អង្គការសង្គមស៊ីវិលជាច្រើនដែលធ្វើការលើវិស័យការពារសិទ្ធិមនុស្សនៅកម្ពុជា បន្តធ្វើយុទ្ធនាការរួមគ្នាជាលើកទី៥ ហើយ ដើម្បីសុំឱ្យដោះលែងសកម្មជនបរិស្ថាន និងអ្នកការពារសិទ្ធិមនុស្សដែលត្រូវអាជ្ញាធរកម្ពុជាចាប់ខ្លួនកន្លងមក ដោយផ្តល់យុត្តិធម៌ និងសេរីភាពជូនពួកគេវិញ។
អង្គការសង្គមស៊ីវិល និងសមាគមនានានៅកម្ពុជា បានប្រកាសយុទ្ធនាការលើបណ្ដាញសង្គម Facebook នៅថ្ងៃទី៦ ខែកញ្ញា ឆ្នាំ២០២១ ដើម្បីទាមទារឲ្យរដ្ឋាភិបាលកម្ពុជាដោះលែងសកម្មជនបរិស្ថាន សកម្មជនការពារសិទ្ធិមនុស្ស និងអ្នកទោសមនសិការដទៃទៀតដែលត្រូវបានអាជ្ញាធររបស់រដ្ឋាភិបាលលោក ហ៊ុន សែន ចាប់ខ្លួនទាំងអយុត្តិធម៌នាពេលកន្លងមក។
ប្រភពដដែលអះអាងថា ក្រុមសង្គមស៊ីវិលនឹងបន្តលើកឡើងពីការចាប់ខ្លួនយុវជនចលនាមាតាធម្មជាតិចំនួន ៦នាក់ដែលកំពុងប្រឈមមុខនឹងបទចោទ «រួមគំនិតក្បត់ និងប្រមាថចំពោះអង្គព្រះមហាក្សត្រ» ផងដែរ។
ក្រុមសង្គមទាំងនេះបានលើកឡើងទៀតថា វាសនាសកម្មជនបរិស្ថាននៅកម្ពុជាពិតជាមិនល្អដូចសកម្មជនបរិស្ថាននៅលើពិភពលោកនោះទេ ពួកគេតែងទទួលរងការគំរាមកំហែង បំភិតបំភ័យ និងចាប់ខ្លួនដាក់ពន្ធនាគារទាំងអយុត្តិធម៌ពីសំណាក់អាជ្ញាធរខ្មែរជានិច្ច ខណៈសកម្មជនទាំងនោះគ្រាន់តែប្រើសិទ្ធិដែលមានចែងក្នុងរដ្ឋធម្មនុញ្ញដើម្បីការពារធនធានធម្មជាតិរបស់ខ្លួនប៉ុណ្ណោះ។
យុទ្ធនាការនេះធ្វើឡើងដើម្បីជំរុញឲ្យអាជ្ញាធរកម្ពុជាដោះលែងសកម្មជនបរិស្ថានដែលត្រូវបានចាប់ខ្លួនទាំងអយុត្តិធម៌កន្លងមក ហើយកំពុងតែឃុំខ្លួននៅពន្ធនាគាររហូតមកដល់សព្វថ្ងៃនេះ។
នៅថ្ងៃទី៦ ខែកញ្ញា ឆ្នាំ២០២១ អង្គការសមាគមជាច្រើនបាននាំគ្នាធ្វើយុទ្ធនាការលើបណ្ដាញសង្គម Facebook ដើម្បីស្នើសុំឱ្យរដ្ឋាភិបាលកម្ពុជាដោះលែងសកម្មជន និងអ្នកការពារសិទ្ធិមនុស្សដែលកំពុងត្រូវបានឃុំខ្លួនសព្វថ្ងៃនេះ រួមមានមជ្ឈមណ្ឌលសិទ្ធិមនុស្សកម្ពុជា (CCHR) បណ្ដាញយុវជនកម្ពុជា (CYN) មជ្ឈមណ្ឌលសិទ្ធិមនុស្ស និងការងារសង់ត្រាល់ និងអង្គការសមាគមមួយចំនួនផ្សេងទៀតផងដែរ។
ទាក់ទិននឹងបញ្ហានេះ កាលពីថ្ងៃទី៣១ ខែសីហា ឆ្នាំ២០២១ សាលាដំបូងរាជធានីភ្នំពេញបានសម្រេចថានឹងប្រកាសសាលក្រមលើសំណុំរឿងសកម្មជនបរិស្ថានទាំងនោះ នៅថ្ងៃទី២៨ ខែកញ្ញា ឆ្នាំ២០២១ ខាងមុខនេះ បន្ទាប់ពីពួកគេត្រូវបានឃុំខ្លួនអស់រយៈពេល ១ឆ្នាំកន្លងមក។
សកម្មជនបរិស្ថាន លោក ហ៊ុន វណ្ណៈ កញ្ញា ឈឿន ដារ៉ាវី លោក ថា ឡាវី និងកញ្ញា សូ មេត្តា ជាដើម ត្រូវសមត្ថកិច្ចចាប់ខ្លួនតាំងពីអំឡុងខែកញ្ញា ឆ្នាំ២០២០។ ពួកគេត្រូវបានអាជ្ញាធរចោទប្រកាន់ពីបទញុះញង់ឱ្យមានភាពវឹកវរដល់សន្តិសុខសង្គម និងត្រូវបានឃុំខ្លួនបណ្ដោះអាសន្ននៅមណ្ឌលអប់រំកែប្រែ «ម១» «ម២» និងពន្ធនាគាររាជធានីភ្នំពេញរហូតដល់បច្ចុប្បន្ន។
ក្រុមអ្នកឃ្លាំមើលសិទ្ធិពលរដ្ឋនៅកម្ពុជា បានរិះគន់ថា ការចាប់សកម្មជនបរិស្ថាន និងសកម្មជនសិទ្ធិមនុស្សទាំងនោះ បានបង្ហាញឲ្យឃើញពីការអនុវត្តច្បាប់បញ្ច្រាសពីខ្លឹមសាររដ្ឋធម្មនុញ្ញ និងខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស របស់អាជ្ញាធរខ្មែរ ខណៈរដ្ឋាភិបាលកម្ពុជាបានចុះហត្ថលេខាទទួលស្គាល់កិច្ចព្រមព្រៀងនេះតាំងពីឆ្នាំ១៩៩១ មកនោះ។
រដ្ឋធម្មនុញ្ញមាត្រា៣១ ចែងថា កម្ពុជាទទួលស្គាល់ និងគោរពសិទ្ធិមនុស្សដូចដែលមានចែងក្នុងធម្មនុញ្ញអង្គការសហប្រជាជាតិ សេចក្តីប្រកាសជាសកលស្ដីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយទាក់ទងនឹងសិទ្ធិមនុស្ស សិទ្ធិនារី និងសិទ្ធិកុមារ ដែលបានបង្កើតឡើងតាំងពីឆ្នាំ១៩៤៨ មក៕