បញ្ញវន្តខ្មែរនៅឯនាយសមុទ្រ ប្រតិកម្មថា មេដាយសន្តិភាពរបស់លោក ហ៊ុន សែន ដែលទើបទទួលបានកាលពីពេលថ្មីៗនេះ គឺជាវិធីនៃការធ្វើប្រជាភិថុតិពលរដ្ឋខ្មែរតែប៉ុណ្ណោះ ត្បិតមេដាយនេះហាក់មិនបង្ហាញពីប្រទេសសាមីដែលផ្តល់ជូនច្បាស់លាស់នោះទេ ស្របពេលប្រទេសលោកសេរីកំពុងបង្កើនទណ្ឌកម្មលើរដ្ឋាភិបាលកម្ពុជាជាបន្តបន្ទាប់។
ប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១៣ ខែកញ្ញា ថា មេដាយរបស់លោក ហ៊ុន សែន នេះ គឺជាការផ្តល់ឲ្យពីក្រុមមេដឹកនាំប្រទេសដែលលក្ខណៈផ្ដាច់ការដូចគ្នា ឬក្រុមមេដឹកនាំប្រទេសប្លុកកុម្មុយនីស្តដែលចូលចិត្តទាក់ទាញមេដឹកនាំផ្ដាច់ការប៉ុណ្ណោះ។
លោកអះអាងថា មេដឹកនាំប្រទេសលោកសេរីដែលស្រឡាញ់លើកតម្កើងប្រជាធិបតេយ្យ មិនអាចផ្តល់មេដាយសន្តិភាពដល់មេដឹកនាំកម្ពុជាកើតទេ ព្រោះថាការបិទសិទ្ធិសេរីភាព និងការចាប់សកម្មជននានាក្រោមការបង្គាប់បញ្ជារបស់លោក ហ៊ុន សែន នៅកម្ពុជាបច្ចុប្បន្ន មិនត្រឹមតែមិនគួរទទួលបានមេដាយសន្តិភាពនេះទេ តែផ្ទុយទៅវិញ គួរតែទទួលបានការដាក់ទណ្ឌកម្មទៅវិញទើបជារឿងត្រឹមត្រូវ។
ប្រធានក្រុមប្រឹក្សាឃ្លាំមើលកម្ពុជារូបនេះបញ្ជាក់ថា ពិតជារឿងគួរឲ្យអស់សំណើចណាស់ដែលមេដាយសន្តិភាពត្រូវប្រគល់ទៅឲ្យមេដឹកនាំដែលតែងរំលោភរដ្ឋធម្មនុញ្ញ រំលោភកិច្ចព្រមព្រៀងអន្តរជាតិឆ្នាំ១៩៩១ ជាន់ឈ្លីលទ្ធិប្រជាធិបតេយ្យ រំលោភសិទ្ធិមនុស្ស ខណៈសកម្មជនបរិស្ថាន និងសកម្មជនសិទ្ធិមនុស្សដែលធ្វើការដើម្បីការពារធនធានធម្មជាតិ ត្រូវបានចោទប្រកាន់ថាជាជនល្មើសពីសំណាក់រដ្ឋាភិបាលដែលកំពុងរំលោភសិទ្ធិមនុស្សទៅវិញ។
កាលពីថ្ងៃទី១២ ខែកញ្ញា ឆ្នាំ២០២១ លោកនាយករដ្ឋមន្ត្រី ហ៊ុន សែន បានសរសេរលើទំព័រ Facebook របស់លោកថា លោកគឺជាស្ថាបនិកសន្តិភាពយ៉ាងពិតប្រាកដនៅកម្ពុជា និងជាមេដឹកនាំគំរូដ៏អស្ចារ្យមួយរូបក្នុងឧបទ្វីបអាស៊ី។
ការលើកឡើងរបស់លោក ហ៊ុន សែន គឺបន្ទាប់ពីលោកទទួលបានមេដាយសហប្រធានកិច្ចប្រជុំកំពូលសន្តិភាពពិភពលោក ឆ្នាំ២០២១ (World Summit Peace) ពីមហាសន្និបាតនៃក្តីសង្ឃឹមលើកទី៧ ក្រោមប្រធានបទស្ដីពី «សន្តិភាពនៅតំបន់អាស៊ីប៉ាស៊ីហ្វិក» កាលពីថ្ងៃអាទិត្យ កន្លងទៅនេះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី១៣ ខែកញ្ញា ឆ្នាំ២០២១ ថា ផ្អែកតាមទង្វើរបស់លោក ហ៊ុន សែន កន្លងមក មិនគួរទទួលបានមេដាយសន្តិភាពនេះទេ ប៉ុន្តែលោកស័ក្ដិសមនឹងបានមេដាយឯកខាងល្មោភអំណាច និងជាអ្នកយុទ្ធសាស្ត្រប្លន់អំណាច តាមរយៈរដ្ឋប្រហារអចិន្ត្រៃយ៍ប្រល័យប្រជាធិបតេយ្យនៅកម្ពុជា ដែលជាគំរូអសោចិ៍នៅអាស៊ាន។
