នាយករដ្ឋមន្ត្រីជប៉ុន លោក Yoshihide Suga បានប្រកាសថា រូបលោកនឹងលាលែងចេញពីតំណែងនៅក្នុងពេលឆាប់ៗនេះ។ ការប្រកាសនេះ បានកើតមានឡើងខណៈលោក Suga ត្រូវបានគេមើលឃើញថា ទើបតែកាន់តំណែងបានត្រឹមមួយឆ្នាំប៉ុណ្ណោះ ហើយប្រជាប្រិយភាពរបស់លោកក៏ចាប់ផ្ដើមធ្លាក់ចុះខ្លាំងដោយសារវិបត្តិ COVID-១៩។
ទីភ្នាក់ងារសារព័ត៌មាន Reuters បានចុះផ្សាយនៅថ្ងៃសុក្រ ទី៣ កញ្ញា ថា លោក Suga នឹងលាលែងចេញពីតំណែងនាយករដ្ឋមន្ត្រីជប៉ុន យ៉ាងយូរនៅសប្ដាហ៍ក្រោយ ហើយលោកនឹងមិនឈរឈ្មោះបោះឆ្នោតជាប្រធានគណបក្សកាន់អំណាចនៃគណបក្សប្រជាធិបតេយ្យសេរី ម្តងទៀតដែលនឹងធ្វើឡើងនៅចុងខែកញ្ញា នេះទេ។
លោកក៏បានប្រកាសដែរថានឹងមិនឈរឈ្មោះជាបេក្ខភាពនាយករដ្ឋមន្ត្រីជប៉ុន ម្តងទៀតដែរនៅក្រោយពេលចប់អាណត្តិនៅក្នុងការបោះឆ្នោតសភាខាងមុខ។
លោក Suga បានប្រកាសប្រាប់អ្នកកាសែតថា លោកចង់ទុកកម្លាំងថាមពល និងពេលវេលាដើម្បីដោះស្រាយបញ្ហាវិបត្តិជំងឺឆ្លងកូវីដ-១៩ ដែលកំពុងអង្រួនប្រទេសជប៉ុន នាពេលបច្ចុប្បន្ននេះ ហើយលោកក៏ចង់ឃើញនាយករដ្ឋមន្ត្រីជំនួសរូបលោកមានសមត្ថភាពក្នុងការទប់ស្កាត់ការរាតត្បាតដ៏កំណាចនេះ។
ការប្រកាសរបស់លោកនាយករដ្ឋមន្ត្រីជប៉ុន នេះ គឺស្របពេលដែលប្រជាប្រិយភាពរបស់លោក ក៏ដូចជារដ្ឋាភិបាលលោក បានធ្លាក់ចុះយ៉ាងខ្លាំង។
យោងតាមគណបក្ស LDP អ្នកដែលឈ្នះក្នុងការប្រកួតយកតំណែងជាប្រធានបក្សកាន់អំណាចមួយនេះ នឹងត្រូវដឹកនាំបក្សទាំងមូលទៅចូលរួមការបោះឆ្នោតសកល ដែលនឹងប្រព្រឹត្តទៅនៅថ្ងៃទី១៧ ខែតុលា ឆ្នាំ២០២១ នេះ។
ជុំវិញការប្រកាសលាលែងចេញពីតំណែងនេះដែរ អគ្គលេខាធិការនៃបក្សកាន់អំណាចនៅជប៉ុន LDP លោក Toshihiro Nikai បាននិយាយថា លោកពិតជាមានការភ្ញាក់ផ្អើល ប៉ុន្តែលោកជឿជាក់ថា នេះជាការសម្រេចចិត្តដែលលោកនាយករដ្ឋមន្ត្រីត្រូវតែធ្វើ បន្ទាប់ពីការពិចារណាដោយប្រុងប្រយ័ត្ន ហើយបក្សក៏បានទទួលយកការសម្រេចចិត្តនេះរួចហើយដែរ។
ប៉ុន្តែដើមហេតុដែលនាំឱ្យលោក Yoshihide Suga ប្រកាសចុះចេញពីតំណែងជានាយករដ្ឋមន្ត្រី គឺបន្ទាប់ពីមានការស្ទង់មតិមួយរបស់សារព័ត៌មាន Nikkei Review ដោយបានបង្ហាញថា លោក Suga ធ្លាក់ចុះប្រជាប្រិយភាពជាខ្លាំង។ យោងតាមការស្ទាបស្ទង់មតិនេះ រដ្ឋាភិបាលរបស់លោកបានទទួលការពេញចិត្តពីប្រជាជនជប៉ុន មិនដល់ ៣០% ផងទេ។
