មន្ត្រីសង្គមស៊ីវិលផ្នែកអភិវឌ្ឍផ្នត់គំនិត លើកឡើងថា ដើម្បីឲ្យពលរដ្ឋចូលរួមក្នុងការទទួលយកថ្នាំបង្ការជំងឺ Covid-19 រដ្ឋាភិបាលគួរផ្តល់លទ្ធភាពជ្រើសរើសវ៉ាក់សាំងដែលពលរដ្ឋចង់បាន ជាជាងជំរុញ ឬបង្ខំឲ្យពួកគាត់ទទួលយកវ៉ាក់សាំងដែលពួកគាត់មិនទាន់មានទំនុកចិត្ត។
ការអះអាងរបស់អ្នកឃ្លាំមើលសង្គមនេះ ធ្វើឡើងបន្ទាប់ពីក្រសួងសុខាភិបាលកម្ពុជាជំរុញឲ្យមានការផ្សព្វផ្សាយទូទាំងប្រទេសឲ្យពលរដ្ឋដែលមានអាយុចាប់ពី ១៨ឆ្នាំឡើង ទៅទទួលការចាក់វ៉ាក់សាំង Covid-19 ដូសទី១ កាលពីពេលថ្មីៗនេះ។
នាយកប្រតិបត្តិនៃអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៨ ខែសីហា ថា ការមិនហ៊ានសម្រេចចិត្តទទួលយកវ៉ាក់សាំងប្រឆាំងវីរុស Covid-19 ដោយសារក្រសួងសុខាភិបាល និងរដ្ឋាភិបាលមិនដែលបានបង្ហាញរបាយការណ៍ជាក់លាក់ណាមួយពីប្រសិទ្ធភាពវ៉ាក់សាំងដែលខ្លួនបានប្រើប្រាស់កន្លងមកនោះទេ។
លោកអះអាងថា ដើម្បីបង្កើនជំនឿចិត្តរបស់ពលរដ្ឋលើវ៉ាក់សាំង ក៏ដូចជាជំនឿចិត្តលើរដ្ឋាភិបាលក្នុងការអំពាវនាវឲ្យចូលរួមចាក់វ៉ាក់សាំងនេះ រដ្ឋាភិបាលគួរតែរៀបចំការផ្សព្វផ្សាយពីគុណភាពរបស់វ៉ាក់សាំងដោយមន្ត្រីជំនាញផ្នែកសុខាភិបាលឲ្យបានទូលំទូលាយទៅដល់ពលរដ្ឋនៅតាមសហគមន៍ ដោយចៀសវាងនូវការបំភ័យ ឬវិធានការរឹតបន្តឹងណាមួយទៅលើពួកគាត់ក្នុងការកៀរគរឲ្យចូលរួមទទួលយកវ៉ាក់សាំងនេះ។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានចេញលិខិតណែនាំកាលពីថ្ងៃទី១៧ ខែសីហា ឆ្នាំ២០២១ ឲ្យអាជ្ញាធរ និងស្ថាប័នពាក់ព័ន្ធទូទាំងប្រទេសធ្វើការផ្សព្វផ្សាយលើកទឹកចិត្តពលរដ្ឋដែលមានអាយុចាប់ពី ១៨ឆ្នាំឡើងទៅ ឲ្យទៅទទួលវ៉ាក់សាំងប្រឆាំងវីរុស Covid-19 ដូសទី១ ឲ្យបានគ្រប់ៗគ្នា ដើម្បីសម្រេចផែនការផ្តល់វ៉ាក់សាំងលើពលរដ្ឋគោលដៅ ១០លាននាក់។ អ្នកនាំពាក្យរូបនេះជំរុញឲ្យអាជ្ញាធរគ្រប់លំដាប់ថ្នាក់ កៀរគរពលរដ្ឋនៅតាមមូលដ្ឋានរបស់ខ្លួន ព្រមទាំងរៀបចំផែនការ និងចលនាលើកទឹកចិត្តឲ្យពលរដ្ឋដែលមិនទាន់ទទួលបានវ៉ាក់សាំងទាំងនោះ ទៅទទួលថ្នាំបង្ការ Covid-19 ដោយស្ម័គ្រចិត្ត ដើម្បីធានានូវភាពស៊ាំទូទាំងសហគមន៍ និងឈានទៅរកការបើកឡើងវិញនូវសង្គមសេដ្ឋកិច្ចនៅកម្ពុជាឲ្យបានឆាប់។
