ក្នុងសន្ទរកថាពោរពេញទៅដោយទឹកភ្នែកដែលថ្លែងចេញពីសេតវិមានប្រធានាធិបតីអាមេរិក លោក ចូ បៃដិន បានប្ដេជ្ញាថានឹងតាមប្រមាញ់ក្រុមដែលស្ថិតនៅពីក្រោយការបំផ្ទុះគ្រាប់បែកអត្តឃាតនៅអាកាសយានដ្ឋានទីក្រុងកាប៊ុល ដែលបានផ្តាច់ជីវិតកងទ័ពអាមេរិកាំង ១៣នាក់ និង ១៨នាក់ទៀតរងរបួស។
ទីភ្នាក់ងារព័ត៌មាន Reuters បានធ្វើសេចក្ដីរាយការណ៍នៅថ្ងៃសុក្រ ទី២៧ ខែសីហា ថា លោក បៃដិន បានបញ្ជាក់ទៀតថា ប្រតិបត្តិការជម្លៀសមនុស្សចេញពីប្រទេសអាហ្វហ្គានីស្ថាន នឹងនៅតែបន្ត។
តាមសេចក្ដីថ្លែងការណ៍របស់លោក បៃដិន គឺលោកបានប្រាប់ក្រុមដែលបានរៀបចំការវាយប្រហារនេះ ហើយក្រុមណាក៏ដោយដែលចង់ឲ្យអាមេរិករងគ្រោះដឹងថា អាមេរិកនឹងមិនលើកលែង និងមិនបំភ្លេចជាដាច់ខាត គឺត្រូវតាមប្រមាញ់ឱ្យមកទូទាត់សងការឈឺចាប់នេះវិញ។
ថ្លែងចេញពីសេតវិមាន លោកប្រធានាធិបតីបានហៅកងទ័ពអាមេរិកដែលបានពលីជីវិតនៅព្រលានយន្តហោះក្នុងទីក្រុងកាប៊ុលដោយសារអំពើភេរវកម្មនេះ គឺជាវីរបុរសនៃប្រជាជនអាមេរិក។
ចំពោះការជម្លៀសមនុស្សចេញពីអាហ្វហ្គានីស្ថាន សម្រាប់លោក បៃដិន សន្យាថានឹងត្រូវបន្តរហូតដល់កាលកំណត់ គឺថ្ងៃទី៣១ ខែសីហា។ លោកប្ដេជ្ញាថា ផែនការនេះនឹងមិនត្រូវបានផ្អាកឡើយ ហើយក៏មិនទុកឱកាសឱ្យភេរវកម្មបង្អាក់បេសកកម្មនេះបានឡើយ។
អ្នកនាំពាក្យមន្ទីរបញ្ចកោណ លោក John Kirby បានបញ្ជាក់ថា ការផ្ទុះនោះបានកើតឡើងកាលពីថ្ងៃព្រហស្បតិ៍ នៅជិតច្រក Abby Gate នៃព្រលានយន្តហោះនោះ ជាទីដែលមានមនុស្សរាប់ពាន់នាក់បានធ្វើដំណើរទៅកាន់ទីនោះក្នុងរយៈពេលប៉ុន្មានថ្ងៃចុងក្រោយនេះ។ ជាមួយគ្នានេះ មេបញ្ជាការនៃទីបញ្ជាការកណ្តាលយោធាអាមេរិក ឧត្តមសេនីយ៍ Kenneth McKenzie បានធ្វើសេចក្ដីរាយការណ៍ថា កងទ័ពអាមេរិក ១៣នាក់ពិតជាបានបាត់បង់ជីវិត និង ១៨នាក់ទៀតរងរបួសនៅក្នុងការវាយប្រហារផ្ទួនៗចំនួនពីរកន្លែង។
ក្រោយការវាយប្រហារកើតឡើង ក្រុមភេរវករ ISIS បានចេញមុខអះអាងថា ពួកគេជាអ្នកស្ថិតនៅពីក្រោយហេតុការណ៍នេះ។ បើតាមសេចក្តីថ្លែងការណ៍របស់ក្រុម ISIS ចេញផ្សាយនៅថ្ងៃព្រហស្បតិ៍ ថា សមាជិករបស់ក្រុមនេះបានរៀបចំធ្វើដំណើរទៅកាន់កន្លែងប្រមូលផ្តុំនៃក្រុមអ្នកបកប្រែ និងសម្របសម្រួលនៅក្នុងជំរំ Baran Camp នៃកងទ័ពអាមេរិក ដែលស្ថិតនៅក្បែរព្រលានយន្តហោះទីក្រុងកាប៊ុល ហើយបន្ទាប់មក ក្រុមនោះក៏បានចុចបំផ្ទុះគ្រាប់បែកដែលនៅជាប់ខ្លួនតែម្តង។ ក្នុងព្រឹត្តិការណ៍ភ្លាមនេះ មនុស្ស ៦០នាក់បានស្លាប់ និង ១៤០នាក់ទៀតរងរបួសជាទម្ងន់។
