មេដឹកនាំបក្សប្រឆាំងសម្ដែងការព្រួយបារម្ភ និងអំពាវនាវឲ្យប្រជាពលរដ្ឋខ្មែរបង្កើនការប្រុងប្រយ័ត្នខ្ពស់ ហើយកុំតក់ស្លុត និងចុះចាញ់ក្នុងការប្រយុទ្ធប្រឆាំងទប់ស្កាត់ការឆ្លងរាលដាលនៃជំងឺ Covid-19។
ប្រធានគណបក្សសង្គ្រោះជាតិដែលកំពុងរងការរឹតត្បិតសេរីភាពនៅក្នុងប្រទេស លោក កឹម សុខា បានសរសេរលើទំព័រ Facebook របស់លោកកាលពីម្សិលមិញថា ក្នុងកាលៈទេសៈនៃការរីករាលដាលនៃវីរុស Covid-19 គឺជាការព្រួយបារម្ភយ៉ាងខ្លាំង ជាពិសេសការបំប្លែងខ្លួនប្រភេទថ្មីនៃវីរុសនេះដែលមានលក្ខណៈកាចសាហាវ ដែលកំពុងតែឆ្លងចូលកម្ពុជានៅពេលនេះ។
លោកអះអាងថា ទោះបីជារដ្ឋាភិបាលកម្ពុជាបានដាក់ចេញនូវវិធានការទប់ស្កាត់ជាច្រើនមកហើយក៏ដោយ ក៏ប្រជាពលរដ្ឋខ្មែរ និងសហគមន៍អន្តរជាតិត្រូវតែចូលរួមការពារក្នុងស្មារតីសាមគ្គីភាពដោយចិត្តសប្បុរសធម៌ ដោយការទទួលខុសត្រូវ មិនរើសអើង និងមិនប្រកាន់និន្នាការនយោបាយទៅតាមលទ្ធភាព នោះទើបការទប់ស្កាត់នេះមានប្រសិទ្ធភាពខ្ពស់។
មេដឹកនាំកំពូលនៃបក្សប្រឆាំងរូបនេះបានថ្លែងអំណរគុណដល់បណ្តាប្រទេសជាមិត្តរបស់កម្ពុជាទាំងអស់ ដែលផ្តល់អំណោយមនុស្សធម៌ដល់ពលរដ្ឋខ្មែរជាវ៉ាក់សាំង និងបរិក្ខារសុខាភិបាលផ្សេងទៀត ដើម្បីប្រយុទ្ធប្រឆាំងនឹងជំងឺ Covid-19 ឲ្យកាន់តែមានប្រសិទ្ធភាពក្នុងការទប់ស្កាត់ជំងឺឆ្លងរាតត្បាតសកលនេះ។
ការអំពាវនាវរបស់មេដឹកនាំបក្សប្រឆាំង ធ្វើឡើងស្របពេលដែលកម្ពុជាកំពុងតែព្រួយបារម្ភនឹងរលកទី៣ នៃការឆ្លងវីរុស Covid-19 ចូលក្នុងសហគមន៍ដែលមានលក្ខណៈទ្រង់ទ្រាយធំនៅពេលនេះ។
ជុំវិញការព្រួយបារម្ភរបស់លោក កឹម សុខា សហមេធាវីការពារក្តីមេដឹកនាំបក្សប្រឆាំង លោក ចាន់ ចេន បានសរសេរលើគណនី Facebook របស់លោកកាលពីថ្ងៃទី២៩ ខែកក្កដា ផងដែរថា ទោះស្ថិតក្នុងកាលៈទេសៈបែបណាក៏ដោយ លោកសង្កេតឃើញថា ប្រធានគណបក្សសង្គ្រោះជាតិ លោក កឹម សុខា នៅតែមានការព្រួយបារម្ភ និងយកចិត្តទុកដាក់លើសិទ្ធិសេរីភាព និងសុខទុក្ខរបស់ប្រជាពលរដ្ឋខ្មែរជានិច្ច ទោះបីខ្លួនគាត់ផ្ទាល់មិនមានសិទ្ធិសេរីភាពពេញលេញក៏ដោយ។
