អ្នកឃ្លាំមើលខាងផ្នែកសារព័ត៌មាន អះអាងថា ក្រុមប្រឆាំងគួរតែរៀនសូត្រតាមគំរូមេមាន់ខ្លះទៅ ព្រោះយ៉ាងហោចណាស់មេមាន់ក៏មានចរិតចេះបិទបាំងភាពខ្មាសអៀនរបស់ខ្លួនខ្លះដែរ មុននឹងប្រគល់ខ្លួនឱ្យមាន់ឈ្មោល។
មន្ត្រីជាន់ខ្ពស់នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង បានសរសេរលើគណនី Facebook របស់លោកនៅថ្ងៃទី១៧ ខែកញ្ញា ឆ្នាំ២០២១ ដោយលើកការប្រៀបធៀបហាក់សំដៅការបដិសេធរបស់លោក ហ៊ុន សែន ពីការចរចាជាមួយបក្សប្រឆាំងកាលពីពេលថ្មីៗនេះថា ចរិតពិតរបស់មាន់ឈ្មោលតែងបង្ហាញឫកពាជាអ្នកក្លាហានចេញមកខាងក្រៅឱ្យគេឃើញ ប៉ុន្តែចរិតពិតគឺត្រេកត្រអាលដៀងភ្នែកដាក់គ្នាដើម្បីឱ្យគេជួយបំពេញបំណងខ្លួនឯង។
លោក ប៉ា ងួនទៀង លើកឡើងដោយសំដៅទៅរកបក្សប្រឆាំងថា បើទោះបីខ្លួនចង់ប្រគល់ខ្លួនឲ្យមាន់ឈ្មោលដែលកំពុងតាមកៀងនោះក៏ដោយ មេមាន់តែងធ្វើឫកថ្លៃថ្នូរលាក់បាំងចំណង់របស់ខ្លួនសិនដែរ រហូតដល់មាន់ឈ្មោលនោះព្យាយាមខ្លាំងណាស់ម្តងហើយម្តងទៀតចាំគិតគូររកពេលវេលាសហការគ្នា។
លោក ប៉ា ងួនទៀង បញ្ជាក់ថា តាមពិតការសម្របសម្រួលគ្នារវាងក្រុមនយោបាយបដិបក្ខ គឺជារឿងល្អសម្រាប់ជាតិកម្ពុជា និងពលរដ្ឋខ្មែរ ប៉ុន្តែក្រុមប្រឆាំងគួរតែមានយុទ្ធសាស្ត្រ និងជំហរនយោបាយរបស់ខ្លួនឱ្យបានច្បាស់លាស់ក្នុងការរកផលប្រយោជន៍ជូនជាតិ ព្រោះថាការធ្វើនយោបាយមិនមែនដើម្បីប្រជាប្រិយភាពផ្ទាល់ខ្លួន ឬដើម្បីបក្សខ្លួនឯងនោះទេ។
កាលពីថ្ងៃទី១៦ ខែកញ្ញា ឆ្នាំ២០២១ លោក ហ៊ុន សែន អះអាងថា ការចូលទៅក្នុងកិច្ចប្រជុំសម្ងាត់របស់ក្រុមប្រឆាំងតាមប្រព័ន្ធអនឡាញ Zoom កាលពីប៉ុន្មានថ្ងៃមុននេះ មិនមែនជាសញ្ញាបង្ហាញរកការចរចាដូចការលើកឡើងរបស់អ្នកវិភាគនោះទេ ប៉ុន្តែជាសញ្ញាដែលលោកចង់ប្រាប់ថា បណ្ដាញយកការណ៍របស់លោកមាននៅគ្រប់ទីកន្លែងទាំងអស់។
ទាក់ទងនឹងករណីនេះ លោក ហ៊ុន សែន នៅតែបន្តអះអាងក្នុងសន្និសីទសារព័ត៌មានបើកយុទ្ធនាការចាក់ថ្នាំបង្ការជំងឺ Covid-19 សម្រាប់កុមារនៅវិមានសន្តិភាពនៅថ្ងៃទី១៧ ខែកញ្ញា ឆ្នាំ២០២១ ថា លោកនឹងមិនចរចាជាមួយអ្នកនយោបាយណាមួយទេ ប៉ុន្តែរឿងដែលក្រុមប្រឆាំងត្រូវដោះស្រាយ គឺជាមួយតុលាការប៉ុណ្ណោះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនានិស្សិតដើម្បីលទ្ធិប្រជាធិបតេយ្យ លោក គឹម សុខ បានសរសេរលើគណនី Facebook របស់លោកកាលពីទី១៦ ខែកញ្ញា ថា ការលួចចូលស្តាប់ក្នុងកិច្ចប្រជុំបក្សប្រឆាំងរបស់លោក ហ៊ុន សែន គ្រាន់តែដើម្បីបង្ហាញចរិតអួតអាងជាអ្នកខ្លាំងរបស់គាត់ ដូចជាកម្មករលីដែកដ៏ធំ ប៉ុន្តែការពិតជាដែកដែលប្រហោងក្នុងប៉ុណ្ណោះ។
លោករិះគន់ថា នៅពេលលោក ហ៊ុន សែន លួចចូលស្តាប់ក្នុងកិច្ចប្រជុំរបស់ក្រុមប្រឆាំងបែបនេះ គឺបង្ហាញយ៉ាងច្បាស់ថា លោកគ្មានតម្លៃសូម្បីតែធ្វើនាយករដ្ឋមន្ត្រីចាំផ្ទះ កុំថាឡើយដល់នាយករដ្ឋមន្ត្រីពេញច្បាប់ ព្រោះថាការនិយាយក្អេងក្អាងក្នុងប្រព័ន្ធ ZOOM នោះ គឺជាល្បែងនយោបាយឥតថ្លៃថ្នូរមកលេង ដែលមិនសមទៅនឹងឋានៈរបស់លោកក្នុងនាមជាមេដឹកនាំប្រទេសនោះទេ៕