ពលរដ្ឋជាច្រើនគ្រួសារដែលនាំគ្នាទៅចាប់រានដីធ្វើចម្ការ និងសង់ផ្ទះតូចៗរស់នៅក្នុងឃុំថ្មស ស្រុកបុទុមសាគរ បានចោទមន្ត្រីមន្ទីរបរិស្ថាន និងកម្លាំងចម្រុះនៃរដ្ឋបាលស្រុកបុទុមសាគរ ខេត្តកោះកុង ថាបានចុះទៅរុះរើផ្ទះ និងកាប់ដំណាំហូបផ្លែរបស់ពួកគាត់ខ្ទេចខ្ទីគ្មានសល់ ដើម្បីប្លន់ដីយកទៅប្រគល់ជូនក្រុមហ៊ុនវិនិយោគទាំងកំរោល។
ពលរដ្ឋចាត់ទុកសកម្មភាពរបស់កម្លាំងចម្រុះដឹកនាំដោយមន្ត្រីមន្ទីរបរិស្ថានខេត្តកោះកុង ថាធ្វើឡើងមានលក្ខណៈព្រៃផ្សៃ និងប្រមាថចាប់ពលរដ្ឋដាក់គុក ប្រសិនបើពួកគាត់ណាម្នាក់ហ៊ានចេញមុខតវ៉ា ឬរារាំងសកម្មភាពរបស់ពួកគេនោះ។
ពលរដ្ឋរងគ្រោះ បានសំណូមពរដល់អភិបាលខេត្តកោះកុង អ្នកស្រី មិថុនា ភូថង ជាពិសេសលោក ហ៊ុន សែន ជួយរកយុត្តិធម៌ និងស្នើសុំចូលទៅរស់នៅលើដីចម្ការដាំដុះ និងសង់ផ្ទះរស់នៅដូចដើមឡើងវិញ ត្បិតពួកគាត់មិនមានដីសម្រាប់ធ្វើរបរកសិកម្ម ឬសង់លំនៅឋានរស់នៅឡើយ។ ក្រុមប្រជាពលរដ្ឋអះអាងថា ពួកគាត់បានចូលមករស់នៅលើទីតាំងដីខាងលើនេះប្រមាណ ៥ឆ្នាំកន្លងមកហើយ ដោយមានដាំដុះដំណាំហូបផ្លែផ្សេងៗផង។ ប៉ុន្តែត្រូវអាជ្ញាធរចុះមកកាប់បំផ្លាញចោលដើម្បីយកដីធ្លីដែលពួកគាត់ខំកាប់រានសម្រាប់សង់លំនៅឋានទាំងនោះ ប្រគល់ឲ្យក្រុមហ៊ុនទៅវិញ។
ពលរដ្ឋបញ្ជាក់ថា សកម្មភាពចុះកាប់ផ្ដួលរំលំដើមឈើហូបផ្លែ និងផ្ទះពីក្រុមអាជ្ញាធរ គឺបានចាប់ផ្តើមតាំងពីចុងខែសីហា បន្តមកដល់ខែកញ្ញា នេះ។
ទាក់ទិនបញ្ហានេះ លោក វ៉េត សុនីម អនុប្រធានមន្ទីរបរិស្ថានខេត្តកោះកុង ដែលដឹកនាំកម្លាំងចម្រុះទៅរុះរើផ្ទះ និងកាប់បំផ្លាញដើមឈើហូបផ្លែរបស់ពលរដ្ឋ បានប្រាប់កាសែតក្នុងស្រុកថា សំណង់ខ្ទមតូចៗ និងចម្ការដំណាំជាច្រើនទីតាំងនៅឃុំថ្មស ដែលត្រូវជនខិលខូចមួយចំនួនលួចសាងសង់គ្មានច្បាប់ និងគ្មានការទទួលស្គាល់ពីអាជ្ញាធរមូលដ្ឋានឡើយ ដូច្នេះត្រូវបានអាជ្ញាធរកម្ទេចចោលដើម្បីរឹបអូសយកទីតាំងដីទាំងនោះមកឲ្យរដ្ឋគ្រប់គ្រងវិញ។
លោកបន្តថា មុននឹងឈានដល់ចំណាត់ការផ្លូវច្បាប់ខាងលើនេះ អាជ្ញាធរស្ថាប័នពាក់ព័ន្ធបានចុះអប់រំណែនាំប្រជាពលរដ្ឋទាំងនោះជាច្រើនលើកច្រើនសារួចមកហើយ ប៉ុន្តែពលរដ្ឋទាំងនោះមិនស្តាប់តាមការណែនាំរបស់អាជ្ញាធរទេ មិនត្រឹមតែប៉ុណ្ណោះ បានបន្តចូលទៅកាប់ទន្ទ្រានព្រៃតំបន់នោះសង់ផ្ទះ និងដាំដំណាំផ្សេងៗដោយខុសច្បាប់ទៀត។
