ក្រសួងសុខាភិបាល និងរដ្ឋបាលរាជធានីភ្នំពេញ បានប្រកាសបិទបញ្ចប់យុទ្ធនាការចាក់វ៉ាក់សាំងបង្ការជំងឺ Covid-19 សម្រាប់ភូមិសាស្ត្ររាជធានីភ្នំពេញ នៅថ្ងៃទី០៨ ខែកក្កដា ឆ្នាំ២០២១ ដោយយុទ្ធនាការចាក់វ៉ាក់សាំងនេះ នឹងបន្តធ្វើនៅតាមបណ្ដាខេត្តគោលដៅផ្សេងទៀត។
លោក ឃួង ស្រេង អភិបាលរាជធានីភ្នំពេញបានថ្លែងថា ក្នុងយុទ្ធនាការចាក់វ៉ាក់សាំងនេះ ប្រជាពលរដ្ឋក្នុងរាជធានីភ្នំពេញប្រមាណ ១លាន ៧សែននាក់បានទទួលវ៉ាក់សាំង ហើយមិនមានពលរដ្ឋណាម្នាក់គ្រោះថ្នាក់ ឬប៉ះពាល់អាយុជីវិតដោយសារចាក់វ៉ាក់សាំងបង្ការជំងឺ Covid-19 នោះឡើយ។
អ្នកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង Covid-19 បានថ្លែងឲ្យដឹងថា យុទ្ធនាការចាក់វ៉ាក់សាំងនេះបានចាប់ផ្ដើមឡើងនៅថ្ងៃទី១០ ខែកុម្ភៈ ឆ្នាំ២០២១ ហើយមកទល់ថ្ងៃទី៧ ខែកក្កដា អ្នកដែលបានស្ម័គ្រចិត្តមកចាក់វ៉ាក់សាំងនៅក្នុងរាជធានីភ្នំពេញសរុបចំនួនជាង ២លាននាក់ (២.១៥២.៥៩៥) ក្នុងនោះមានប្រមាណ ២ម៉ឺននាក់មិនបានចាក់វ៉ាក់សាំង ដោយសារបញ្ហាសុខភាពផ្ទាល់ខ្លួន។
អ្នកស្រីបានបញ្ជាក់ទៀតថា ក្នុងអំឡុងពេលយុទ្ធនាការចាក់វ៉ាក់សាំង គឺពលរដ្ឋបានមកចាក់វ៉ាក់សាំងលើសចំនួនប្រជាជនសរុបនៅក្នុងរាជធានីភ្នំពេញ ដែលករណីនេះបញ្ជាក់ថា មានពលរដ្ឋធ្វើដំណើរមកពីបណ្ដាខេត្តផ្សេងៗមកចាក់វ៉ាក់សាំងនៅភ្នំពេញ។
ទោះយ៉ាងណា លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ថា នៅខែសីហា ឆ្នាំ២០២១ ខាងមុខនេះ កម្ពុជានឹងទទួលបានវ៉ាក់សាំងគ្រប់ចំនួន ២០លានដូសដូចដែលរដ្ឋាភិបាលបានកំណត់ដើម្បីចាក់ជូនពលរដ្ឋខ្មែរនាពេលកន្លងមក។
ទាក់ទងនឹងករណីរីករាលដាលនៃជំងឺ Covid-19 គិតត្រឹមថ្ងៃទី៨ ខែកក្កដា ឆ្នាំ២០២១ ក្រសួងសុខាភិបាល ឱ្យដឹងថា អ្នកស្លាប់ដោយជំងឺ Covid-19 កាលពីថ្ងៃម្សិលមិញ មានចំនួន ២៧នាក់ និងករណីឆ្លងថ្មីមានចំនួន ៩៥៤នាក់ ស្របពេលអ្នកជាសះស្បើយថ្មីមានចំនួនជាង ១ពាន់នាក់ (១០៤៦)។
បើតាមក្រសួងសុខាភិបាល គិតត្រឹមព្រឹកថ្ងៃទី០៨ ខែកក្កដា ឆ្នាំ២០២១ កម្ពុជាបានរកឃើញអ្នកឆ្លងជំងឺ Covid-19 សរុបចំនួនជិត ៦ម៉ឺននាក់ (៥៨.០៥៧) ក្នុងនោះអ្នកជំងឺព្យាបាលជាសះស្បើយសរុបចំនួនជាង ៥ម៉ឺននាក់ (៥០.០២០) និងអ្នកស្លាប់សរុប ៨២៥នាក់៕