មន្ត្រីក្រសួងពាណិជ្ជកម្មជាច្រើនរូបបាននាំគ្នាចោទអគ្គនាយកនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម លោក ផាន អូន ថានៅតែបន្តប្រព្រឹត្តអំពើពុករលួយយ៉ាងគឃ្លើនដដែល បើទោះបីជាក្រសួងពាណិជ្ជកម្មធ្លាប់ធ្វើកំណែទម្រង់បញ្ឈប់អំពើពុករលួយរបស់លោកនៅក្នុងអគ្គនាយកដ្ឋាន ក.ប.ប នៃក្រសួងពាណិជ្ជកម្ម កាលពីពេលកន្លងទៅក៏ដោយ។
មន្ត្រីក្រសួងពាណិជ្ជកម្ម ដែលគួរឲ្យទុកចិត្តបានជាច្រើនរូប បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ នៅថ្ងៃទី៥ ខែសីហា ឆ្នាំ២០២១ ថា បន្ទាប់ពីក្រសួងពាណិជ្ជកម្ម បានហាមឃាត់សកម្មភាពអំពើពុករលួយលែងឲ្យមានការកាត់ប្រាក់រង្វាន់លើកទឹកចិត្តរបស់មន្ត្រី ក.ប.ប ប្រចាំខែរួចមក លោក ផាន អូន បានបង្វែរសកម្មភាពពុករលួយរបស់ខ្លួនមកកាត់ប្រាក់យន្តការដែលក្រសួងបានផ្តល់ឲ្យស្ថាប័នតាមរាជធានី-ខេត្ត ក្នុងការចំណាយផ្សេងៗដើម្បីអនុវត្តផែនការការងារប្រចាំខែរបស់ស្ថាប័នទាំងនោះជំនួសវិញ។
ប្រភពដដែលអះអាងថា ការកាត់ប្រាក់យន្តការសម្រាប់ចំណាយអនុវត្តការងារប្រចាំខែរបស់ស្ថាប័នតាមរាជធានី-ខេត្តនៃក្រសួងពាណិជ្ជកម្មរបស់លោក ផាន អូន គឺលោកបានបែងចែកមួយចំណែកដាក់ចូលហោប៉ៅខ្លួនឯង និងមួយចំណែកទៀតត្រូវដាក់ចូលទៅក្នុងហោប៉ៅរបស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ដើម្បីធ្វើជាខ្នងបង្អែក។
មន្ត្រីក្រសួងពាណិជ្ជកម្មទាំងនោះអះអាងថា នៅពេលនេះ លោក ផាន អូន តម្រូវឲ្យប្រធានសាខា និងមន្ត្រីនៃអគ្គនាយកដ្ឋាន ក.ប.ប នៃក្រសួងពាណិជ្ជកម្ម រៃអង្គាសថវិកាផ្ទាល់ខ្លួនដើម្បីរ៉ាប់រងការចំណាយរបស់អង្គភាពទៅវិញ ខណៈលុយដែលក្រសួងបានផ្តល់ឲ្យសម្រាប់អនុវត្តការងារប្រចាំខែនោះ ត្រូវលោក ផាន អូន និងរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ស៊ីដាច់អស់ទៅហើយ។
ទោះយ៉ាងណា ប្រភពដដែលបានលើកឡើងថា ក្រុមមន្ត្រីថ្នាក់ក្រោមស្នើសុំឲ្យប្រមុខរដ្ឋាភិបាលកម្ពុជាចាត់វិធានការចំពោះលោក ផាន អូន និងបក្សពួកតាមផ្លូវច្បាប់ ដើម្បីវះកាត់សាច់ស្អុយដែលបានធ្វើឲ្យប៉ះពាល់កិត្តិយសរបស់ក្រសួង ព្រោះថាលោក ផាន អូន តែងយកឈ្មោះថ្នាក់ដឹកនាំមកបិទបាំងអំពើអាក្រក់របស់ខ្លួន ដោយអះអាងថាអ្វីៗដែលគាត់បានធ្វើ គឺដើម្បីតែផលប្រយោជន៍ថ្នាក់ដឹកនាំតែប៉ុណ្ណោះ។
នៅថ្ងៃទី៥ ខែសីហា ឆ្នាំ២០២១ មន្ត្រីរាជការរបស់ក្រសួងពាណិជ្ជកម្មរាប់រយនាក់ បានសរសេរលិខិតមកកាន់សារព័ត៌មាន The Cambodia Daily សាជាថ្មីម្តងទៀត ដើម្បីសុំឲ្យជួយផ្សព្វផ្សាយពីទង្វើទុច្ចរិតរបស់អគ្គនាយកនៃអគ្គនាយកដ្ឋានក្រសួងពាណិជ្ជកម្ម លោក ផាន អូន ឲ្យបានដឹងដល់លោកនាយករដ្ឋមន្ត្រី ហ៊ុន សែន ដើម្បីបើកការស៊ើបអង្កេត និងចាត់វិធានការតាមផ្លូវច្បាប់លើមន្ត្រីពុករលួយរូបនេះឲ្យខាងតែបាន។
