កាសែត The Guardian បានកែសម្រួលខ្លឹមសារអត្ថបទរបស់ខ្លួនថា លោក ហ៊ុន សែន មិនមែនជាមនុស្សដែលស្ថិតក្នុងចំណោមអ្នកដែលទទួលបានលិខិតឆ្លងដែនពីប្រទេស Cyprus នោះទេ ប៉ុន្តែអ្នកដែលកាន់លិខិតឆ្លងដែននៃប្រទេសនេះគឺជាមន្ត្រីធំៗក្បែរខ្លួនគាត់ប៉ុណ្ណោះ។
ការចេញអត្ថបទកែសម្រួលខ្លឹមសាររបស់ខ្លួននេះ ធ្វើឡើងបន្ទាប់ពីក្រសួងយុត្តិធម៌កម្ពុជា បានស្នើសុំកិច្ចសហការពីរដ្ឋមន្ត្រីក្រសួងយុត្តិធម៌ប្រទេស Cyprus ដើម្បីស្រាវជ្រាវជុំវិញការចុះផ្សាយថា លោក ហ៊ុន សែន មានលិខិតឆ្លងដែននៃសាធារណរដ្ឋស៊ីប (Cyprus) ឬមានសញ្ជាតិស៊ីប កាលពីពេលថ្មីៗនេះ។
កាសែត The Guardian កាលពីថ្ងៃទី៦ ខែតុលា ឆ្នាំ២០២១ ដែលមានទីស្នាក់ការកណ្តាលនៅចក្រភពអង់គ្លេស បានបំភ្លឺពីអត្ថបទរបស់ខ្លួនដែលបានចុះផ្សាយកាលពីថ្ងៃទី៣ ខែតុលា ឆ្នាំ២០២១ ថា គឺជាការចុះផ្សាយមិនត្រឹមត្រូវ ដែលថាលោក ហ៊ុន សែន ជាមនុស្សស្ថិតក្នុងចំណោមអ្នកដែលបានកាន់កាប់លិខិតឆ្លងដែនរបស់ប្រទេស Cyprus។
ប្រភពដដែលបញ្ជាក់ថា មានតែមន្ត្រីធំៗដែលនៅក្បែរលោក ហ៊ុន សែន ប៉ុណ្ណោះដែលត្រូវបានគេរកឃើញថាស្ថិតនៅក្នុងចំណោមជនជាតិមិនមែនអឺរ៉ុបរាប់ពាន់នាក់ដែលបានទទួលលិខិតឆ្លងដែនពីប្រទេសលើកោះនៅទ្វីបអឺរ៉ុបមួយនេះ។
កាលពីថ្ងៃទី៣ ខែតុលា ឆ្នាំ២០២១ កាសែត The Guardian បោះពុម្ពអត្ថបទមួយដែលមានចំណងជើងថា «ការិយាល័យច្បាប់របស់ប្រធានាធិបតីស៊ីប (Cyprus) ត្រូវបានចោទប្រកាន់ពីបទលាក់បាំងទ្រព្យសម្បត្តិរបស់ជនជាតិរុស្ស៊ី ដែលរត់គេចខ្លួន» ក្នុងនោះក៏បានចោទប្រកាន់ថាលោក ហ៊ុន សែន ក៏ជាមនុស្សស្ថិតក្នុងចំណោមអ្នកដែលបានទទួលលិខិតឆ្លងដែនពីប្រទេស Cyprus ផងដែរ។
ជុំវិញបញ្ហានេះ រដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្ងៃទី៦ ខែតុលា ឆ្នាំ២០២១ បានស្នើសុំកិច្ចសហការពីរដ្ឋមន្ត្រីក្រសួងយុត្តិធម៌នៃប្រទេស Cyprus ដើម្បីស្រាវជ្រាវជុំវិញការចោទប្រកាន់ថា លោក ហ៊ុន សែន មានលិខិតឆ្លងដែននៃសាធារណរដ្ឋស៊ីប (Cyprus) ឬមានសញ្ជាតិស៊ីប ដើម្បីបញ្ជាក់ឱ្យឃើញការពិតច្បាស់លាស់ជូនដល់សាធារណជន និងប្រជាជនកម្ពុជាទាំងមូល និងដើម្បីធានារក្សាកិត្តិយស និងសេចក្តីថ្លៃថ្នូររបស់កម្ពុជា និងនាយករដ្ឋមន្ត្រីរបស់ខ្លួន។