ប្រជាជនជប៉ុនភាគច្រើនបានរិះគន់រដ្ឋាភិបាលរបស់លោក ដែលមានះរៀបចំកម្មវិធីប្រកួតកីឡាអូឡាំពិក នៅទីក្រុងតូក្យូ ខណៈដែលវិបត្តិជំងឺឆ្លងកូវីដ-១៩ មានស្ថានភាពធ្ងន់ធ្ងរ។ ជាងនេះទៀត យុទ្ធនាការចាក់វ៉ាក់សាំងបង្ការនៅជប៉ុន បានដំណើរការទៅយឺតយ៉ាវជាខ្លាំង។
បញ្ហាធំបំផុតដែលធ្វើឲ្យប្រជាប្រិយភាពលោក Suga ធ្លាក់ចុះនោះ គឺការដោះស្រាយវិបត្តិ COVID-19 មិនមានប្រសិទ្ធភាព។ ការសម្រេចចិត្តរបស់លោក Suga ត្រូវបានគេមើលឃើញថា ជាការបើកផ្លូវឲ្យគណបក្ស LDP ស្ដារមុខមាត់ឡើងវិញចំពោះការបោះឆ្នោតសភាដែលនឹងធ្វើនៅខែក្រោយនេះ។
ក្នុងវ័យ ៧២ឆ្នាំ លោក Suga បានចូលមកកាន់តំណែងបន្តពីលោក ស៊ីនហ្សូ អាបេ កាលពីខែកញ្ញា ឆ្នាំ២០២០ បន្ទាប់ពីលោក អាបេ លាចេញពីតំណែងនាយករដ្ឋមន្ត្រី ដោយសារបញ្ហាសុខភាព។
ហេតុអ្វីមេដឹកនាំប្រទេសជប៉ុន ងាយលាលែងពីតំណែង ខណៈមេដឹកនាំប្រទេសខ្លះមិនអាចធ្វើដូចនេះបាន?
ការលាលែងពីតំណែងរបស់នាយករដ្ឋមន្ត្រីជប៉ុន គឺទាំងលោក ស៊ីនហ្សូ អាបេ និងលោក Suga ដែលអ្នកទាំងពីរមកពីគណបក្សប្រជាធិបតេយ្យសេរីដូចគ្នា បានធ្វើឱ្យប្រទេសជប៉ុន ក្នុងរយៈពេល ២ទសវត្សមកនេះមាននាយករដ្ឋមន្ត្រីដល់ទៅ ៦រូបហើយ ដែលសម្រេចចិត្តដូចនេះ។ បើគិតពីចំនួននេះ គឺក្នុងរយៈពេល ២០ឆ្នាំមាននាយករដ្ឋមន្ត្រីចំនួន ៦រូបឯណោះបានលាលែងចេញពីតំណែង ដែលជាហេតុធ្វើឱ្យមជ្ឈដ្ឋានអន្តរជាតិមើលឃើញថា ជប៉ុនក្លាយជាប្រទេសប្រជាធិបតេយ្យលេចធ្លោគួរឱ្យភ្ញាក់ផ្អើលនៅអាស៊ី និងនៅក្នុងពិភពលោក ដែលមានមេដឹកនាំចិត្តសឿងហ៊ានលាលែងពីតំណែងកំពូលរបស់ខ្លួន។
ការណ៍នេះក៏ក្លាយជាចំណោទមួយផងដែរថា ហេតុអ្វីបានជាបណ្ដាប្រទេសខ្លះដែលក្នុងនោះជាប្រទេសប្រជាធិបតេយ្យផងដែរ តែជាប្រទេសអភិវឌ្ឍន៍តិចតួច គឺមេដឹកនាំប្រទេសនោះកម្រនឹងធ្វើដូចនេះកើតណាស់។
មានមេដឹកនាំខ្លះបាត់បង់ទំនុកចិត្តការគាំទ្រពីប្រជាជន និងសមាជិករដ្ឋសភា ហើយមេដឹកនាំដែលរងការចោទប្រកាន់ក្នុងសំណុំរឿងព្រហ្មទណ្ឌ ដូចជាបំពានអំណាចរដ្ឋ អំពើពុករលួយ ឧក្រិដ្ឋកម្ម តែបែរជាមិនអាច ឬមិនព្រមទម្លាក់អំណាចខ្លួននោះទេ។ មេដឹកនាំខ្លះសុខចិត្តក្រាញអំណាច សុខចិត្តបញ្ជាឱ្យស្ថាប័នបោះឆ្នោតលួចសន្លឹកឆ្នោត ជួយកែតួលេខលទ្ធផលបោះឆ្នោតមកឱ្យខ្លួន ដើម្បីបានកាន់អំណាចបន្តទៀត។
មិនតែប៉ុណ្ណោះ ក៏មានមេដឹកនាំខ្លះទៀតហ៊ានធ្វើរដ្ឋប្រហារប្លន់អំណាចពីបក្សឈ្នះឆ្នោត បង្គាប់ឱ្យតុលាការរំលាយបក្សប្រឆាំង និងចាប់ខ្លួនមេបក្សប្រឆាំងទៀតផង ជាពិសេសដូចជាមេដឹកនាំនៅប្រទេសកម្ពុជា និងប្រទេសភូមា ជាដើម៕