ក្នុងលិខិតដដែលនោះ បញ្ជាក់ថា ក្រោយពីការចុះផ្សាយរបស់សារព័ត៌មាន The Cambodia Daily កាលថ្ងៃទី១៥ ខែមិថុនា ឆ្នាំ២០២១ ចំពោះការប្រព្រឹត្តអំពើពុករលួយរបស់លោក ផាន អូន រួចមក ក្រសួងពាណិជ្ជកម្មបានធ្វើកំណែទម្រង់ឲ្យមន្ត្រីនៃអគ្គនាយកដ្ឋាន ក.ប.ប អាចបើកប្រាក់លើកទឹកចិត្តរបស់ខ្លួនតាមធនាគារ ដើម្បីបញ្ឈប់ការកាត់ប្រាក់លើកទឹកចិត្តរបស់ពួកគេពីលោក ផាន អូន បន្តទៀត។
ជាងនេះទៀត ក៏បានបញ្ឈប់ការសាងសង់លំនៅឋាននៅម្តុំមាត់ទន្លេ ស្ថិតក្នុងខណ្ឌឫស្សីកែវ ដែលមានតម្លៃជាង ១លានដុល្លារអាមេរិកជូនរដ្ឋមន្ត្រីក្រសួងពាណិជ្ជកម្ម លោក ប៉ាន់ សូរស័ក្តិ ពីក្រុមបក្ខពួករបស់លោក ផាន អូន ផងដែរ។
តែទោះជាយ៉ាងណាក៏ដោយ លោក ផាន អូន នៅតែអាចប្រព្រឹត្តអំពើពុករលួយដោយរលូនដដែល ប៉ុន្តែត្រូវធ្វើឡើងតាមវិធីផ្សេង ដូចជាកាត់លុយរបស់ស្ថាប័នតាមរាជធានី-ខេត្ត ជាដើម ព្រោះតែទង្វើពុករលួយរបស់អគ្គនាយករូបនេះ មានរដ្ឋមន្ត្រីក្រសួងពាណិជ្ជកម្ម លោក ប៉ាន់ សូរស័ក្តិ ជាអ្នកកាងពីខាងក្រោយ។
កាលពីដើមឆ្នាំ២០២០ លោក ផាន អូន ត្រូវបានព្រះមហាក្សត្រចេញព្រះរាជក្រឹត្យតែងតាំងជាអគ្គនាយកនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម ចុះថ្ងៃទី២៤ ខែកុម្ភៈ ឆ្នាំ២០២០ ជំនួសលោក ម៉ក់ ពេជ្ជរិទ្ធ ដែលបានចូលនិវត្តន៍។
ក្រោយទទួលកាន់តំណែងជាអគ្គនាយកនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម លោក ផាន អូន បានរៀបចំខ្សែបណ្ដាញដែលជាសាច់ញាតិរបស់ខ្លួនក្នុងមុខនាទីសំខាន់ៗ ដើម្បីអាចប្រព្រឹត្តអំពើពុករលួយបានដោយរលូនគ្មានការរាំងស្ទះ។
បច្ចុប្បន្ននេះ អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានប្តូរឈ្មោះថ្មីទៅជាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ដែលហៅកាត់ថា អគ្គនាយកដ្ឋាន ក.ប.ប នៃក្រសួងពាណិជ្ជកម្ម វិញ។
ទាក់ទិននឹងការប្រព្រឹត្តអំពើពុករលួយនេះ អង្គការតម្លាភាពកម្ពុជា បានចេញសេចក្តីថ្លែងការណ៍កាលដើមខែធ្នូ ឆ្នាំ២០២០ កន្លងទៅថា វិបត្តិជំងឺ Covid-19 កំពុងធ្វើឲ្យប្រទេសកម្ពុជាមានហានិភ័យកាន់តែខ្ពស់ពាក់ព័ន្ធនឹងអំពើពុករលួយរហូតដល់ការបំពាននីតិរដ្ឋថែមទៀត។
ប្រភពដដែលបញ្ជាក់ថា មន្ត្រីរដ្ឋាភិបាលជាន់ខ្ពស់របស់កម្ពុជា បានឆ្លៀតឱកាសក្នុងវិបត្តិជំងឺ Covid-19 នេះ ប្រព្រឹត្តអំពើពុករលួយតាមរូបភាពផ្សេងៗ ដើម្បីផលប្រយោជន៍ផ្ទាល់ខ្លួន និងផលប្រយោជន៍បក្ខពួករបស់ពួកគេ។
ក្រុមអ្នកឃ្លាំមើលសង្គមរិះគន់ថា អំពើពុករលួយនៅកម្ពុជាកំពុងតែចាក់ឫសយ៉ាងជ្រៅចូលទៅក្នុងស្ថាប័នជាតិ ដែលកំពុងទាញទម្លាក់កម្ពុជាចូលទៅក្នុងចំណោមប្រទេសក្រីក្រដែលងើបមុខមិនរួច ប្រសិនបើរដ្ឋាភិបាលកម្ពុជាមិនមានវិធានការច្បាប់ច្បាស់លាស់លើមន្ត្រីខិលខូចដែលកំពុងចងបណ្ដាញដើម្បីបំផ្លាញជាតិក្នុងស្ថាប័នរដ្ឋទេនោះ៕