អាណាព្យាបាលមួយចំនួនបានចោទក្រុមគ្រូពេទ្យនៃមន្ទីរពេទ្យបង្អែកមិត្តភាពកម្ពុជា-ចិន សែនសុខ ថាបានឃុបឃិតគ្នាបង្កើតកម្មវិធីប្រមូលលុយពីអាណាព្យាបាលជាសាធារណៈ លើសេវាចាក់វ៉ាក់សាំងការពារជំងឺ Covid-19 ដល់កុមារ ដែលប្រាសចាកពីការណែនាំរបស់ក្រសួងសុខាភិបាល។
អាណាព្យាបាលម្នាក់មានវ័យជាង ៥០ឆ្នាំ រស់នៅខណ្ឌសែនសុខ ដែលនាំកូនស្រីទៅចាក់វ៉ាក់សាំង បានប្រាប់សារព័ត៌មាន The Cambodia Daily ដឹងតាម Messenger Facebook នៅថ្ងៃចន្ទ ទី១១ ខែតុលា នេះថា រូបភាពនៃការប្រមូលលុយពីអាណាព្យាបាលកុមាររបស់ក្រុមគ្រូពេទ្យនោះ ធ្វើឡើងដោយយកប្រអប់ ឬកេសសម្រាប់ដាក់ម៉ាស់ យកទៅដាក់តាំងនៅលើតុដើម្បីទុកឱ្យអាណាព្យាបាលរបស់កុមារដែលនាំកូនៗទៅចាក់វ៉ាក់សាំងទាំងនោះ ដាក់លុយចូលក្នុងប្រអប់នោះចាប់ពី ៥ពាន់រៀលទៅ ១០ដុល្លារអាមេរិក ជាថ្នូរឲ្យកូនៗរបស់ពួកគាត់អាចឆាប់បានចាក់វ៉ាក់សាំង មិនរង់ចាំយូរ។
ប្រភពបន្តទៀតថា ភាពមិនប្រក្រតីទាំងនេះបានកើតឡើងកាលពីរសៀលថ្ងៃទី០៩ ខែតុលា ឆ្នាំ២០២១ នៅមន្ទីរពេទ្យបង្អែកមិត្តភាពកម្ពុជា-ចិន សែនសុខ ក្នុងអាសយដ្ឋានដីឡូត៍លេខ៣២៨ ផ្លូវសែនសុខ៥ ភូមិសែនសុខ៥ សង្កាត់ឃ្មួញ ខណ្ឌសែនសុខ រាជធានីភ្នំពេញ។
ប្រភពដដែលបញ្ជាក់ថា ក្រុមជួរមុខ ឬបុគ្គលិកដែលជាកន្លែងផ្ដល់លេខរៀង និងបំពេញប្រវត្តិរូបឱ្យកុមារនៅទីតាំងខាងលើ មានគ្នាចំនួន ៥នាក់ ក្នុងនោះមានបុរស ៣នាក់ និងស្ត្រី ២នាក់។ ប្រភពដដែលបញ្ជាក់ថា ប្រសិនបើមិនដាក់លុយចូលប្រអប់នេះទេ នោះក្រុមគ្រូពេទ្យនឹងប្រើពាក្យសម្ដីមិនសូវពីរោះ ឬមានអាកប្បកិរិយាមិនសមរម្យមកលើអាណាព្យាបាលទាំងនោះ។
បន្ថែមលើនេះ នៅពេលអាណាព្យាបាលបានបំពេញបែបបទរួចហើយ គឺកុមារត្រូវទៅអង្គុយរង់ចាំចាក់វ៉ាក់សាំងនៅកន្លែងមួយដែលបានរៀបចំទុកនៅផ្នែកខាងក្នុង។ ប៉ុន្តែជារឿយៗ គេតែងសង្កេតឃើញក្រុមគ្រូពេទ្យបានលើកយកថ្នាំវ៉ាក់សាំងទៅចាក់ឱ្យក្មេងៗអ្នកមានខ្សែ និងបក្ខពួករបស់គេ ដោយទុកឲ្យក្រុមកុមារគ្មានខ្សែ ឬគ្មានបក្ខពួកទាំងនោះអង្គុយរង់ចាំអូសបន្លាយពេលរាប់ម៉ោង។
ករណីស្រដៀងគ្នានេះ មានអាណាព្យាបាលផ្ញើសារមកកាន់សារព័ត៌មាន The Cambodia Daily ពីភាពមិនប្រក្រតីមួយចំនួនទៀតផងដែរ។
សារព័ត៌មាន The Cambodia Daily នៅមិនទាន់អាចទាក់ទងអ្នកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យ ដើម្បីបំភ្លឺជុំវិញភាពមិនប្រក្រតីខាងលើបានទេ នៅថ្ងៃចន្ទ ទី១១ ខែតុលា ឆ្នាំ២០២១ នេះ។ ប៉ុន្តែតាមការចុះផ្សាយរបស់សារព័ត៌មានក្នុងស្រុក បានដកស្រង់សម្ដីអ្នកស្រី ឱ វណ្ណឌីន ផ្សាយថា អ្នកស្រីមិនបានដឹងរឿងខាងលើនេះទេ។
ប៉ុន្តែអ្នកស្រី ឱ វណ្ណឌីន ទទួលស្គាល់ថា កន្លងមកមានអាណាព្យាបាលខ្លះជូនកូនៗមកយឺត និងខ្វះឯកសារបញ្ជាក់អត្តសញ្ញាណជាដើម ដោយស្នើសុំឱ្យក្រុមគ្រូពេទ្យជួយសម្រួល ហើយអាណាព្យាបាលមួយចំនួននោះក៏បានជូនលុយកាក់តិចតួចទៅក្រុមគ្រូពេទ្យទាំងនោះ តែនេះវាជារឿងពួកគាត់ថ្លែងអំណរគុណពេទ្យតែប៉ុណ្ណោះ។ អ្នកស្រី ឱ វណ្ណឌីន បានសន្យាថានឹងឱ្យខាងមន្ត្រីជំនាញក្រសួងសុខាភិបាល ចុះស្រាវជ្រាវលើករណីមិនប្រក្រតីទាំងនេះ៕