មន្ត្រីបក្សប្រឆាំងលើកឡើងថា អនាគតកម្ពុជានៅពេលនេះកំពុងស្ថិតក្នុងកណ្ដាប់ដៃលោកនាយករដ្ឋមន្ត្រី ហ៊ុន សែន ដែលត្រូវជ្រើសរើសរវាងប្រយោជន៍ជាតិ និងប្រយោជន៍ផ្ទាល់ខ្លួន ប៉ុន្តែប្រសិនបើមេដឹកនាំខ្មែរគិតផលប្រយោជន៍ជាតិ គឺត្រូវតែប្រើកិច្ចព្រមព្រៀងអន្តរជាតិឆ្នាំ១៩៩១ ធ្វើគោលការណ៍ទប់ស្កាត់មហាអំណាចដែលមានបំណងយាយីលើកម្ពុជា។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសរសេរលើគណនី Facebook របស់លោកនៅថ្ងៃទី១០ ខែកញ្ញា ឆ្នាំ២០២១ ថា មេដឹកនាំខ្មែរបច្ចុប្បន្នគួរតែសិក្សាពីអតីតកាលខ្មៅងងឹតដែលខ្លួនបានធ្លាក់ចូលក្នុងភ្នក់ភ្លើងសង្គ្រាម ដោយសារមេដឹកនាំខ្មែរកន្លងមកដែលហាក់មិនមានគោលជំហរនយោបាយការបរទេសអព្យាក្រឹត្យច្បាស់លាស់។ លោកថា ប្រមុខរដ្ឋាភិបាលកម្ពុជាបច្ចុប្បន្ននេះ ក៏កំពុងធ្លាក់ចូលគន្លងអ្នកដឹកនាំចាស់ៗទាំងនោះដែរ។
លោកអះអាងថា ដើម្បីកុំឲ្យកម្ពុជាដើរធ្លាក់ទៅក្នុងជ្រោះដូចអតីតកាលទៀតនោះ មេដឹកនាំកម្ពុជាបច្ចុប្បន្នមិនគួរប្រកាន់និន្នាការនយោបាយលម្អៀងជ្រុលហួសហេតុទៅរកប្រទេសចិន ដោយវាយប្រហារមហាអំណាចលោកសេរីនោះទេ ព្រោះថាអ្វីដែលកម្ពុជាត្រូវធ្វើ គឺការស្វែងរកការស្ដារ និងកសាងអភិវឌ្ឍសង្គមកម្ពុជាឡើងវិញតាមរយៈគោលនយោបាយការបរទេសជាមួយមហាអំណាចទាំងលោកសេរី និងកុម្មុយនីស្ត ដើម្បីអនាគតកម្ពុជាភ្លឺស្វាងទៅថ្ងៃមុខ។
លោក មាជ សុវណ្ណារ៉ា បញ្ជាក់ថា នៅពេលដែលមេដឹកនាំកម្ពុជាអនុវត្តតាមគោលការណ៍ប្រជាធិបតេយ្យ និងគោរពសិទ្ធិសេរីភាពមូលដ្ឋានរបស់ពលរដ្ឋ គឺជាការបង្ហាញលើឆាកអន្តរជាតិយ៉ាងធំធេងពីការគោរពនីតិរដ្ឋ ស្របតាមកិច្ចព្រមព្រៀងសន្តិភាពទីក្រុងប៉ារីស ១៩៩១ ដែលជាអាវក្រោះការពារខ្លួនពីការប៉ុនប៉ងរំលោភបំពានពីមហាអំណាច ដូចជាអាមេរិក ឬចិន ជាដើម។ លោកថា ប្រទេសមហាអំណាចទាំងនោះក៏ជាម្ចាស់ហត្ថលេខីក្នុងកិច្ចព្រមព្រៀងអន្តរជាតិនេះដែរ ក្នុងការធានាសន្តិភាពរបស់កម្ពុជា។
ការលើកឡើងរបស់មន្ត្រីបក្សប្រឆាំងបែបនេះ ធ្វើឡើងដោយរិះគន់មេដឹកនាំរដ្ឋាភិបាលកម្ពុជាដែលកំពុងបង្កើតនយោបាយការទូតល្អជាមួយមហាអំណាចកុម្មុយនីស្តចិន ប៉ុន្តែងាកទៅបង្កអរិភាពនយោបាយការទូតជាមួយមហាអំណាចលោកសេរីទៅវិញ។
