលគឺចាប់ពី ២០នាក់រហូតដល់ជាង ៣០នាក់។
ជាក់ស្ដែង សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២ ខែកក្កដា ឆ្នាំ២០២១ បានឱ្យដឹងថា អ្នកជំងឺកូវីដ-១៩ ចំនួន ៣២នាក់បន្ថែមទៀតបានស្លាប់កាលពីម្សិលមិញ ដែលធ្វើឱ្យចំនួនអ្នកស្លាប់ក្នុងរយៈពេល ៣ថ្ងៃនេះកើនដល់ ៨៥នាក់។
ក្រៅពីអ្នកស្លាប់កើននោះ ចំនួនអ្នកឆ្លងជំងឺកូវីដ-១៩ ក៏មិនថយចុះដែរ ដោយកាលពីម្សិលមិញក្រសួងបានរកឃើញអ្នកឆ្លងថ្មីចំនួន ៩៦៦នាក់ ខណៈអ្នកជាសះស្បើយថ្មី ៦៥០នាក់។
ក្នុងកិច្ចប្រជុំពិសេសមួយតាមប្រព័ន្ធវីដេអូជាមួយគណៈកម្មការជាតិប្រយុទ្ធប្រឆាំងនឹងជំងឺកូវីដ-១៩ ដើម្បីពិភាក្សា និងដោះស្រាយបញ្ហាជំងឺផ្លូវដង្ហើមនៅថ្ងៃទី១ ខែកក្កដា ឆ្នាំ២០២១ លោក ហ៊ុន សែន បញ្ជាទៅអភិបាលរាជធានី-ខេត្ត និងក្រសួងសេដ្ឋកិច្ច និងហិរញ្ញវត្ថុ បញ្ចេញថវិកាទិញក្តារមឈូសយកទុកសម្រាប់ដាក់សាកសពអ្នកដែលស្លាប់ដោយសារជំងឺកូវីដ-១៩។
ជាងនេះទៅទៀត លោក ហ៊ុន សែន ក៏បានប្រាប់ទៅមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ឱ្យប្រមូលឈើដែលបង្ក្រាបបានពីបទល្មើសមកធ្វើជាក្តារមឈូសសម្រាប់ដាក់សពអ្នកស្លាប់ដោយសារជំងឺកូវីដ-១៩ ផងដែរ។
មន្ត្រីជាន់ខ្ពស់ក្រសួងសុខាភិបាល លោកស្រី ឱ វណ្ណឌីន បានលើកឡើងកាលពីពេលថ្មីៗថា កម្ពុជាបច្ចុប្បន្នបានដើរដល់បន្ទាត់ក្រហមហើយ ក្រោយពីកន្លែងសង្គ្រោះបន្ទាន់ព្យាបាលអ្នកជំងឺកូវីដ-១៩ កម្រិតធ្ងន់បានពេញសឹងគ្រប់កន្លែងទាំងអស់ ខណៈចំនួនអ្នកឆ្លងបានកើនឡើងជារៀងរាល់ថ្ងៃផងដែរ។
បើតាមក្រសួងសុខាភិបាល គិតត្រឹមថ្ងៃទី២ ខែកក្កដា ឆ្នាំ២០២១ នេះ កម្ពុជារកឃើញអ្នកឆ្លងជំងឺកូវីដ-១៩ សរុប ៥២៣៥០នាក់ ក្នុងនោះករណីនាំចូលពីក្រៅប្រទេស ២៨៧២នាក់ ខណៈជាសះស្បើយមានចំនួន ៤៥៥០៨នាក់ និងមានអ្នកស្លាប់សរុប ៦៦០នាក់៕