ប្រជាសហគមន៍ព្រៃឡង់ខេត្តព្រះវិហារ ចោទក្រុមហ៊ុនវៀតណាម ភីអ៊ិនធី (PNT) ថាប្រើកម្លាំងកម្មករកាប់ឈើមូលធំៗក្នុងព្រៃឡង់យ៉ាងរង្គាល បានរាលដាលដល់តំបន់ស្នូលដែលក្រសួងកំណត់តំបន់នោះថាជាមរតកជាតិដ៏សំខាន់ក្នុងដែនអភិរក្សនេះ។
ពលរដ្ឋថាប្រភេទឈើដែលក្រុមហ៊ុនបានកាប់ទាំងនោះ ភាគច្រើនដើមស្រឡៅ គគីរ និងដើមច្បោះ កំពុងទទួលរងការកាប់បំផ្លិចបំផ្លាញជាប្រព័ន្ធ ដោយគ្មានការរារាំងពីមន្ត្រីឧទ្យានុរក្សរបស់ក្រសួងបរិស្ថាន។
ប្រជាសហគមន៍ព្រៃឡង់ខេត្តព្រះវិហារ ដែលសុំមិនបញ្ចេញឈ្មោះ បានថ្លែងឱ្យដឹងនៅថ្ងៃទី១៥ ខែកក្កដា ថា ក្រុមល្បាតសហគមន៍មានគ្នា ៩នាក់បានប្រថុយចុះល្បាតព្រៃឡង់រយៈពេល ៥ថ្ងៃ និង ៤យប់ កាលពីសប្តាហ៍មុន ដោយរកឃើញដើមឈើធំៗត្រូវគេអាររំលំនៅសល់តែគល់ ស្ថិតនៅចំណុចអូរអាចម៍ដែក និងចំណុចប្រាសាទគោល ក្នុងតំបន់ស្នូលព្រៃឡង់ គ្រប់គ្រងដោយក្រសួងបរិស្ថាន។
ប្រភពដដែលឲ្យដឹងទៀតថា បេសកកម្មនេះ សហគមន៍រកឃើញបទល្មើសព្រៃឈើជាង ៣៦៣ករណី ដែលជាបទល្មើសទើបកើតឡើងថ្មីៗ។
រីឯឆ្មាំអភិរក្សរបស់ក្រសួងបរិស្ថាន បានដឹងរឿងរ៉ាវនេះដែរ ប៉ុន្តែពួកគេមិនហ៊ានអនុវត្តច្បាប់នោះទេ ដោយខ្លាចក្រែងឥទ្ធិពលក្រុមហ៊ុនវៀតណាម ភីអ៊ិនធី ដែលមានអ្នកមានអំណាចនៅពីក្រោយខ្នង។
សកម្មជនព្រៃឡង់រូបនេះបន្ថែមថា បទល្មើសព្រៃឈើទាំងនេះកើតឡើងជាច្រើនខែមកហើយដោយមានមន្ត្រីអាវុធហត្ថម្នាក់ជាមេការរបស់ក្រុមហ៊ុននេះ ដើម្បីបម្រើឱ្យអាជីវកម្មឈើខ្នាតធំនេះប្រព្រឹត្តទៅយ៉ាងរលូន។
ក្រុមហ៊ុន ភីអ៊ិនធី (PNT Co., Ltd.) ទទួលបានដីសម្បទានសេដ្ឋកិច្ចពីរដ្ឋាភិបាលទំហំជិត ៨ពាន់ហិកតារ (៧៩០០ហិកតារ) នៅស្រុករវៀង ខេត្តព្រះវិហារ កាលពីឆ្នាំ២០១០ ក្រោមកិច្ចសន្យារយៈពេល ៧០ឆ្នាំ។ ក្នុងកិច្ចសន្យា ក្រុមហ៊ុននេះវិនិយោគដំណាំខ្លឹមចន្ទន៍ ចន្ទី និងដំណាំរួមផ្សំផ្សេងៗទៀត ប៉ុន្តែក្រុមហ៊ុនមិនបានដាំដុះតាមកិច្ចសន្យានោះទេ ដោយសម្រុកកាប់ឈើ និងធ្វើអាជីវកម្មឈើដឹកចេញពីព្រៃឡង់មកផ្គត់ផ្គង់ដេប៉ូអារឈើរបស់ខ្លួន។ ក្រុមហ៊ុនមានម៉ាស៊ីនអារច្រៀកឈើខ្នាតធំ ៤គ្រឿងស្ថិតក្នុងស្រុករវៀង ជាប់ព្រៃឡង់ខេត្តព្រះវិហារ។
ទន្ទឹមនឹងនេះ កាលពីចុងខែឧសភា អ្នកភូមិប្រទះឃើញគំនរឈើមូលរាប់ពាន់ម៉ែត្រគូបក្បែរការដ្ឋានរបស់ក្រុមហ៊ុនវៀតណាម ភីអ៊ិនធី ហើយឈើទាំងនោះត្រូវបានគេដឹកចេញពីតំបន់ស្នូលព្រៃឡង់ចូលការដ្ឋានក្រុមហ៊ុនវៀតណាមមួយនេះ។
អ្នកសារព័ត៌មានរបស់ The Cambodia Dialy មិនទាន់អាចទាក់ទងសុំការបំភ្លឺរឿងនេះពីមេការក្រុមហ៊ុន ភីអ៊ិនធី លោក ចាប សារ៉ន និងអ្នកនាំពាក្យក្រសួងបរិស្ថាន លោក នេត្រ ភក្ដ្រា បានទេនៅថ្ងៃទី១៥ ខែកក្កដា។ ចំណែកអភិបាលខេត្តព្រះវិហារ លោក ប្រាក់ សុវណ្ណ ក៏មិនអាចសុំការបំភ្លឺបានដែរ ព្រោះលោកមិនលើកទូរស័ព្ទ៕