ក្រុមបញ្ញវន្តខ្មែរនៅឯនាយសមុទ្រ លើកឡើងថា ដំណើរទស្សនកិច្ចរបស់រដ្ឋមន្ត្រីការបរទេសចិន ទៅកាន់ប្រទេសទាំង៤ ក្នុងតំបន់អាស៊ី គឺដើម្បីបង្ហាញពិភពលោកថា ចិននៅតែអាចធ្វើជាមិត្តល្អទាំងការទូត និងការបង្កើនទំហំពាណិជ្ជកម្មជាមួយបណ្តាប្រទេសដែលជាសម្ពន្ធមិត្តរបស់សហរដ្ឋអាមេរិក។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៨ កញ្ញា ថា ដំណើរទស្សនកិច្ចរបស់មន្ត្រីចិននៅពេលនេះ គឺដើម្បីស្ទាបស្ទង់ទំនោរប្រទេសក្នុងតំបន់អាស៊ី ជាពិសេសក្នុងតំបន់អាស៊ីអាគ្នេយ៍ដែលជាសម្ពន្ធមិត្តរបស់អាមេរិក បន្ទាប់ពីដំណើរទស្សនកិច្ចរបស់អនុប្រធានាធិបតីសហរដ្ឋអាមេរិក អ្នកស្រី វិនឌី សឺមែន (Wendy Sherman) កាលពីដើមខែមិថុនា ឆ្នាំ២០២១ កន្លងទៅ។
លោក គឹម សុខ អះអាងថា ដំណើរទស្សនកិច្ចនេះអាចនឹងមានកិច្ចសន្យាសហប្រតិបត្តិការក្នុងកម្រិតណាមួយផងដែររវាងចិន និងប្រទេសទាំងនេះ ហើយនេះជាវិធីដែលចិនអាចលេងល្បែងចិត្តសាស្ត្រនយោបាយដើម្បីបង្ហាញថា ការប្រឹងប្រែងរបស់សហរដ្ឋអាមេរិកនៅតំបន់អាស៊ីអាគ្នេយ៍ គឺមិនសូវបានផល ខណៈនយោបាយការទូតរបស់ខ្លួន គឺទទួលបានជោគជ័យច្រើនជាង។
កាលពីថ្ងៃទី៧ ខែកញ្ញា ឆ្នាំ២០២១ សារព័ត៌មានរបស់ចិន China Global Television Network (CGTN) បានចុះផ្សាយថា ទីប្រឹក្សារដ្ឋ និងជារដ្ឋមន្ត្រីការបរទេសប្រជាមានិតចិន លោក វ៉ាង យី នឹងទៅបំពេញទស្សនកិច្ចនៅកម្ពុជា វៀតណាម សិង្ហបុរី និងកូរ៉េខាងត្បូង ចាប់ពីថ្ងៃទី១០ ដល់ថ្ងៃទី១៥ ខែកញ្ញា ឆ្នាំ២០២១ នេះ។
ប្រភពដដែលអះអាងថា អ្នកនាំពាក្យក្រសួងការបរទេសចិន ប្រចាំនៅទីក្រុងប៉េកាំង លោក វ៉ាង វិនប៊ីន លើកឡើងថា ក្នុងអំឡុងពេលដំណើរទស្សនកិច្ចរបស់លោក វ៉ាង យី នឹងធ្វើទំនាក់ទំនងយុទ្ធសាស្ត្រស៊ីជម្រៅជាមួយគ្រប់ភាគីទាំងអស់ និងបង្កើនកិច្ចសហប្រតិបត្តិការខ្សែក្រវាត់ និងផ្លូវ ដោយជំរុញការកសាងសហគមន៍ដែលមានអនាគតរួមគ្នាសម្រាប់មនុស្សជាតិ។
អ្នកនាំពាក្យក្រសួងការបរទេសចិនរូបនេះបញ្ជាក់ថា ចិនបានត្រៀមខ្លួនរួចជាស្រេចក្នុងការធ្វើការជាមួយប្រទេសទាំងបួននេះ ដើម្បីសម្រេចបាននូវសមិទ្ធផលថ្មីៗនៅក្នុងទំនាក់ទំនងទ្វេភាគី និងរួមគ្នាការពារពហុភាគីនិយម និងយុត្តិធម៌អន្តរជាតិ ដើម្បីបញ្ចូលថាមពលវិជ្ជមានបន្ថែមទៀតក្នុងការលើកកម្ពស់សន្តិភាព ស្ថិរភាពនៅក្នុងតំបន់ និងពិភពលោក។
កាលពីថ្ងៃទី២០ ខែឧសភា ឆ្នាំ២០២១ ប្រមុខរដ្ឋាភិបាលកម្ពុជា លោក ហ៊ុន សែន ធ្លាប់បានអះអាងទៅកាន់ប្រទេសក្នុងតំបន់អាស៊ី និងប្រទេសមហាអំណាចពិភពលោកដទៃទៀត ដូចអាមេរិកជាដើមថា បើកម្ពុជាមិនបានពឹងមហាអំណាចកុម្មុយនីស្តចិនទេនោះ កម្ពុជាក៏មិនមានការរីកចម្រើនដូចសព្វថ្ងៃនេះដែរ។
លោកអះអាងថា បើមិនមែនចិនជាអ្នកជួយដល់កម្ពុជាទេ រដ្ឋាភិបាលរបស់លោកក៏មិនមានថ្នាំបង្ការជំងឺ Covid-19 ចាក់ជូនពលរដ្ឋដូចសព្វថ្ងៃនេះដែរ។ ប៉ុន្តែលោកបញ្ជាក់ថា ទោះយ៉ាងណាក៏ដោយ កម្ពុជានៅតែស្វាគមន៍រាល់ជំនួយរបស់ប្រទេសនានាក្រៅពីចិនផងដែរ។
ជុំវិញបញ្ហានេះ កាលពីចុងឆ្នាំ២០២០ អ្នកវិភាគនយោបាយនិងសង្គម បណ្ឌិត ឡៅ ម៉ុងហៃ បានអះអាងថា រដ្ឋាភិបាលកម្ពុជាបានជំពាក់លុយមិត្តដែកថែបរបស់ខ្លួន គឺមហាអំណាចកុម្មុយនីស្តចិន ៥ពាន់លានផោន ដែលស្មើនឹងជាង ៦ពាន់លានដុល្លារអាមេរិក ជាបំណុលដែលស្ថិតក្នុងភាគរយខ្ពស់ជាងគេបង្អស់ក្នុងចំណោមប្រទេស៣០ ដែលជំពាក់លុយមហាយក្សកុម្មុយនីស្តមួយនេះ៕