រដ្ឋកុម្មុយនីស្តផ្ដាច់ការនៅកូរ៉េខាងជើង ដែលជារដ្ឋអាថ៌កំបាំងតែងតែបង្កើតព្រឹត្តិការណ៍អ្វីមួយចម្លែកជាងគេ។ ក្រោមការដឹកនាំរបស់បុរសវ័យក្មេង គីម ជុងអ៊ុន គឺរដ្ឋផ្ដាច់ការសន្តតិវង្សមួយនេះមិនដែលធ្វើអ្វីមួយឱ្យពិភពលោកសាទរ និងស្ងប់អារម្មណ៍ផ្លូវចិត្តនោះទេ។
រដ្ឋមួយនៅឧបទ្វីបកូរ៉េ បើមិនបានគំរាមពិភពលោកដោយការបាញ់កម្ទេចនឹងអាវុធនុយក្លេអ៊ែររបស់ខ្លួន គឺមិនចម្លែកនោះទេ។ រាល់គ្រប់ព្រឹត្តិការណ៍ជាតិ គឺសុទ្ធតែហែក្បួនមីស៊ីលអន្តរទ្វីបបំពាក់ដោយ ក្បាលគ្រាប់នុយក្លេអ៊ែរ គឺមិនអស់ចិត្តឡើយ។
នៅក្នុងពិធីបុណ្យខួបលើកទី៧៣ នៃការបង្កើតសាធារណរដ្ឋប្រជាធិបតេយ្យប្រជាមានិតកូរ៉េ គឺព្រឹត្តិការណ៍នេះបានប្រារព្ធឡើងទាំងយប់ គឺនៅយប់ថ្ងៃព្រហស្បតិ៍ ទី៩ កញ្ញា។ ព្រឹត្តិការណ៍លើកនេះ ប្រព្រឹត្តទៅដោយគ្មានការហែក្បួនមីស៊ីល សព្វាវុធធ្ងន់ៗដូចលើកមុននោះទេ ប៉ុន្តែគេឃើញត្រាក់ទ័រ រថយន្តពន្លត់អគ្គិភ័យជាក្បួនក្នុងព្រឹត្តិការណ៍នេះទៅវិញ។ ចំណែកអ្នកដើរព្យុហយាត្រាភាគច្រើនជាយុវជន កសិករ មន្ត្រីសុខាភិបាល មន្ត្រីរដ្ឋការ ក្នុងឯកសណ្ឋានពណ៌ទឹកក្រូចឆើត និងសុទ្ធតែពាក់ម៉ាស់គ្របមុខជិត។ នៅក្នុងព្រឹត្តិការណ៍នេះ គេឃើញវត្តមានរបស់កម្មាភិបាលជាន់ខ្ពស់ គីម ជុងអ៊ុន ជាមេដឹកនាំកំពូលរបស់រដ្ឋផ្ដាច់ការមួយនេះ ប៉ុន្តែបុរសនេះស្រកទម្ងន់ជាខ្លាំង។
ព្យុហយាត្រាលើកនេះ គឺខុសប្លែកពីក្បួនព្យុហយាត្រាមុនៗនោះ គឺលើកនេះមានសព្វាវុធក្នុងក្បួនមានកាំភ្លើងត្បាល់ប៉ុណ្ណោះ។ កាំភ្លើងត្បាល់ត្រូវអូសនាំមុខដោយត្រាក់ទ័រ។
តាមទីភ្នាក់ងារសារព័ត៌មានមជ្ឈិមបក្ស KCNA អ្នកដែលបើកត្រាក់ទ័រជាកសិករ ចំណែកអ្នកដើរក្នុងក្បួនដង្ហែព្យុហយាត្រាផ្សេងទៀតជាយុវជន ជាភ្នាក់ងារការពារសន្តិសុខសាធារណៈ ជាបុគ្គលិករបស់ក្រុមហ៊ុនអយស្ម័យយាន ក្រុមហ៊ុនផលិតជីកសិកម្ម ក្រុមហ៊ុនដឹកជញ្ជូនផ្លូវអាកាស។ ក្នុងដៃរបស់ពួកគេមានកាន់អាវុធ។ នេះជាសារមួយរបស់ក្រុងព្យុងយ៉ាង ដែលចង់ប្រាប់សហរដ្ឋអាមេរិក និងពិភពខាងក្រៅថា សូម្បីកសិកររបស់ប្រទេសមួយនេះក៏អាចប្រើអាវុធដើម្បីការពារទឹកដី និងរបបដឹកនាំបក្សពលករដែរ។ មានន័យថា មិនមែនមានតែកងទ័ពទេដែលកាន់អាវុធប្រឆាំងរាល់ការឈ្លានពានពីខាងក្រៅ។
ព្យុហយាត្រារបស់ក្រុងព្យុងយ៉ាង ធ្វើឡើងទាំងយប់បានទាក់ទាញការចាប់អារម្មណ៍ពីប្រព័ន្ធផ្សព្វផ្សាយបរទេស។ មិនថាឡើយក្បាលម៉ាស៊ីនឃោសនារបស់កូរ៉េជើង ដែលបានបញ្ចេញរូបភាពនៃព្រឹត្តិការណ៍នេះមកខាងក្រៅ គឺប្រព័ន្ធព័ត៌មានអន្តរជាតិធំៗ ដូចជា BBC CNN CNA Aljazeera NHK ក៏បានផ្សាយបន្តពីប្រព័ន្ធផ្សព្វផ្សាយរបស់កូរ៉េខាងត្បូង យុនហាប់ ផងដែរ។ ព្យុហយាត្រានៃក្រុមឯកសណ្ឋានពណ៌ទឹកក្រូចឆើត និងពាក់ម៉ាស់គ្របមុខជិត។ ក្បួនជិះសេះ និងដឹកឆ្កែទៀតផង គឺជាការទាក់ទាញជាងគេសម្រាប់បណ្ដាញផ្សាយព័ត៌មានអន្តរជាតិធំៗទាំងនេះ។
