លោក ហ៊ុន សែន នៅថ្ងៃព្រហស្បតិ៍ ទី១៦ កញ្ញា អះអាងថា ការចូលទៅក្នុងកិច្ចប្រជុំសម្ងាត់របស់ក្រុមប្រឆាំងតាមប្រព័ន្ធអនឡាញ Zoom កាលពីថ្ងៃមុន គឺគ្រាន់តែជាការផ្តល់សញ្ញាប្រាប់ថា ទោះជានៅកន្លែងណាក៏មានមនុស្សរបស់លោកដែរ ដូច្នេះសូមប្រុងប្រយ័ត្នកុំធ្វើសកម្មភាពណាមួយប្រឆាំងនឹងផលប្រយោជន៍ជាតិឲ្យសោះ។
លោក ហ៊ុន សែន ឆ្លើយតបបែបនេះទៅនឹងគណនី Facebook មួយដែលបានចូលទៅសរសេរបែបឌឺដងឲ្យលោក ហ៊ុន សែន ដោយភ្ជាប់រូបថតរបស់លោកដែលបានចូលទៅក្នុងប្រព័ន្ធ Zoom របស់ក្រុមប្រឆាំងកាលពីពេលថ្មីៗកន្លងទៅនោះ។
គណនី Facebook មួយដែលមានឈ្មោះថា Bunchhay San បានចូលទៅសរសេរក្នុងប្រអប់បញ្ចេញមតិលើទំព័រ Facebook របស់នាយករដ្ឋមន្ត្រីកម្ពុជា នៅថ្ងៃទី១៦ ខែកញ្ញា ឆ្នាំ២០២១ ដោយភ្ជាប់រូបថតរបស់លោក ហ៊ុន សែន ដែលបានចូលទៅក្នុងប្រព័ន្ធ Zoom របស់ក្រុមប្រឆាំងថា សម្តេចចូលក្នុងប្រព័ន្ធ Zoom ជាមួយក្រុមក្បត់ជាតិអ៊ីចឹង អត់ខ្លាចគេចោទសម្តេចថាជាក្រុមតែមួយទេឬ? ប្រយ័ត្នជាប់គុក!
បុរសខ្លាំងនៅកម្ពុជារូបនេះបញ្ជាក់ថា បើចង់តាមចាប់ពួកក្បត់ជាតិត្រូវចូលដល់កន្លែងពួកក្បត់ជាតិ ទើបអាចចាប់ពួកគេបាន ដូច្នេះសង្ឃឹមថាការបកស្រាយរបស់លោកខាងលើនេះ នឹងធ្វើឲ្យអ្នករង់ចាំការយោគយល់ពីរូបលោក នឹងភ្លឺភ្នែក បន្ទាប់ពីពួកគេសន្លប់ធំអស់ប៉ុន្មានថ្ងៃបន្ទាប់ពីលោកបានចូលទៅក្នុងកិច្ចប្រជុំសម្ងាត់តាមប្រព័ន្ធ Zoom របស់ពួកគេកាលពីថ្មីៗនេះ។
លោក ហ៊ុន សែន បន្តទៀតថា លោកបានធ្វើច្រើនណាស់ក្នុងការដឹកនាំជាតិឆ្ពោះទៅរកការបង្រួបបង្រួមជាតិរវាងខ្មែរនិងខ្មែរ ប៉ុន្តែភាគីនយោបាយក្រុមប្រឆាំងមិនយល់អំពីការបង្រួបបង្រួមជាតិនេះទេ ហើយនៅពេលនេះ គ្មានកិច្ចការនយោបាយណាដែលត្រូវដោះស្រាយដោយការចរចាជាមួយក្រុមប្រឆាំងនោះដែរ ហើយសូមកុំសង្ឃឹមថានឹងមានការចរចា ឬការយោគយល់ពីរូបលោកឲ្យសោះ។
លោក ហ៊ុន សែន ក៏បានព្រមានមន្ត្រី និងអ្នកគាំទ្របក្សប្រឆាំងថា ឈប់ស្រមើស្រមៃបន្តទៀតទៅថាគណបក្សសង្គ្រោះជាតិ នឹងរស់ឡើងវិញ ហើយលោកនឹងលើកលែងទោសឲ្យក្រុមប្រឆាំងទាំងនោះ ឬនឹងធ្វើការចរចារកដំណោះស្រាយនយោបាយណាមួយព្រោះតែលោកខ្លាចអន្តរជាតិឲ្យសោះ ប៉ុន្តែពួកអ្នកដែលមានទោស ត្រូវទៅទទួលទោសជាប់គុក ២ភាគ៣ សិនទៅ ចាំគិតដល់រឿងការលើកលែងទោស ឬបន្ធូរបន្ថយទោស។
