ពលរដ្ឋជាម្ចាស់ដីមួយកន្លែងនៅក្នុងស្រុកទឹកឈូ ខេត្តកំពត ចោទលោក គឹម ញ៉ក់ ប្រធានអន្តរវិស័យសាលាខេត្តកំពត ថាបានឆ្លៀតឱកាសក្នុងអំឡុងពេលរដ្ឋាភិបាលបិទខ្ទប់ការឆ្លងរាតត្បាតជំងឺ Covid-19 ក្នុងសហគមន៍ បានបញ្ជាឱ្យបក្ខពួកសម្រុកដឹកដីចាក់ធ្វើរបងហ៊ុមព័ទ្ធដី និងសង់រោងនៅលើដីចំណីផ្លូវរថភ្លើងរបស់រដ្ឋដោយខុសច្បាប់ ហើយបិទផ្លូវឆ្លងកាត់របស់ប្រជាពលរដ្ឋថែមទៀត។
ប្រជាពលរដ្ឋរស់នៅភូមិបឹងតារោង ឃុំព្រៃឃ្មុំ ស្រុកទឹកឈូ ខេត្តកំពត បានបញ្ជាក់ថា ការដឹកដីសង់រោង និងបិទផ្លូវមិនឲ្យម្ចាស់ដីនៅផ្នែកខាងក្រោយចេញចូលរបស់លោក គឹម ញ៉ក់ បានកើតឡើងនៅក្នុងអំឡុងខែឧសភា ឆ្នាំ២០២១ ដោយសំអាងលើក្រដាសកិច្ចសន្យាលក់ដីមួយសន្លឹកចុះហត្ថលេខាដោយលោក គុយ យ៉ា មេឃុំព្រៃឃ្មុំ បណ្តាលឱ្យម្ចាស់ដីនៅផ្នែកខាងក្រោយគ្មានផ្លូវចេញចូលផ្ទះ ឬដីទេ។
ពលរដ្ឋបន្តថា វិវាទបិទផ្លូវឆ្លងកាត់នេះ លោក គឹម ញ៉ក់ បានទាមទារលុយចំនួន ៣ម៉ឺនដុល្លារអាមេរិក និងទំហំផ្ទៃដីចំនួន ១៥ម៉ែត្រជាថ្នូរនឹងការរុះរើបើកផ្លូវដែលបានចាក់ដី និងធ្វើរបងហ៊ុមព័ទ្ធនោះឲ្យពលរដ្ឋអាចចេញចូលដូចដើមវិញ។
ពលរដ្ឋរងគ្រោះ បានស្នើដល់លោក ជាវ តាយ អភិបាលខេត្តកំពត ជួយអន្តរាគមន៍ទៅលោក គឹម ញ៉ក់ ប្រធានអន្តរវិស័យសាលាខេត្តកំពត ឲ្យបើកផ្លូវធ្វើដំណើរឲ្យពលរដ្ឋចេញចូលដូចធម្មតាឡើងវិញ។ ជាងនេះទៀត ក៏ស្នើឲ្យពិនិត្យទៅលើសកម្មភាពអនុវត្តការងាររបស់លោក គឹម ញ៉ក់ ថាតើបុគ្គលរូបនេះបានអនុវត្តត្រឹមត្រូវតាមតួនាទីរបស់ខ្លួនដែរឬទេ មិនត្រឹមតែប៉ុណ្ណោះ សំអាងតួនាទីរបស់ខ្លួនបំពានដីសាធារណៈថែមទៀត។ ពលរដ្ឋបន្តថា វិវាទបិទផ្លូវនេះ ពួកគាត់បានដាក់ពាក្យបណ្តឹងទៅអាជ្ញាធរមូលដ្ឋានចាប់ពីថ្នាក់ឃុំរហូតដល់ថ្នាក់ស្រុក ឲ្យជួយអន្តរាគមន៍លើករណីនេះ ប៉ុន្តែនៅមិនទាន់មានលទ្ធផលច្បាស់លាស់នៅឡើយ។
ទាក់ទិនបញ្ហានេះ លោក នាក់ សុវណ្ណារី អភិបាលស្រុកទឹកឈូ បានឲ្យដឹងប្រព័ន្ធផ្សព្វផ្សាយក្នុងស្រុកដឹងកាលពីថ្ងៃទី២៨ ខែកញ្ញា ថា ករណីបិទផ្លូវធ្វើដំណើរខាងលើនេះ រូបលោកធ្លាប់បានចេញលិខិតពីរបីដងរួចហើយ ដើម្បីស្នើដល់ភាគីទំនាស់សម្របសម្រួលរកដំណោះស្រាយជាមួយគ្នា។ រដ្ឋបាលស្រុកទឹកឈូ ក៏ធ្លាប់បានចេញលិខិតឲ្យភាគីលោក គឹម ញ៉ក់ ឱ្យរុះរើរបងនេះចេញអស់ម្ដងរួចហើយ។
លោកបន្តថា កាលពីឆ្នាំ២០២០ ក្នុងអំឡុងពេលមន្ត្រីជំនាញគណៈកម្មការស្រុកទឹកឈូ ចុះវាស់វែងដីស្រែខាងលើ គឺមិនមានអ្នកណាម្នាក់ទៅធ្វើរបង ឬចាក់ដីហ៊ុមព័ទ្ធបិទផ្លូវ ដែលពលរដ្ឋឆ្លងកាត់នេះទេ គឺទើបតែឃើញធ្វើរបង និងសង់ផ្ទះក្នុងប៉ុន្មានខែចុងក្រោយនេះប៉ុណ្ណោះ។
ទោះជាបែបនេះ សារព័ត៌មាន The Cambodia Daily នៅមិនទាន់អាចទាក់ទងលោក គឹម ញ៉ក់ ប្រធានអន្តរវិស័យខេត្តកំពត ដើម្បីបំភ្លឺជុំវិញការចោទប្រកាន់បានទេនៅថ្ងៃទី២៩ ខែកញ្ញា ឆ្នាំ២០២១ នេះ៕