អ្នកឃ្លាំមើលសង្គមប្រតិកម្មថា មេដឹកនាំខ្មែរគួរតែប្រើភ្នែកទិព្វ និងដៃទិព្វរាប់ពាន់ដែលខ្លួនមាន តាមដានមន្ត្រីខិលខូចដែលធ្វើបាបពលរដ្ឋ ជាជាងការប្រើភ្នែក និងដៃទិព្វរាប់ពាន់ទាំងនោះទៅគាបសង្កត់សិទ្ធិបញ្ចេញមតិរបស់ពលរដ្ឋដែលបានចូលរួមក្នុងជីវភាពនយោបាយ សេដ្ឋកិច្ច និងសង្គម ដូចមានចែងក្នុងរដ្ឋធម្មនុញ្ញនាពេលកន្លងមក។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកនៅថ្ងៃទី២០ ខែកញ្ញា ឆ្នាំ២០២១ ថា ប្រសិនបើរដ្ឋាភិបាលកម្ពុជាប្រើភ្នែកទិព្វរាប់ពាន់ និងដៃទិព្វរាប់ពាន់របស់ខ្លួនសម្រាប់ចាប់មន្ត្រីពុករលួយ មន្ត្រីរំលោភអំណាច មន្ត្រីបំពានសិទ្ធិមនុស្ស មិនបម្រើរាស្ត្រ អ្នកជួញដូរគ្រឿងញៀន អ្នកប្រើប្រាស់អំពើហិង្សា និងជនឧក្រិដ្ឋជាច្រើនផ្សេងទៀតនោះ គឺជាសុភមង្គលយ៉ាងធំធេងសម្រាប់ពលរដ្ឋខ្មែរ។
លោកបានទាញការប្រៀបធៀបថា ដូចព្រះបរមពោធិសត្វអវលោកិតេស្វរៈ ដែលមានភ្នែកមួយពាន់ និងដៃមួយពាន់ បានជួយរំដោះទុក្ខសត្វលោកឲ្យមានសុភមង្គល ដែលប្រសើរជាងក្រុងរាពណ៍ ដែលមានក្បាលច្រើន និងដៃច្រើន ប៉ុន្តែប្រព្រឹត្តតែអំពើអាក្រក់មិនបានជួយរំដោះទុក្ខដល់សត្វលោកឲ្យមានសុភមង្គលទេ បែរជាបង្កបញ្ហាឲ្យសត្វលោកទៅវិញ។
បណ្ឌិត ឡៅ ម៉ុងហៃ បញ្ជាក់ថា ដូចគ្នានេះដែរ ប្រសិនបើមេដឹកនាំខ្មែរប្រើភ្នែកទិព្វរាប់ពាន់ និងដៃទិព្វរាប់ពាន់ទាំងនោះសម្រាប់សម្លឹងរកប្រយោជន៍ផ្ទាល់ខ្លួន គ្រួសារ និងបក្ខពួក ឬដើម្បីបង្ក្រាប និងគាបសង្កត់អ្នកប្រើប្រាស់សិទ្ធិចូលរួមក្នុងជីវភាពនយោបាយ សេដ្ឋកិច្ច សង្គម និងវប្បធម៌របស់ប្រទេសជាតិជាដើមនោះ ក៏ជាវិនាសកម្មដ៏ធំធេងរបស់កម្ពុជាដែរ។
ការរិះគន់របស់អ្នកវិភាគបែបនេះ ធ្វើឡើងស្របពេលដែលរដ្ឋាភិបាលកម្ពុជាសព្វថ្ងៃនេះត្រូវគេរិះគន់ថា កំពុងប្រើអំណាចនយោបាយរបស់ខ្លួនគាបសង្កត់លំហសិទ្ធិសេរីភាពបញ្ចេញមតិរបស់ពលរដ្ឋដែលធ្វើឱ្យកាន់តែចង្អៀតឡើងៗ។
កាលពីថ្ងៃទី១៦ ខែកញ្ញា ឆ្នាំ២០២១ លោក ហ៊ុន សែន អះអាងថា លោកមានបណ្ដាញយកការណ៍នៅគ្រប់ទីកន្លែងទាំងអស់ដើម្បីតាមដានក្រុមដែលមានមតិផ្ទុយពីការដឹកនាំរបស់លោក ដូច្នេះទោះបីជាពួកគេធ្វើអ្វីក៏ដោយ ក៏លោកអាចដឹងបានដែរ។
មេដឹកនាំដែលក្រាញអំណាចយូរជាងគេនៅលើលោករូបនេះអះអាងថា ការតាមដានព័ត៌មានរបស់ក្រុមប្រឆាំង មិនមែនជាការរំលោភសិទ្ធិបុគ្គល ឬដើម្បីធ្វើទុក្ខបុកម្នេញពួកគេនោះទេ គឺដើម្បីតែការពារសុវត្ថិភាព និងសន្តិសុខជាតិជូនពលរដ្ឋតែប៉ុណ្ណោះ ព្រោះថាខ្សែបណ្ដាញរបស់អ្នកទាំងនោះ គឺធ្វើឡើងក្នុងចេតនាដើម្បីផ្ដួលរំលំរដ្ឋាភិបាលរបស់លោកប៉ុណ្ណោះ។
យ៉ាងណាក៏ដោយ កម្ពុជាដែលត្រូវបានគ្រប់គ្រងដោយរដ្ឋាភិបាលឯកបក្សនៃគណបក្សប្រជាជនកម្ពុជាសព្វថ្ងៃនេះ ត្រូវគេមើលឃើញថា កំពុងរឹតត្បិតសេរីភាពបញ្ចេញមតិយ៉ាងធ្ងន់ធ្ងរចំពោះអ្នកដែលហ៊ានរិះគន់រដ្ឋាភិបាលដឹកនាំដោយលោក ហ៊ុន សែន បច្ចុប្បន្ន។ ជាងនេះទៅទៀត រដ្ឋាភិបាលមួយនេះកំពុងមានភាពល្បីល្បាញខាងការចាប់ខ្លួនអ្នកទាំងនោះផងដែរ ដូចជាសកម្មជនការពារសិទ្ធិមនុស្ស សកម្មជនបរិស្ថាន សកម្មជននយោបាយ និងបណ្ឌិតបញ្ញវន្តខ្មែរ ជាដើម។
រដ្ឋធម្មនុញ្ញ និងកតិកាសញ្ញាអន្តរជាតិបានចែងយ៉ាងច្បាស់អំពីសិទ្ធិ និងករណីយកិច្ចរបស់ប្រជាពលរដ្ឋខ្មែរ ប៉ុន្តែមេដឹកនាំខ្មែរដែលទទួលការបណ្តុះបណ្តាលពីបក្សកុម្មុយនីស្តវៀតណាមរូបនេះ ហាក់មិនបានអនុវត្តតាមរដ្ឋធម្មនុញ្ញរបស់ខ្លួនទេ ប៉ុន្តែលោក ហ៊ុន សែន បែរជាប្រើរដ្ឋធម្មនុញ្ញជាឈ្នាន់ការពារអំណាច និងធ្វើបាបពលរដ្ឋខ្លួនឯងទៅវិញ៕