កាលពីថ្ងៃទី១៣ ខែកញ្ញា ឆ្នាំ២០២១ អ្នកគាំទ្ររដ្ឋាភិបាលក្រុងភ្នំពេញ បានទម្លាយវីដេអូប្រវែងជាង ១៣នាទីអំពីកិច្ចប្រជុំសម្ងាត់ពង្រឹងបណ្ដាញក្នុងស្រុកតាមប្រព័ន្ធអនឡាញក្នុងកម្មវិធីឈ្មោះ Zoom របស់ក្រុមប្រឆាំងដឹកនាំដោយមន្ត្រីជាន់ខ្ពស់បក្សប្រឆាំង ដែលត្រូវលោកនាយករដ្ឋមន្ត្រី ហ៊ុន សែន ចូលទៅទាំងដែលសមាជិកក្នុងអង្គប្រជុំមិនបានដឹងជាមុនទាល់តែសោះ។
ការលេចមុខលោក ហ៊ុន សែន ចូលរួមក្នុងកម្មវិធីប្រជុំរបស់មន្ត្រីបក្សប្រឆាំងនៅក្រៅប្រទេសនេះ ក៏នាំឲ្យអ្នកវិភាគសង្គម និងអ្នកតាមដាននយោបាយបញ្ចេញទស្សនៈយល់ឃើញផ្សេងៗគ្នាពីស្ថានភាព និងរបត់នយោបាយនៅកម្ពុជា ក្នុងន័យវិជ្ជមាន និងអវិជ្ជមានផងដែរ។
ដោយឡែកប្រធានក្រុមប្រឹក្សាឃ្លាំមើលកម្ពុជា និងជាប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១៦ ខែកញ្ញា ថា ការប្រកាសមិនចរចាជាមួយក្រុមប្រឆាំងពីសំណាក់លោក ហ៊ុន សែន មិនមែនជារឿងចម្លែកពេកនោះទេ ព្រោះថាកម្លាំងបក្សប្រឆាំងបានបែកបាក់គ្នាបែបនេះមិនមែនជាសម្ពាធសម្រាប់បក្សកាន់អំណាច ដែលត្រូវបន្ទន់ឥរិយាបថរកការចរចានោះឡើយ។
លោកអះអាងថា ការបែកបាក់សាមគ្គីរបស់ក្រុមប្រឆាំងដូចសព្វថ្ងៃនេះ គឺជាបណ្តាសាធំណាស់សម្រាប់កម្ពុជា ព្រោះថារដ្ឋាភិបាល និងរដ្ឋសភាដែលដឹកនាំដោយឯកបក្សនៅពេលនេះ គេហ៊ានធ្វើអ្វីៗស្រេចតែអំពើចិត្តរបស់មេបក្សកាន់អំណាច ដូចជាការកែច្បាប់ បង្កើតច្បាប់ថ្មីៗដើម្បីការពារអំណាចរបស់ពួកគេទៅថ្ងៃមុខ ជាដើម។
លោក ម៉ែន ណាត បញ្ជាក់ថា វិធីមានតែមួយគត់សម្រាប់ដោះស្រាយវិបត្តិនយោបាយនៅកម្ពុជា គឺក្រុមប្រឆាំងត្រូវតែរកការផ្សះផ្សារវាងក្រុមប្រឆាំងគ្នាឯងជាមុនសិន ដើម្បីពង្រឹងកម្លាំងផ្ទៃក្នុង និងរក្សាស្មារតីរួមឡើងវិញ។ លោកបញ្ជាក់ថា បន្ទាប់ពីក្រុមប្រឆាំងមានកម្លាំងនយោបាយឡើងវិញហើយ គណបក្សកាន់អំណាចច្បាស់ជាបន្ទន់ឥរិយាបថរកការចរចាផ្សះផ្សានយោបាយជាមិនខាន។
ជុំវិញបញ្ហានេះ មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានលើកឡើងក្នុងកម្មវិធី Idea Talk របស់សារព័ត៌មាន The Cambodia Daily កាលពីថ្ងៃទី១៥ ខែកញ្ញា ថា ប្រសិនបើប្រមុខរដ្ឋាភិបាលកម្ពុជា លបចូលទៅក្នុងកិច្ចប្រជុំរបស់លោកវិញ នោះលោកនឹងសួរសំណួរទៅកាន់លោក ហ៊ុន សែន ថា តើរវាងបក្សប្រឆាំង និងបក្សកាន់អំណាច ត្រូវធ្វើដូចម្តេចដើម្បីអាចចរចាគ្នារកដំណោះស្រាយជូនជាតិមាតុភូមិបាន ដើម្បីកុំឲ្យបង្កវិបត្តិនយោបាយដល់ពលរដ្ឋដូចសព្វថ្ងៃនេះ៕