អ្នកវិភាគរូបនេះបញ្ជាក់ថា លោក ហ៊ុន សែន បានបង្ហាញទាំងទង្វើ និងសម្ដីយ៉ាងច្បាស់ពីលក្ខណៈរបស់មេដឹកនាំផ្ដាច់ការ និងជាមេដឹកនាំដែលរំលោភសិទ្ធិមនុស្សយ៉ាងព្រៃផ្សៃ ព្រោះថាមេដឹកនាំខ្មែររូបនេះធ្លាប់បានអះអាងពីភាពសាហាវយង់ឃ្នងរបស់លោកកាលពីអំឡុងខែវិច្ឆិកា ឆ្នាំ២០១៩ កន្លងទៅថា លោកស្ដាយណាស់ដែលលោកមិនបានសម្លាប់មេដឹកនាំគណបក្សប្រឆាំង។
លោក គឹម សុខ បន្ថែមថា សម្ដីរបស់មេដឹកនាំខ្មែរដែលប្រមាថជីវិតជាតិសាសន៍ខ្លួនឯងបែបនេះ ល្មមគ្រប់គ្រាន់វិនិច្ឆ័យបានថាជាមេដឹកនាំដែលគ្មានគុណធម៌នៅក្នុងចិត្ត ខណៈពលរដ្ឋខ្មែររាប់លាននាក់ត្រូវរងការចាប់ខ្លួន រងការបាញ់សម្លាប់ដោយឃាតកម្មផ្សេងៗ ដែលគេសង្ស័យថាគឺជាឃាតកម្មដែលលោក ហ៊ុន សែន ជាប់ពាក់ព័ន្ធ និងជាអ្នកបញ្ជាពីក្រោយខ្នងតែម្តង។
ក្រុមអ្នកសង្កេតការណ៍រិះគន់ថា ក្រោមការដឹកនាំកម្ពុជាជាង ៤០ឆ្នាំមកនេះ ប្រមុខរដ្ឋាភិបាលខ្មែរ លោក ហ៊ុន សែន មិនបានទាន់អាចរកសន្តិភាពជូនពលរដ្ឋខ្មែរបាននៅឡើយទេ ខណៈសន្តិភាពដែលបក្សកាន់អំណាចតែងប្រកាស «អរគុណសន្តិភាព» កន្លងមក គឺជាសន្តិភាពក្រោមចុងកាំភ្លើងតែប៉ុណ្ណោះ។
ប្រភពដដែលអះអាងថា ដើម្បីគ្រប់គ្រងអំណាចដោយឯកបក្សដូចសព្វថ្ងៃ លោក ហ៊ុន សែន បានរំលោភច្បាប់គ្រប់វិធីដើម្បីរំលាយគណបក្សសង្គ្រោះជាតិ ដណ្តើមសមាជិកសភា និងក្រុមប្រឹក្សាឃុំ-សង្កាត់កាលពីឆ្នាំ២០១៧ កន្លងទៅ និងធ្វើរដ្ឋប្រហារដណ្តើមអំណាចពីគណបក្សហ៊្វុនស៊ិនប៉ិច កាលពីឆ្នាំ១៩៩៧ ជាដើម។ ចំណែកឯពេលបច្ចុប្បន្ននេះ លោក ហ៊ុន សែន នៅតែបន្តបិទសិទ្ធិសេរីភាពបញ្ចេញមតិរបស់ពលរដ្ឋ និងចាប់ខ្លួនសកម្មជនសិទ្ធិមនុស្សជាហូរហែដែលរិះគន់ការដឹកនាំផ្ទុយពីរដ្ឋធម្មនុញ្ញ និងច្បាប់អន្តរជាតិនៃរដ្ឋាភិបាលរបស់លោក។
ទាក់ទិននឹងបញ្ហានេះ កាលពីថ្ងៃទី២៨ ខែកក្កដា ឆ្នាំ២០២១ សមាជិករដ្ឋសភាអាមេរិកមកពីគណបក្សសាធារណរដ្ឋ លោក Steve Chabot និងលោក Alan Lowenthal ខាងគណបក្សប្រជាធិបតេយ្យ បានអនុម័តដោយសំឡេងឯកច្ឆន្ទលើសេចក្តីព្រាងច្បាប់ថ្មី ដែលមានចំណងជើងថា «លទ្ធិប្រជាធិបតេយ្យសម្រាប់ប្រទេសកម្ពុជា» ឬហៅកាត់ថា H.R. ដើម្បីដាក់ទណ្ឌកម្មលើរដ្ឋាភិបាលកម្ពុជាដែលកំពុងរំលោភសិទ្ធិមនុស្ស និងប្រជាធិបតេយ្យយ៉ាងធ្ងន់ធ្ងរក្នុងពេលបច្ចុប្បន្ននេះ៕