ជុំវិញការចោទប្រកាន់មេដឹកនាំកម្ពុជានេះ រដ្ឋមន្ត្រីការបរទេសរបស់កម្ពុជា លោក ប្រាក់ សុខុន បានផ្ញើលិខិតមួយច្បាប់កាលពីថ្ងៃទី៦ ខែតុលា ឆ្នាំ២០២១ ទៅកាន់រដ្ឋមន្ត្រីការបរទេសនៃសាធារណរដ្ឋ Cyprus លោក នីកូស គ្រីស្តូឌូលីដេស (Nikos Christodoulides) ថា រដ្ឋាភិបាលកម្ពុជាមានការមិនពេញចិត្តយ៉ាងខ្លាំងចំពោះសារព័ត៌មាន The Guardian ដែលបានចុះផ្សាយមិនពិតថាមេដឹកនាំរបស់ខ្លួនស្ថិតក្នុងចំណោមជនជាតិមិនមែនអឺរ៉ុបរាប់ពាន់នាក់ដែលបានទទួលលិខិតឆ្លងដែននៃប្រទេស Cyprus។
រដ្ឋមន្ត្រីការបរទេសកម្ពុជារូបនេះបានស្នើឲ្យរដ្ឋមន្ត្រីការបរទេសនៃសាធារណរដ្ឋ Cyprus ផ្តល់កិច្ចសហការដើម្បីស្រាវជ្រាវរកការពិតឲ្យឃើញចំពោះការចោទប្រកាន់ដែលមានចេតនាអាក្រក់ ដើម្បីផ្តល់ភាពយុត្តិធម៌ កិត្តិយស និងសេចក្តីថ្លៃថ្នូរជូនមេដឹកនាំកម្ពុជា និងដើម្បីឲ្យមតិសាធារណៈជាតិ និងអន្តរជាតិបានយល់ច្បាស់អំពីការពិតចំពោះការចោទប្រកាន់នេះ។
កាលពីអំឡុងឆ្នាំ២០១៩ ភ្នាក់ងារសារព័ត៌មាន រ៉យទ័រ (Reuter) បានចេញផ្សាយរបាយការណ៍របស់ខ្លួនដោយបង្ហាញអំពីសមាជិក និងខ្សែស្រឡាយ ព្រមទាំងមន្ត្រីជាន់ខ្ពស់របស់លោក ហ៊ុន សែនដែលទទួលបានសញ្ជាតិ Cypriots ក្នុងអំឡុងឆ្នាំ២០១៦ និងឆ្នាំ២០១៧ ក្រោយការបោះទុនវិនិយោគនៅប្រទេសកូនកោះមួយនេះជាង ២លានដុល្លារសហរដ្ឋអាមេរិក ហើយក្រៅពីនោះ ពួកគេក៏កំពុងស្វែងរកសញ្ជាតិ Cypriots ជាបន្តបន្ទាប់ផងដែរ។
ប្រភពដដែលអះអាងថា ខ្សែស្រឡាយលោក ហ៊ុន សែន ទាំងនោះរួមមាន អ្នកស្រី ហ៊ុន គឹមឡេង ដែលជាភរិយាអគ្គស្នងការនគរបាលជាតិ លោក នេត សាវឿន និងកូនបង្កើតរបស់លោក ហ៊ុន ណេង ដែលជាបងប្រុសបង្កើតលោក ហ៊ុន សែន និងកូនស្រី ២នាក់ទៀត។
បន្ថែមពីនេះ ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន និងភរិយារបស់លោក គឺអ្នកស្រី អ៊ឹម ប៉ូលីកា ក៏ទទួលបានសញ្ជាតិ Cyprus នេះដែរ។
ទាក់ទិននឹងបញ្ហានេះ រដ្ឋាភិបាលប្រទេស Cyprus អះអាងថា ខ្លួននឹងស៊ើបអង្កេតតាមដំណាក់កាលនីមួយៗលើករណីដែលសាច់ញាតិរបស់លោក ហ៊ុន សែន ដែលទទួលបានសញ្ជាតិពីប្រទេសមួយនេះ ហើយរដ្ឋាភិបាល Cyprus ក៏បានព្រមានដកហូតលិខិតឆ្លងដែនពួកគេផងដែរ ប្រសិនបើមានករណីចាំបាច់ណាមួយនោះ។
ប្រទេស Cypriots មានផែនការវិនិយោគដើម្បីទទួលបានសញ្ជាតិដោយបង្កើតឡើងតាំងពីឆ្នាំ២០១៣ ដែលក្នុងនោះការវិនិយោគទឹកប្រាក់អប្បបរមា ២លានអឺរ៉ូ ឬជាង ២លានដុល្លារអាមេរិក ព្រមទាំងអាចទិញលិខិតឆ្លងដែន និងការធ្វើដំណើរដោយគ្មានទិដ្ឋាការនៅទូទាំងសហភាពអឺរ៉ុបទៀតផង៕