ការណែនាំរបស់ក្រសួងសុខាភិបាលនេះ ធ្វើឡើងស្របពេលដែលកម្ពុជាកំពុងរងការវាយលុកពីរលកទី៣ នៃវីរុស Covid-19 បំប្លែងថ្មីប្រភេទដែលតា (DELTA) ដែលបានរកឃើញលើពលករខ្មែរដែលត្រឡប់មកពីបរទេស និងអ្នកដំណើរតាមយន្តហោះ បុគ្គលិកសុខាភិបាល និងមន្ត្រីរាជការដែលមានចំនួនជិត ៥០០នាក់ហើយគិតចាប់តាំងពីថ្ងៃទី៣១ ខែមីនា រហូតដល់ថ្ងៃទី១៣ ខែសីហា ឆ្នាំ២០២១។ ករណីនេះ កំពុងបង្កហានិភ័យដល់រាជធានី-ខេត្តជិត ២០រាជធានី-ខេត្តនៅកម្ពុជា នៅពេលបច្ចុប្បន្ននេះ។
ទាក់ទិននឹងការចាក់វ៉ាក់សាំងប្រឆាំងវីរុស Covid-19 នេះ ក្រសួងសុខាភិបាលបានអះអាងកាលពីថ្ងៃទី១៧ ខែសីហា ឆ្នាំ២០២១ ថា ខ្លួនបានបង្កើនល្បឿនចាក់វ៉ាក់សាំងប្រឆាំងវីរុស Covid-19 ជូនប្រជាពលរដ្ឋដូសទី១ បានចំនួនជាង ៩លាន ១សែននាក់ហើយ រីឯដូសទី២ មានចំនួនជាង ៧លាន ៤សែននាក់ ដោយឡែកអ្នកចាក់ដូសទី៣ មានចំនួនជាង ៣សែន ១ម៉ឺននាក់ ខណៈកុមារចាក់បាន ៣២,២៥ភាគរយផងដែរ។
ជំងឺ Covid-19 ជាប្រភេទជំងឺចម្លងពីមនុស្សទៅមនុស្សជំនាន់ទី៥ ក្នុងរយៈពេល ១០០ឆ្នាំកន្លងមកនេះ។ ជំងឺឆ្លងកាចសហាវប្រភេទនេះ ធ្លាប់បានកើតឡើងដំបូងក្នុងឆ្នាំ១៩១៨ មានឈ្មោះថា H1N2 ឬហៅថា Spanish Flu និងលើកទី២ បានកើតឡើងក្នុងឆ្នាំ១៩៥៧ ឈ្មោះថា H2N2 ឬហៅថា Asian Flu។ ដោយឡែកលើកទី៣ បានផ្ទុះជំងឺមួយទៀតដែលមានឈ្មោះថា H3N2 ឬហៅថា Hong Kong Flu និងលើកទី៤ បានកើតឡើងក្នុងឆ្នាំ២០០៩ មានឈ្មោះថា H1N1 ឬហៅថា Pandemic Flu។
ប៉ុន្តែជំងឺ Covid-19 នៅពេលនេះមានទម្រង់កាចសាហាវជាងជំងឺមុនៗ ដោយសារតែជំងឺនេះចេះបំប្លែងខ្លួនទៅជាប្រភេទថ្មីផ្សេងៗគ្នាដែលជាមូលហេតុពិបាកក្នុងការទប់ស្កាត់ ខណៈកម្ពុជាព្យាយាមប្រើវ៉ាក់សាំងដល់ទៅ ៤ប្រភេទ គឺ Sinovac, Sinofam, AstraZeneca និង Jonhson & Jonhson ដើម្បីទប់ស្កាត់រោគឆ្លងនេះឲ្យមានប្រសិទ្ធភាព៕