សមត្ថកិច្ចនគរបាលទេសចរណ៍នៃស្នងការដ្ឋាននគរបាលខេត្តព្រះសីហនុ បានក្រើនរំឭកដល់ពលរដ្ឋ ជាពិសេសភ្ញៀវទេសចរជាតិដែលទៅលេងកម្សាន្ត និងចុះមុជទឹកសមុទ្រ សូមបង្កើនការប្រុងប្រយ័ត្នអំពីសុវត្ថិភាពឲ្យបានខ្ពស់ ឬមិនត្រូវចុះមុជទឹកសមុទ្រនៅក្នុងអំឡុងពេលកំពុងមានខ្យល់បោកបក់ខ្លាំង និងរលកសមុទ្រធំៗ ព្រោះអាចនឹងមានគ្រោះថ្នាក់ដល់អាយុជីវិត។
សមត្ថកិច្ចបញ្ជាក់ថា នៅក្នុងអំឡុងពេលនេះ អាកាសធាតុនៅលើលំហសមុទ្រក៏ដូចជានៅតាមឆ្នេរនានានៅក្រុងព្រះសីហនុ គឺមានខ្យល់បោកបក់ខ្លាំង និងមានរលកសមុទ្រធំៗ ដែលអាចបង្កគ្រោះថ្នាក់ដល់ប្រជាពលរដ្ឋ ភ្ញៀវទេសចរ ពិសេសកុមារតូចៗដែលចុះមុជទឹកសមុទ្រ ហើយខ្វះការប្រុងប្រយ័ត្ន។
សារអំពាវនាវរបស់មន្ត្រីនគរបាលទេសចរណ៍ខាងលើនេះ បានកើតមានជាថ្មីទៀតបន្ទាប់ពីមានបុរសជាភ្ញៀវទេសចរម្នាក់មកពីរាជធានីភ្នំពេញ បានបាត់ខ្លួនកាលពីល្ងាចថ្ងៃទី០៣ ខែសីហា ឆ្នាំ២០២១ ពេលចុះមុជទឹកសមុទ្រនៅឆ្នេរអូរត្រេះ១ ស្ថិតក្នុងសង្កាត់លេខ៤ ក្រុង-ខេត្តព្រះសីហនុ។ ក្រោយការបាត់ខ្លួន សមត្ថកិច្ចបានស្វះស្វែងរកឃើញសាកសពបុរសរងគ្រោះអណ្ដែតទើរនៅលើឆ្នេរសមុទ្រនៃឆ្នេរអូរត្រេះ មានចម្ងាយប្រមាណ ១គីឡូម៉ែត្រពីទីកន្លែងបាត់ខ្លួន។
សមត្ថកិច្ចបញ្ជាក់ថា ជនរងគ្រោះមានឈ្មោះ ជូ ជាគុយ ភេទប្រុស អាយុ ២៩ឆ្នាំ ជនជាតិខ្មែរ និងមានមុខរបរជាមេធាវី រស់នៅរាជធានីភ្នំពេញ ហើយបានធ្វើដំណើរមកក្រុងព្រះសីហនុ ដើម្បីបំពេញបេសកកម្មការងារ និងធ្វើទេសចរណ៍។
មន្ត្រីនគរបាលទេសចរណ៍ បានឲ្យដឹងថា នៅល្ងាចថ្ងៃទី៣ ខែសីហា ឆ្នាំ២០២១ មានភ្ញៀវទេសចរជនជាតិខ្មែរមួយក្រុមមានគ្នា ០៤នាក់មកពីរាជធានីភ្នំពេញ បានចុះមុជទឹកសមុទ្រ ប៉ុន្តែមួយសន្ទុះក្រោយមកក៏មានបុរសម្នាក់ក្នុងចំណោមមនុស្សទាំង ០៤នាក់ បានលិចបាត់ខ្លួនចូលទៅក្នុងទឹកសមុទ្រពេលកំពុងចុះមុជទឹកសមុទ្រ ហើយមិត្តភ័ក្ដិប្រកាសឆោឡោថា រកជំនួយអន្តរាគមន៍នៅចំណុចឆ្នេរអូរត្រេះ១ ស្ថិតក្នុងភូមិ៦ សង្កាត់លេខ៤ ក្រុង-ខេត្តព្រះសីហនុ ខណៈឆ្នេរខាងលើកំពុងមានខ្យល់បោកបក់ខ្លាំង និងមានទឹករលកធំៗ។
បច្ចុប្បន្ន សាកសពបុរសរងគ្រោះក្រោយពេលគ្រូពេទ្យធ្វើកោសល្យវិច័យរួច ក៏បានប្រគល់ជូនក្រុមគ្រួសារដើម្បីនាំយកទៅធ្វើបុណ្យតាមប្រពៃណី៕