អ្នកជំនាញផ្នែកច្បាប់រូបនេះ បានលើកឡើងពីសកម្មភាពមេដឹកនាំបក្សប្រឆាំងជាច្រើនក្នុងពេលដែលលោកកំពុងរងការរឹតត្បិតសេរីភាពនៅពេលនេះ ដូចជាការជួបសួរសុខទុក្ខ និងឈ្វេងយល់អំពីជីវភាពរបស់ពលរដ្ឋ ការផ្តល់ជំនួយសប្បុរសធម៌ដល់ពលរដ្ឋដែលរងគ្រោះដោយសារគ្រោះធម្មជាតិ និងឧប្បត្តិហេតុផ្សេងៗ ដូចជាការបាក់អគារ ទឹកជំនន់ និងផលប៉ះពាល់ដោយសារជំងឺ Covid-19 ជាដើម។
មេធាវីរូបនេះបញ្ជាក់ថា ក្រៅពីការផ្តល់ជំនួយមនុស្សធម៌ដល់ពលរដ្ឋរងគ្រោះ លោក កឹម សុខា តែងអំពាវនាវ និងស្នើឲ្យបណ្តាប្រទេសជាមិត្តតាមរយៈអង្គទូត ឲ្យជួយផ្តល់ជំនួយដល់កម្ពុជាដើម្បីជួយពលរដ្ឋខ្មែរដែលកំពុងតែខ្វះខាត និងជួយទប់ស្កាត់ការឆ្លងរាលដាលនៃវិបត្តិសកលដែលកម្ពុជាកំពុងប្រឈមនៅពេលនេះ។
ជុំវិញបញ្ហានេះ ក្រុមអ្នកសង្កេតការណ៍បានអះអាងថា ចាប់តាំងពីពលរដ្ឋរងផលប៉ះពាល់ដោយសារជំងឺ Covid-19 មក ប្រធានគណបក្សសង្គ្រោះជាតិ លោក កឹម សុខា បានដឹកនាំធ្វើសកម្មភាពមនុស្សធម៌ក្នុងការចែកអំណោយជូនពលរដ្ឋដែលមានភាពទីទ័លខ្លាំងតាមបណ្តារាជធានី-ខេត្តជាច្រើន ដូចជារាជធានីភ្នំពេញ ខេត្តតាកែវ ព្រះសីហនុ និងខេត្តត្បូងឃ្មុំ ជាដើម។
យ៉ាងណាក៏ដោយ មេដឹកនាំបក្សប្រឆាំង លោក កឹម សុខា ធ្លាប់បានអះអាងដែរថា ជំនួយនេះពិតជាតិចតួចណាស់ ក៏ប៉ុន្តែនេះជាសទ្ធាដែលលោកមានជំនឿថា ខ្មែរមានទុក្ខ ខ្មែរត្រូវតែជួយខ្មែរ បើខ្មែរមានបញ្ហា ក៏ត្រូវតែមានដំណោះស្រាយរវាងខ្មែរ និងខ្មែរដែរ បើទោះបីជានៅពេលនេះលោកមិនមានសិទ្ធិធ្វើនយោបាយ ប៉ុន្តែលោកមិនអាចបិទភ្នែកសម្ងំសុខតែម្នាក់ឯងនោះទេ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ដោយចោទពីបទក្បត់ជាតិតាមប្រសាសន៍របស់លោកនាយករដ្ឋមន្ត្រី ហ៊ុន សែន ប៉ុន្តែរហូតមកទល់នឹងពេលនេះ លោកនៅតែមានភាពស្អាតស្អំ ព្រោះលោកមិនទាន់ត្រូវបានតុលាការកាត់ទោសពីបទល្មើសណាមួយនៅឡើយទេ៕