ក្រុមអ្នកតស៊ូមតិនៅក្រៅស្រុកព្រមានភាគីស្មោះស្ម័គ្រនឹងលោក សម រង្ស៊ី និងភាគីគាំទ្រលោក ហ៊ុន សែន ត្រូវឈប់នាំគ្នាប្រតិដ្ឋរឿងមួលបង្កាច់ទាំងកម្រោលមកលើថ្នាក់ដឹកនាំចលនានិស្សិតដើម្បីប្រជាធិបតេយ្យដែលជាទង្វើមិនល្អនេះជាបន្ទាន់។
ចលនានិស្សិតដើម្បីលទ្ធិប្រជាធិបតេយ្យ (SMD) ដែលមានមូលដ្ឋាននៅក្រៅប្រទេស បានចេញសេចក្តីថ្លែងការណ៍របស់ខ្លួននៅថ្ងៃទី១៩ ខែកក្កដា ទាមទារឲ្យក្រុមលោក ហ៊ុន សែន និងក្រុមលោក សម រង្ស៊ី ទម្លាក់ចោលការវាយប្រហារតាមល្បិចល្បែងប្រតិដ្ឋរឿង នោះទើបពួកគេអាចរកឃើញនូវផ្លូវរីកចម្រើនសម្រាប់ប្រជាជាតិខ្មែរក្នុងការដឹកនាំនយោបាយរបស់ពួកគេបាន។
ប្រភពដដែលអះអាងថា សម្ដីអសុរោះរបស់ក្រុមទាំងពីរដែលបានដាក់បណ្ដាសាតាមកំហឹងចិត្តរបស់ពួកគេ បានជះភាពស្អប់ខ្ពើមមកលើក្រុមចលនានិស្សិតបញ្ញវន្តខ្មែរ និងបានក្លាយជាវប្បធម៌នយោបាយដ៏ជក់ចិត្តរបស់ពួកគេ ហើយទង្វើនេះក៏កំពុងតែបំផ្លាញសេចក្ដីថ្លៃថ្នូរនៃសង្គមជាតិខ្មែរទាំងមូលយ៉ាងធ្ងន់ធ្ងរផងដែរ។
ចលនានិស្សិតដើម្បីលទ្ធិប្រជាធិបតេយ្យ (SMD) បញ្ជាក់ថា ទោះបីពួកគេជាជនរងគ្រោះពីការបំភ្លៃ និងការប្រមាថដ៏ជូរចត់របស់ក្រុមទាំងពីរខាងលើយ៉ាងណាក៏ដោយ ក៏ពួកគេនៅតែប្រកាន់ជំហរបំភ្លឺដោយសីលធម៌លើការខ្វែងយោបល់គ្នាតាមតម្លៃសេរីភាព និងទស្សនៈគុណធម៌នយោបាយដដែល។
SMD បញ្ជាក់ថា ពួកគេនៅតែបន្ត «និយាយការពិត មិននិយាយការពារនូវរឿងមិនពិតនោះទេ» ហើយការនិយាយការពារសច្ចភាពនេះ គឺក្នុងបំណងដើម្បីកុំឲ្យពួកអ្នកនយោបាយ និងសកម្មជននៃក្រុមទាំងពីរនោះនាំគ្នាភ័ន្តពលរដ្ឋនូវរឿងដែលមិនពិតថាជារឿងពិត តាមល្បិចនយោបាយភូតភររបស់ពួកគេកន្លងមក។
ក្រុមនេះអះអាងថា ពួកគេនៅតែរក្សាគោលការណ៍កែលំអអ្នកនយោបាយគ្រប់ភាគី ដើម្បីបម្រើបុព្វហេតុជាតិកម្ពុជា និងប្រយោជន៍របស់ពលរដ្ឋខ្មែរទូទៅដើម្បីចូលរួមលើកកម្ពស់ក្រមសីលធម៌នយោបាយទាំងអស់គ្នា។
