មន្ត្រីក្រសួងធនធានទឹក និងប្រជាពលរដ្ឋ បានអះអាងថា គម្រោងស្ដារបឹងបែកក្អម មានទំហំជាង ៥០ហិកតារជាគម្រោងថវិការបស់ជាតិនៅក្នុងឃុំព្រែកអញ្ចាញ ស្រុកមុខកំពូល ខេត្តកណ្តាល ត្រូវបានមន្ត្រីទទួលខុសត្រូវលើការងារស្ដារបឹងនេះលួចកិបកេងថវិការដ្ឋអស់រាប់សិបលានដុល្លារអាមេរិក ដើម្បីយកទៅចែកគ្នាចាយ។
មន្ត្រីក្រសួងធនធានទឹក និងឧតុនិយម មិនបញ្ចេញឈ្មោះ បានឲ្យដឹងថា រដ្ឋាភិបាលបានចំណាយថវិការាប់លានដុល្លារដើម្បីស្ដារបឹង ហើយបានអនុញ្ញាតឱ្យក្រសួងធនធានទឹក លើកគម្រោងចំណាយលើពលកម្ម ដើម្បីឱ្យប្រជាពលរដ្ឋដែលអត់មានការងារធ្វើ ឬរងផលប៉ះពាល់ពីជំងឺ Covid-19 អាចទៅធ្វើពលកម្មជីក ឬកាយដីស្ដារបឹងបែកក្អម ដើម្បីរកកម្រៃ។
ប្រភពបញ្ជាក់ថា គម្រោងសាច់ប្រាក់ពលកម្មស្ដារបឹងបែកក្អម នេះ គឺលោក ចាន់ ស៊ីណាត ដែលជាអ្នកគ្រប់គ្រង ឬកាន់គម្រោងនេះ មិនបានចែករំលែកការងារពីការស្ដារបឹងធម្មជាតិមួយនេះជូនប្រជាពលរដ្ឋឲ្យមានការងារធ្វើឡើយ។
ផ្ទុយទៅវិញ ផែនការនេះ គឺមន្ត្រីគ្រប់គ្រងបានយកគម្រោងស្ដារបឹងនេះទៅលក់ឲ្យក្រុមហ៊ុន ឬឈ្មួញឲ្យនាំយកគ្រឿងចក្រមកជីកកកាយអាចម៍ដីដឹកទៅចាក់បំពេញក្រុមហ៊ុនបុរី ឬផ្ទះល្វែង ដោយក្នុងមួយហិកតារមានតម្លៃរាប់ម៉ឺនដុល្លារ ដើម្បីចែកលុយបក្ខពួកខ្លួនទៅវិញ។
មន្ត្រីរាជការ និងពលរដ្ឋរស់នៅឃុំព្រែកអញ្ចាញ ស្រុកមុខកំពូល បានសំណូមពរដល់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ជាពិសេសលោកនាយករដ្ឋមន្ត្រី ហ៊ុន សែន ចាត់មន្ត្រីស៊ើបអង្កេតទៅលើសកម្មភាពអនុវត្តគម្រោងស្ដារបឹងបែកក្អម ថាតើគម្រោងចំណាយនេះបានទៅដល់ពលរដ្ឋដែលជាគោលដៅនៃការចំណាយប្រាក់នេះដែរឬទេ?
ទាំងអភិបាលស្រុកមុខកំពូល លោក តុង ស៊ីវមី និងលោក អ៊ុក វណ្ណា ប្រធានមន្ទីរធនធានទឹក និងឧតុនិយម ខេត្តកណ្ដាល ក៏បានបដិសេធថាមិនដឹងមានអំពើពុករលួយទាក់ទិនគម្រោងចំណាយ ឬការលក់ដីពីការស្ដារបឹងបែកក្អមខាងលើនេះទេ ហើយការងារស្ដារបឹងនេះ ម្នាក់ៗរង់ចាំតែសមិទ្ធផលសម្រេចតែប៉ុណ្ណោះ។
យ៉ាងនេះក្តី សារព័ត៌មាន The Cambodia Daily នៅមិនទាន់មានប្រភពទាក់ទងលោក ចាន់ ស៊ីណាត អនុរដ្ឋលេខាធិការក្រសួងធនធានទឹក និងឧតុនិយម ដែលជាអ្នកគ្រប់គ្រងគម្រោងស្ដារបឹងបែកក្អម ដើម្បីបំភ្លឺជុំវិញការចោទប្រកាន់ថាបានកិបកេងថវិកាជាតិអស់រាប់សិបលានដុល្លារខាងលើបានទេ នៅថ្ងៃទី១៥ ខែកក្កដា ឆ្នាំ២០២១។ ចំណែកឯលោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក ក៏មិនអាចសុំការបំភ្លឺបានដែរតាមទូរស័ព្ទ៕