ក្រុមអ្នកឃ្លាំមើលសិទ្ធិការងារ អំពាវនាវឲ្យរដ្ឋាភិបាលកម្ពុជាបន្តចាក់វ៉ាក់សាំងជូនប្រជាពលរដ្ឋបន្តទៀត បើទោះបីជារដ្ឋបានផ្តល់សិទ្ធិដល់ក្រុមហ៊ុនឯកជនក្នុងការនាំចូលវ៉ាក់សាំងប្រឆាំងវីរុសកូវីដ-១៩ សម្រាប់ប្រកបអាជីវកម្មក៏ដោយ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី២៨ ខែកក្កដា ថា កម្ពុជាមិនគួរដាក់បន្ទុកឲ្យប្រជាពលរដ្ឋចំណាយលើការចាក់វ៉ាក់សាំងប្រឆាំងវីរុសកូវីដ-១៩ នោះទេ ព្រោះរដ្ឋមានកាតព្វកិច្ចក្នុងការផ្តល់សេវាការពារសុខមាលភាពជូនពួកគាត់ឲ្យបានពេញលេញ។
លោកអះអាងថា បើទោះបីជាក្រសួងសុខាភិបាលផ្តល់អាជ្ញាប័ណ្ណដល់ក្រុមហ៊ុនអាហរ័ណ នីហរ័ណ ឱសថ អាចនាំចូលវ៉ាក់សាំងប្រឆាំងវីរុសកូវីដ-១៩ ក៏ដោយ ក៏រដ្ឋត្រូវតែកំណត់តម្លៃជាក់លាក់ណាមួយចំពោះការប្រកបអាជីវកម្មនៃវិស័យឯកជនទាំងនោះដែរ ដើម្បីចៀសវាងក្រុមហ៊ុនទាំងនោះដំឡើងថ្លៃវ៉ាក់សាំងស្រេចនឹងចិត្តរបស់ពួកគេ។
ការអះអាងនេះ ធ្វើឡើងបន្ទាប់ពីក្រសួងសុខាភិបាល កាលពីថ្ងៃទី២៧ ខែកក្កដា ឆ្នាំ២០២១ បានប្រកាសអនុញ្ញាតឲ្យក្រុមហ៊ុនអាហរ័ណ នីហរ័ណ ឱសថ អាចនាំចូលវ៉ាក់សាំងប្រឆាំងវីរុសកូវីដ-១៩ ដែលទទួលស្គាល់ដោយអង្គការសុខភាពពិភពលោក ក្នុងគោលបំណងសំដៅទប់ស្កាត់ការឆ្លងរាលដាលនៃជំងឺកូវីដ-១៩។
ក្រសួងបញ្ជាក់ថា ក្រុមហ៊ុនអាហរ័ណ នីហរ័ណ ឱសថ អាចធ្វើការស្នើសុំនាំចូលថ្នាំបង្ការជំងឺកូវីដ-១៩ ដើម្បីចែកចាយតាមទីកន្លែងផ្តល់សេវាសុខាភិបាលឯកជនស្របតាមច្បាប់ក្នុងក្របខ័ណ្ឌទូទាំងប្រទេស ដោយប្រតិបត្តិឲ្យបានត្រឹមត្រូវតាមស្តង់ដារបច្ចេកទេសក្នុងការដឹកជញ្ជូន ថែរក្សា និងស្តុកនៅក្នុងឃ្លាំង ដើម្បីធានានូវសុវត្ថិភាព និងប្រសិទ្ធភាពខ្ពស់។
ទាក់ទិននឹងបញ្ហានេះ កាលពីថ្ងៃទី២៧ ខែកក្កដា ឆ្នាំ២០២១ ក្រសួងសុខាភិបាល បានអះអាងថា ខ្លួនបានបើកយុទ្ធនាការចាក់វ៉ាក់សាំងប្រឆាំងវីរុស Covid-19 ជូនពលរដ្ឋបានចំនួនជាង ៦លាន ៩សែននាក់ហើយ ដែលស្មើនឹង ៦៩,៤១ភាគរយក្នុងចំណោមប្រជាពលរដ្ឋគោលដៅ ១០លាននាក់ ដោយគិតចាប់តាំងពីថ្ងៃទី១០ ខែកុម្ភៈ ឆ្នាំ២០២១ រហូតដល់ថ្ងៃទី២៧ ខែកក្កដា ឆ្នាំ២០២១ នេះ។
ជុំវិញការចាក់វ៉ាក់សាំងប្រឆាំងវីរុសកូវីដ-១៩ នេះ ប្រមុខរដ្ឋាភិបាលកម្ពុជា កាលពីថ្ងៃទី១៦ ខែកក្កដា ឆ្នាំ២០២១ បានសម្រេចបើកយុទ្ធនាការចាក់វ៉ាក់សាំងលើកុមារដែលមានចំនួន ២លាននាក់ចាប់ពីអាយុ ១២ឆ្នាំរហូតដល់អាយុ ១៧ឆ្នាំ ចាប់ពីថ្ងៃទី១ ខែសីហា ឆ្នាំ២០២១ ដើម្បីបង្កើតភាពស៊ាំទូទាំងប្រទេសឲ្យបានកាន់តែឆាប់រហ័ស ដោយចាប់ផ្តើមផែនការចាក់ថ្នាំបង្ការនេះពីទីក្រុងភ្នំពេញ និងខេត្តកណ្តាល មុនគេ។
ទាក់ទិននឹងបញ្ហានេះ ក្រសួងសុខាភិបាលកម្ពុជា បានអះអាងនៅថ្ងៃទី២៧ ខែកក្កដា ឆ្នាំ២០២១ ថា ក្រសួងបានរកឃើញអ្នកឆ្លងវីរុស Covid-19 ថ្មីចំនួន ៧៦៦នាក់ និងអ្នកជាសះស្បើយថ្មីចំនួន ៩៦៧នាក់ ខណៈអ្នកស្លាប់ថ្មីមានចំនួន ១៥នាក់ផងដែរ។
ក្រសួងបញ្ជាក់ថា មកទល់នឹងពេលនេះ អ្នកឆ្លងវីរុស Covid-19 សរុបបានកើនឡើងដល់ជាង ៧ម៉ឺន ៥ពាន់នាក់ហើយ និងអ្នកដែលជាសះស្បើយសរុបមានចំនួនជាង ៦ម៉ឺន ៧ពាន់នាក់ ដោយឡែកអ្នកស្លាប់សរុបបានកើនឡើងជាង ១៣០០នាក់ហើយមកទល់នឹងពេលនេះ៕