ពលរដ្ឋរស់នៅក្រុងព្រះសីហនុ អះអាងថា បទល្មើសបាញ់បោះសេរី និងបទល្មើសចាប់បង្ខាំងមនុស្សជំរិតទារប្រាក់ បានចាប់ផ្តើមកម្រើកជាបណ្តើរៗឡើងវិញហើយនៅក្នុងភូមិសាស្ត្រខេត្តព្រះសីហនុ ដែលករណីនេះបង្កឲ្យមានការព្រួយបារម្ភអំពីសុខសុវត្ថិភាពក្នុងការប្រកបរបរទទួលទាន និងធ្វើដំណើររបស់ពួកគាត់។
អាជីវករ និងប្រជាពលរដ្ឋភាគច្រើនដែលមានលំនៅឋាននៅក្នុងក្រុងព្រះសីហនុ ឲ្យដឹងថា ក្នុងប៉ុន្មានខែចុងក្រោយនេះ គេសង្កេតឃើញបទល្មើសចាប់មនុស្សបង្ខាំងជំរិតទារប្រាក់ និងបទល្មើសបាញ់បោះសេរី បានបន្តកើតមានជាញឹកញាប់ ក្រោយស្ងប់ស្ងាត់មួយរយៈពេលខ្លីអំឡុងពេលផ្ទុះរាតត្បាតជំងឺ Covid-19 ឆ្លងចូលសហគមន៍ ២០ កុម្ភៈ ធ្ងន់ធ្ងររួចមក។
នៅថ្ងៃទី០៥ ខែសីហា មានករណីជនសង្ស័យផ្ទុះអាវុធប្រមាណ ៥គ្រាប់ បង្កឲ្យមានការភ្ញាក់ផ្អើលដល់ប្រជាពលរដ្ឋ និងអ្នកធ្វើដំណើរនៅតាមផ្លូវសាធារណៈក្នុងក្រុងព្រះសីហនុ ត្រង់ចំណុចមុខផ្សារលើខេត្តព្រះសីហនុ។ ប៉ុន្តែភ្លាមៗនេះ សមត្ថកិច្ចនៃស្នងការដ្ឋាននគរបាលខេត្តព្រះសីហនុ ក៏បានចុះអន្តរាគមន៍ និងបានឃាត់ខ្លួនមនុស្សប្រុសស្រីជនជាតិខ្មែរ និងចិន ចំនួន ៣នាក់។
យ៉ាងនេះក្តី រហូតមកដល់ល្ងាចថ្ងៃសុក្រ ទី៦ ខែសីហា ស្នងការដ្ឋាននគរបាលខេត្តព្រះសីហនុ នៅមិនទាន់បញ្ចេញរបាយការណ៍លើករណីផ្ទុះអាវុធកក្រើកក្រុងព្រះសីហនុ កាលពីយប់មិញនេះឲ្យប្រជាពលរដ្ឋបានដឹងជាសាធារណៈនៅឡើយទេ ខណៈលោក ជួន ណារិន្ទ ស្នងការនគរបាលខេត្តព្រះសីហនុ ក៏មិនអាចទាក់ទងដើម្បីស្នើការបំភ្លឺលើករណីខ្មាន់កាំភ្លើងផ្ទុះអាវុធ និងការចាប់ឃាត់ខ្លួនជនសង្ស័យទាំង ៣នាក់បាននៅឡើយដែរ។
ករណីផ្សេងមួយទៀតកាលពីថ្ងៃសុក្រ ទី២១ ខែកក្កដា ឆ្នាំ២០២១ ក៏មានករណីជនជាតិចិនមួយក្រុមបានធ្វើសកម្មភាពចាប់ជនជាតិចិនដូចគ្នាញាត់បញ្ចូលក្នុងរថយន្តនៅចំណុចលើផ្លូវក្បែរកាស៊ីណូប៉ាវទូ ស្ថិតនៅភូមិ២ សង្កាត់២ ក្រុងព្រះសីហនុ។
ក្រោយទទួលបានព័ត៌មានខាងលើនេះភ្លាម ស្នងការនគរបាលខេត្តព្រះសីហនុ លោក ជួន ណារិន្ទ ក៏បានបញ្ជាកម្លាំងជំនាញចុះអន្តរាគមន៍ ហើយឃាត់ខ្លួនជនសង្ស័យជាជនជាតិចិនបាន ៤នាក់ និងរំដោះបុរសជនជាតិចិនម្នាក់ដែលជាជនរងគ្រោះដោយសុវត្ថិភាព។
ទោះជាសមត្ថកិច្ចបានចុះបង្ក្រាប និងចាប់ខ្លួនជនសង្ស័យបញ្ជូនទៅតុលាការផ្ដន្ទាទោសបានជាច្រើនករណីបែបណាក្តី ពលរដ្ឋរស់នៅក្រុងព្រះសីហនុ បានបង្ហាញការព្រួយបារម្ភអំពីសុខសុវត្ថិភាពរបស់ខ្លួន និងស្នើដល់ថ្នាក់ដឹកនាំស្ថាប័នជំនាញពាក់ព័ន្ធ បង្កើនការត្រួតពិនិត្យនៅតាមគោលដៅតាមបច្ចេកទេសឲ្យបានម៉ត់ចត់។
ពលរដ្ឋរស់នៅក្រុងព្រះសីហនុ បានស្នើដល់លោក ជួន ណារិន្ទ ស្នងការនគរបាលខេត្តព្រះសីហនុ ក៏ដូចជាលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ សូមជួយបង្ហាញរបាយការណ៍នៃបទល្មើសនានាដែលបានកើតមាននៅក្នុងមូលដ្ឋានខេត្តព្រះសីហនុ ដើម្បីឲ្យពលរដ្ឋបានដឹងជាសាធារណៈផង ត្បិតការលាក់បាំងបទល្មើសក៏ល្មើសច្បាប់របស់កងកម្លាំងផងដែរ៕