SMD សម្ដែងការសោកស្តាយចំពោះឥរិយាបថដែលជាគំរូមិនល្អរបស់ក្រុមនយោបាយទាំងពីរនេះយ៉ាងខ្លាំង ព្រោះថាសកម្មជននយោបាយថ្លៃថ្នូរ និងអ្នកនយោបាយប្រជាធិបតេយ្យពិតប្រាកដ ត្រូវផ្ដោតលើគំរូប្រតិបត្តិនេះក្នុងទិសដៅស្ថាបនាសង្គមទៅកាន់ប្រជាធិបតេយ្យ ដែលគ្រប់ភាគីនយោបាយទាំងអស់ត្រូវយកការខ្វែងគំនិតគ្នា ទៅជជែកលើគោលការណ៍ច្បាប់ និងហេតុផលសង្គមនយោបាយដោយការគោរពគ្នាទៅវិញទៅមក។
ជុំវិញបញ្ហានេះ ក្រុមអ្នកគាំទ្រលោក សម រង្ស៊ី កាលពីពេលថ្មីៗនេះបាននាំគ្នាកាត់តរូបភាពក្រុមចលនានិស្សិតទាំងនោះដោយការដាក់សញ្ញាផ្កាយលើថ្ងាស ក្នុងន័យថាជាជនជាតិយួន ដែលចេញមកបំផ្លាញខ្មែរជាដើម ហើយសកម្មភាពកាត់តរូបភាព ឬវីដេអូទាំងនោះតែងត្រូវបានគេធ្វើជាប្រចាំទៅលើអ្នកណាដែលមិនស្របទៅនឹងទស្សនៈរបស់ពួកគេ។
អតីតសមាជិកក្រុមអ្នកលាបពណ៌តាមប្រព័ន្ធអនឡាញរបស់គណបក្សសង្គ្រោះជាតិ ភាគីលោក សម រង្ស៊ី បានទម្លាយក្នុងកម្មវិធី Idea Talk នៃសារព័ត៌មាន The Cambodia Daily កាលពីដើមខែកញ្ញា ឆ្នាំ២០២០ ថាសមាជិកគណបក្សសង្គ្រោះជាតិ ភាគីលោក សម រង្ស៊ី ដែលមានក្រុមការងារជាច្រើនតាមអង្គការចាត់តាំងច្បាស់លាស់ពីមន្ត្រីជាន់ខ្ពស់របស់គណបក្ស តាមជំនាញរបស់ពួកគេរៀងខ្លួនៗ។
ពួកគេជំនាញខាងកាត់តរូបភាព ក្រុមកាត់តវីដេអូ ក្រុមជេរប្រមាថ និងក្រុមអ្នកលាបពណ៌ ដើម្បីធ្វើ ទុក្ខបុកម្នេញ និងគំរាមកំហែងទៅលើបុគ្គល ឬក្រុមណាដែលមិនគាំទ្រទស្សនៈរបស់ពួកគេ។
ក្រុមអ្នកសង្កេតការណ៍ បានលើកឡើងថា មេដឹកនាំរបស់ចលនានិស្សិតដើម្បីលទ្ធិប្រជាធិបតេយ្យ ដូចជាលោក ទូច វិបុល លោក ម៉ែន ណាត លោក អ៊ាប គឹមសេង និងលោក គឹម សុខ ជាដើម ត្រូវបានក្រុមអ្នកនយោបាយខាងបក្សកាន់អំណាចចោទថាជាក្រុមមនុស្សបម្រើឲ្យក្រុមនយោបាយគណបក្សសង្គ្រោះជាតិ ប៉ុន្តែខាងក្រុមអ្នកនយោបាយបក្សសង្គ្រោះជាតិ ចោទក្រុមបញ្ញវន្តទាំងនេះថា ជាក្រុមបម្រើបក្សកាន់អំណាចដើម្បីបំបែកគណបក្សសង្គ្រោះជាតិទៅវិញ ដែលនេះបង្ហាញឲ្យឃើញថា អ្នកនយោបាយទាំងពីរក្រុមនេះកំពុងលេងល្បែងនយោបាយបំបែកបំបាក់សាមគ្គីជាតិ និងជាល្បែងនយោបាយស្វាស៊ីបាយយកទៅលាបមាត់ពពែ៕