លោក វ៉េត សុនីម បន្តថា ក្រុមប្រជាពលរដ្ឋដែលចូលមកទន្ទ្រានកាន់កាប់ដីព្រៃឈើនៅក្នុងតំបន់ឧទ្យានជាតិបុទុមសាគរទាំងនេះ គឺសុទ្ធតែមានផ្ទះ និងដីស្រែចម្ការសម្រាប់បង្កបង្កើនផលរៀងៗខ្លួន ហើយភាគច្រើនជាអ្នកទៅស៊ីឈ្នួលចាំដីចម្ការឲ្យគេជាថ្នូរទទួលបានប្រាក់ឧបត្ថម្ភប្រចាំខែ។
មន្ត្រីរូបនេះបញ្ជាក់ថា សកម្មភាពចូលមកទន្ទ្រានដីព្រៃឈើឃុំថ្មស ស្រុកបុទុមសាគរខាងលើនេះ បានកើតឡើងតាំងពីឆ្នាំ២០១៨ មកម្ល៉េះ ហើយមន្ត្រីជំនាញចុះបង្ក្រាបចំនួន ២លើករួចមកហើយ ប៉ុន្តែពលរដ្ឋទាំងនោះនៅតែបន្តធ្វើសកម្មភាពល្មើសដដែល ស្របពេលអាជ្ញាធរជាប់មមាញឹកក្នុងសកម្មភាពចុះទប់ស្កាត់ជំងឺ Covid-19 ក្នុងរយៈពេលចុងក្រោយនេះ។
លោក វ៉េត សុនីម បន្ថែមថា បច្ចុប្បន្ននេះ មន្ត្រីជំនាញពាក់ព័ន្ធនៃរដ្ឋបាលខេត្តកោះកុង កំពុងពិនិត្យទីតាំងផ្សេងៗទៀតដែលមានបទល្មើសចូលទៅកាប់រានព្រៃឈើរដ្ឋនៅស្រុកបុទុមសាគរ ដើម្បីឈានទៅបញ្ជូនកម្លាំងសមត្ថកិច្ចចុះបង្ក្រាបឲ្យមានប្រសិទ្ធភាព។
យោងតាមអនុក្រឹត្យចុះថ្ងៃទី០២ ខែមីនា ឆ្នាំ២០២១ រាជរដ្ឋាភិបាលបានធ្វើអនុបយោគផ្ទៃដីទំហំជិត ១៣ម៉ឺនហិកតារ (១២៦៩២៨ហិកតារ) ក្នុងតំបន់ការពារធម្មជាតិចំនួន ៨តំបន់ក្នុងភូមិសាស្ត្រខេត្តកោះកុង ដើម្បីកាត់ឆ្វៀលដីជូនពលរដ្ឋដែលបានរស់នៅ និងអាស្រ័យផល ត្រូវកាត់ដីទាំងនេះចែកជូនពួកគាត់តាមជាក់ស្តែង។ ទំហំដីដែលត្រូវកាត់ជូនពលរដ្ឋនៅក្នុងស្រុកបុទុមសាគរ មានចំនួនជាង ៣ម៉ឺនហិកតារ (៣០០៦៤ហិកតារ)។
បញ្ហានេះដែរ ប្រភពពីមន្ត្រីរដ្ឋបាលស្រុកបុទុមសាគរ ស្នើមិនបង្ហាញអត្តសញ្ញាណម្នាក់បានប្រាប់ The Cambodia Daily នៅថ្ងៃទី១៥ ខែកញ្ញា ថា អាជ្ញាធរខេត្តកោះកុង ក្រោមបទបញ្ជាផ្ទៃក្នុងរបស់លោក សុខ សុទ្ធី អភិបាលរងខេត្តកោះកុង បានបញ្ជាឲ្យមន្ត្រីរាជការក្រោមឱវាទ និងមន្ទីរបរិស្ថានខេត្តកោះកុង ចុះទៅរុះរើផ្ទះ និងកាប់បំផ្លាញដំណាំរបស់ពលរដ្ឋដើម្បីពង្រីកទំហំផ្ទៃដីយកទៅផ្តល់ជូនក្រុមហ៊ុនមួយដែលត្រៀមចូលទៅវិនិយោគនៅតំបន់នោះមានផ្ទៃដី ១ម៉ឺនហិកតារ។
តាមប្រភពដដែលបន្តថា ដោយសារតែរដ្ឋបាលខេត្តកោះកុង មិនមានដីគ្រប់ចំនួន ១ម៉ឺនហិកតារសម្រាប់ផ្តល់ជូនក្រុមហ៊ុន ទើបបញ្ជាឲ្យមន្ទីរបរិស្ថាន និងអាជ្ញាធរស្រុកបុទុមសាគរ ចុះទៅដេញពលរដ្ឋចេញពីលំនៅឋាន ដើម្បីយកដីទៅបង្គ្រប់ឲ្យទៅក្រុមហ៊ុនវិនិយោគនោះ៕