តែការពិត ក្រុងព្យុងយ៉ាង ប្រហែលជាចង់ប្រាប់ពិភពលោកថា កូរ៉េខាងជើងបានបង្កើតកងកម្លាំងពិសេសក្នុងការប្រយុទ្ធប្រឆាំងការរាតត្បាតនៃជំងឺកូវីដ-១៩ ដែលពិភពលោកទាំងមូលកំពុងជួបអាសន្ន ខណៈរបបកុម្មុយនីស្តដ៏អាថ៌កំបាំងមួយនេះពុំបានប្រកាសប្រាប់ពិភពលោកថា កូរ៉េខាងជើងធ្លាក់ក្នុងជំងឺឆ្លងនេះទេ ហើយសូម្បីជំនួយវ៉ាក់សាំងរបស់ចិន ៣លានដូស ក៏ប្រទេសនេះមិនទទួលយកទុកក្នុងប្រទេសខ្លួនដែរ។ កូរ៉េខាងជើងបានអះអាងថា គ្មានករណីឆ្លងជំងឺកូវីដក្នុងទឹកដីរបស់ខ្លួនឡើយ។
ព្យុហយាត្រាលើកនេះគឺជាព្រឹត្តិការណ៍លើកទី៣ ដែលក្រុងព្យុងយ៉ាងរៀបចំឡើងក្នុងរយៈពេលតែ ១ឆ្នាំ។
ក្នុងព្រឹត្តិការណ៍ទាំងពីរលើកកន្លងមក កូរ៉េខាងជើងតែងឆ្លៀតរៀបចំព្យុហយាត្រាកងទ័ពដ៏មហាសម្បើម។ កាលពីខែតុលាឆ្នាំមុននៅក្នុងឱកាសគម្រប់ខួប ៧៥ឆ្នាំរបស់គណបក្សពលករ គឺរបបក្រុងព្យុងយ៉ាង បានរៀបចំក្បួនព្យុហយាត្រាកងទ័ពដ៏ធំសម្បើម ដែលនៅក្នុងនោះគេឃើញមានការបង្ហាញគ្រាប់មីស៊ីលអន្តរទ្វីបបំពាក់ដោយក្បាលគ្រាប់នុយក្លេអ៊ែរ ដែលជាការបំពាននឹងបម្រាមរបស់អង្គការសហប្រជាជាតិ។
កាលពីខែមករា ឆ្នាំ២០២១ គឺនៅមុនប៉ុន្មានថ្ងៃដែលលោក ចូ បៃដិន ស្បថចូលកាន់តំណែងជាប្រធានាធិបតីអាមេរិក នៅថ្ងៃទី២០ មករា របបកុម្មុយនីស្តមួយនេះក៏បានធ្វើព្យុហយាត្រាកងទ័ពម្តងទៀតដើម្បីប្រារព្ធសមាជបក្សពលករកូរ៉េខាងជើង។ ក្នុងព្រឹត្តិការណ៍នៅពេលនោះ កូរ៉េខាងជើងបង្ហាញមីស៊ីលផ្លោងអន្តរទ្វីបបាញ់ចេញពីនាវាមុជទឹកដែលជាការគំរាមរដ្ឋការលោក បៃដិន យ៉ាងពិតប្រាកដ។ មេដឹកនាំ គីម ជុងអ៊ុន បញ្ជូនសារទៅប្រាប់រដ្ឋការថ្មីលោក បៃដិន ថា កូរ៉េខាងជើងពិតណាស់មានសមត្ថភាពក្នុងការបាញ់មីស៊ីលអន្តរទ្វីបចេញពីនាវាមុជទឹកដែលអាចវាយប្រហារលើដែនដីសហរដ្ឋអាមេរិក។
នេះជាការបង្ហាញទៅសហគមន៍អន្តរជាតិថា កូរ៉េខាងជើងនៅតែមានសមត្ថភាពក្លាយជាមហាអំណាចនុយក្លេអ៊ែរ ទោះជារងការដាក់ទណ្ឌកម្មពីសំណាក់សហគមន៍អន្តរជាតិក្ដី។
ការហែក្បួនព្យុហយាត្រាដែលភាគច្រើនរៀបចំនៅពេលរាត្រីសម្រាប់កូរ៉េខាងជើង គឺធ្វើឡើងដោយមានពិធីបាញ់កាំជ្រួចពណ៌ ជាព្រឹត្តិការណ៍អច្ឆរិយ ជំរុញ និងលើកទឹកចិត្តកសិករឲ្យសប្បាយជឿជាក់លើការដឹកនាំរបស់បក្សពលករនៃប្រទេសសន្តតិវង្សផ្ដាច់ការនៅអាស៊ីខាងកើតមួយនេះ៕