ក្រុមនេះប្រកាសថា ខ្លួនគេជាអ្នករៀបចំផែនការនេះ គឺសំដៅលើកងទ័ពអាមេរិក។ សម្រាប់ពួកតាលីបង់វិញ ដែលព្រមានថានឹងបិទអាកាសយានដ្ឋានក្រុងកាប៊ុល និងប្រឆាំងអាមេរិកដែលចង់ពន្យារការជម្លៀសមនុស្សលើសថ្ងៃទី៣១ ខែសីហា បានចេញមុខបដិសេធថាខ្លួនគេមិនជាប់ពាក់ព័ន្ធនឹងអំពើបំផ្ទុះគ្រាប់បែកនោះទេ ដោយបានសន្យាថានឹងតាមចាប់ខ្លួន ឬកម្ទេចក្រុមវាយប្រហារនេះ។ តែក្រុមតាលីបង់ នៅតែព្រមានមិនឱ្យអាមេរិកបន្តជម្លៀសមនុស្សឱ្យហួសថ្ងៃដែលបានកំណត់នោះទេ។
មន្ត្រីតាលីបង់ ប្រាប់ថាគ្មានហេតុផលណាមួយដែលការជម្លៀសមនុស្សចេញពីអាហ្វហ្គានីស្ថាន ដែលកំពុងដឹកនាំដោយសហរដ្ឋអាមេរិកនោះ ត្រូវពន្យារពេលនោះឡើយ។ មន្ត្រីម្នាក់របស់ពួកតាលីបង់ បានប្រាប់សារព័ត៌មានក្នុងស្រុកថា សមាជិករបស់ខ្លួនចំនួន ២៨នាក់ក៏បានស្លាប់ដោយសារតែការបំផ្ទុះគ្រាប់បែកអត្តឃាតនេះ ហើយចំនួនអ្នកស្លាប់កើនឡើងដល់ជាង ១០០នាក់។
តាមមន្ត្រីតាលីបង់ ដែលមិនប្រាប់ឈ្មោះរូបនេះបានឱ្យដឹងថា មនុស្សសរុប ១២០នាក់ដែលបានរងបួស ត្រូវបានបញ្ជូនទៅសម្រាកព្យាបាលនៅតាមមន្ទីរពេទ្យនានាក្នុងទីក្រុងកាប៊ុល។
មន្ត្រីអាហ្វហ្គានីស្ថាន និងកងទ័ពអាមេរិក បានឲ្យដឹងថា ជនជាតិអាហ្វហ្គានីស្ថានយ៉ាងហោចណាស់ ៦០នាក់ និងកងទ័ពអាមេរិក ១៣នាក់បានស្លាប់ភ្លាមៗ។ ប៉ុន្តែពេលនេះ តួលេខបញ្ជាក់ថាជនជាតិអាហ្វហ្គានីស្ថាន ដែលស្លាប់បានកើនឡើងដល់ ៩៥នាក់ និងរាប់រយនាក់ទៀតរងរបួស។
តាមសេចក្ដីរាយការណ៍ចុងក្រោយបានឱ្យដឹងថា ការជម្លៀសមនុស្សចេញពីអាហ្វហ្គានីស្ថាន តាមរយៈអាកាសយានដ្ឋានអន្តរជាតិទីក្រុងកាប៊ុល បានចាប់ផ្តើមឡើងវិញហើយ ទោះបីកងទ័ពអាមេរិកស្លាប់ជាច្រើននាក់ដោយសារការបំផ្ទុះគ្រាប់បែកក៏ដោយ ហើយការបន្តឡើងវិញនេះ គឺធ្វើតាមការបញ្ជារបស់លោកប្រធានាធិបតី ចូ បៃដិន ដែលបានប្រកាសថានឹងមិនមានការផ្អាក ឬបិទបញ្ចប់ឡើយ។ លោកថាត្រូវធ្វើឱ្យចប់តាមកាលកំណត់នៅត្រឹមថ្ងៃទី៣១ ខែសីហា។
តាមសេចក្ដីរាយការណ៍របស់ទីភ្នាក់ងារសារព័ត៌មាន Reuters យន្តហោះដឹកមនុស្សចាកចេញពីក្រុងកាប៊ុល បានបន្តឡើងវិញជាធម្មតា ដោយគេបានឃើញយន្តហោះបានហោះចេញជាបន្តបន្ទាប់ឡើងវិញគិតចាប់តាំងពីព្រឹកថ្ងៃសុក្រ ហើយការធ្វើចរាចរណ៍ទៅកាន់អាកាសយានដ្ឋាន Hamid Kazai នោះនៅតែដំណើរធម្មតាវិញហើយ។
គិតមកដល់ពេលនេះ សហរដ្ឋអាមេរិកជម្លៀសមនុស្សចេញពីក្រុងកាប៊ុល បានចំនួន ៩ម៉ឺន ៥ពាន់ ៧០០នាក់ តាមជើងយន្តហោះយោធាអាមេរិក និងប្រទេសសម្ពន្ធមិត្ត។ ចំណែកអង់គ្លេសជម្លៀសបានជិត ៦ពាន់នាក់ និងអាល្លឺម៉ង់ជិត ៣ពាន់នាក់៕