លោកនាយករដ្ឋមន្ត្រី ហ៊ុន សែន បានបញ្ជាក់ជំហររបស់ខ្លួនកាលពីថ្ងៃទី២០ ខែឧសភា ឆ្នាំ២០២១ ទៅកាន់ប្រទេសក្នុងតំបន់អាស៊ី និងមហាអំណាចពិភពលោកដទៃទៀត ដូចជាអាមេរិក ជាដើមថា បើកម្ពុជាមិនបានពឹងមហាអំណាចកុម្មុយនីស្តចិនទេ តើឱ្យកម្ពុជាទៅពឹងមហាអំណាចមួយណា។
លោក ហ៊ុន សែន បញ្ជាក់ថា ដោយសារតែបានមិត្តចិន ទើបកម្ពុជាមានស្ពានឆ្លងទន្លេ មានផ្លូវខ្វាត់ខ្វែង ជាពិសេសវ៉ាក់សាំងប្រឆាំងជំងឺ Covid-19 នេះតែម្តង។ បើមិនមែនមិត្តចិនជាអ្នកផ្តល់ឲ្យទេ កម្ពុជាក៏មិនមានថ្នាំបង្ការចាក់ជូនប្រជាពលរដ្ឋរបស់ខ្លួនដូចសព្វថ្ងៃនេះដែរ។ ប៉ុន្តែលោកបញ្ជាក់ថា ទោះយ៉ាងណាក៏ដោយ កម្ពុជានៅតែស្វាគមន៍រាល់ជំនួយរបស់ប្រទេសនានាក្រៅពីចិនផងដែរ។
ជុំវិញបញ្ហានេះ ក្រុមអ្នកឃ្លាំមើលសង្គមរិះគន់ថា ទំនាក់ទំនងមិត្តដែកថែបរវាងកម្ពុជា-ចិន គ្រាន់តែដើម្បីខ្ចីដៃខ្មែរ ផ្ទះខ្មែរធ្វើទីតាំងជំនួញ និងដើម្បីចំណេញពីផលអនុគ្រោះពន្ធ EBA នៅលើទីផ្សារអឺរ៉ុប ឬ GSP របស់សហរដ្ឋអាមេរិក ជាដើម ដែលអាចឱ្យអ្នកវិនិយោគចិនទទួលបានផលចំណេញរាប់រយលានដុល្លារអាមេរិកក្នុងមួយឆ្នាំៗពីការអនុគ្រោះពន្ធលើមុខទំនិញដែលពួកគេបាននាំចេញពីកម្ពុជា។
ប្រភពដដែលបញ្ជាក់ថា បើទោះបីជាពេលនេះកម្ពុជាត្រូវផ្អាកការអនុគ្រោះពន្ធពីសហភាពអឺរ៉ុប និងភាពមិនច្បាស់លាស់ពី GSP របស់អាមេរិក ក៏ប្រទេសលោកសេរីទាំងនោះនៅតែរង់ចាំផ្តល់ផលអនុគ្រោះពន្ធទាំងនោះដល់កម្ពុជាជានិច្ច ប្រសិនបើរដ្ឋាភិបាលលោក ហ៊ុន សែន ងាកទៅរកការស្ដារលទ្ធិប្រជាធិបតេយ្យ គោរពគោលការណ៍សិទ្ធិមនុស្សឡើងវិញ។
កាលពីអំឡុងខែតុលា ឆ្នាំ២០២០ កម្ពុជា-ចិន បានចុះកិច្ចព្រមព្រៀងពាណិជ្ជកម្មសេរីទ្វេភាគីលើកដំបូង ដើម្បីបង្កើនការនាំចេញពីកម្ពុជាទៅចិនបន្ថែមទៀត ក្រោយពីសហភាពអឺរ៉ុបបានព្យួរការអនុគ្រោះពន្ធរួចមក។ ប៉ុន្តែកិច្ចព្រមព្រៀងពាណិជ្ជកម្មនេះ ត្រូវគេមើលឃើញថាជាការសហការមិនស្មើមុខគ្នា ដោយក្នុងនោះ កម្ពុជានាំទៅចិន មានចំនួនតិចតួចណាស់ បើធៀបទៅនឹងការចូលរបស់ចិនទៅប្រទេសកម្ពុជា ដែលមានទំហំទឹកប្រាក់រាប់ពាន់លានដុល្លារអាមេរិកក្នុងមួយឆ្នាំៗ៕