គ្រូបង្រៀនម្នាក់នៅខេត្តប៉ៃលិន បន្តដាក់ពាក្យបណ្ដឹងទៅតុលាការកំពូល ដើម្បីស្វែងរកយុត្តិធម៌ផ្ទាល់ខ្លួន បន្ទាប់ពីតុលាការឧទ្ធរណ៍បានសម្រេចឲ្យលោកចាញ់ក្ដីក្នុងករណីតុលាការខេត្តបាត់ដំបង ដែលបានចោទប្រកាន់លោកពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ដោយសារតែលោកបានរិះគន់រដ្ឋាភិបាលកម្ពុជាសង់ស្តូបវៀតណាម ក្នុងខេត្តប៉ៃលិន។
លោក យួង សូដា ដែលជាគ្រូបង្រៀនសាលាបឋមសិក្សានៅខេត្តប៉ៃលិន អះអាងថា លោកនឹងដាក់ពាក្យបណ្តឹងទៅតុលាការកំពូលបន្តទៀត ដើម្បីស្វែងរកយុត្តិធម៌លើករណីនេះ ព្រោះថាទាំងមន្ត្រីតុលាការ និងពលរដ្ឋសុទ្ធសឹងតែជាពលរដ្ឋខ្មែរដូចគ្នា ដូច្នេះហេតុអ្វីគ្រាន់តែយុវជនខ្មែរចូលរួមកិច្ចការសង្គមដើម្បីជាតិមាតុភូមិរបស់ខ្លួន ត្រូវទទួលទោសបែបនេះទៅវិញ។
លោក យួង សូដា បានប្រាប់សារព័ត៌មាន The Cambodia Daily នៅថ្ងៃទី១៨ តុលា នេះថា ជនរងគ្រោះស្លូតត្រង់ដែលបានធ្លាក់ចូលដល់ដៃតុលាការហើយ គឺពិតជាពិបាកនឹងទទួលបានយុត្តិធម៌ណាស់ ជាក់ស្តែងករណីរបស់លោកផ្ទាល់ គ្រាន់តែបញ្ចេញមតិយោបល់ដើម្បីជាតិមាតុភូមិខ្លួនឯងសោះ បែរជារងការចោទប្តឹងទាំងអយុត្តិធម៌ទៅវិញ។ ដូច្នេះ ពលរដ្ឋខ្មែរល្មមស្គាល់តុលាការកម្ពុជាបច្ចុប្បន្ននេះគ្រប់គ្រាន់ដែរហើយថា ពួកគេបម្រើប្រជាជន ឬបម្រើអ្នកមានអំណាចនោះ។
សាលាឧទ្ធរណ៍ខេត្តបាត់ដំបង បានចេញសាលដីកាកាលពីថ្ងៃទី២៨ ខែកញ្ញា ឆ្នាំ២០២១ កន្លងទៅថា តុលាការបានសម្រេចចោទលោក យួង សូដា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍តាមបញ្ញត្តិមាត្រា៤៩៥ នៃក្រមព្រហ្មទណ្ឌ ដែលសាមីខ្លួនបានប្រព្រឹត្តលើបណ្ដាញសង្គម Facebook កាលពីដើមខែកញ្ញា ឆ្នាំ២០២០ កន្លងទៅ។
ប្រភពដដែលអះអាងថា ការចោទប្រកាន់តាមមាត្រាខាងលើនេះ គឺដោយសារលោក យួង សូដា បានបង្ហោះសារក្នុងបណ្ដាញសង្គមដោយប្រើពាក្យញុះញង់ ក្នុងចេតនាទុច្ចរិតបង្កឱ្យមានភាពវឹកវរដល់សន្តិសុខសង្គម ដែលនឹងឈានទៅរកការបង្កើតបទឧក្រិដ្ឋផ្សេងៗ ប្រសិនបើមិនមានការទប់ស្កាត់ទាន់ពេលទេនោះ។
ការសម្រេចនេះ ធ្វើឡើងក្រោយលោក យួង សូដា បានដាក់ពាក្យប្តឹងទៅកាន់សាលាឧទ្ធរណ៍ ដើម្បីជំទាស់ទៅនឹងសាលក្រមរបស់សាលាដំបូងខេត្តប៉ៃលិន ដែលបានចោទរូបលោកពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ កាលពីដើមខែកញ្ញា ឆ្នាំ២០២០ កន្លងទៅ។
កាលពីថ្ងៃទី៦ ខែកញ្ញា ឆ្នាំ២០២០ លោក យួង សូដា បានសរសេរលើគណនី Facebook របស់លោកដោយភ្ជាប់ជាមួយរូបភាពស្តូបមិត្តភាពកម្ពុជា-វៀតណាម ដែលមានខ្លឹមសារថា៖ «អ្នកប៉ៃលិន ពេលទំនេរជិះកាត់ស្ពានស្ទឹងតារៀប សូមក្រឡេកមើលទៅទិសខាងលិចផង»។ លោកបន្តថា៖ «ឥឡូវនេះយើងមានស្តូបសឹងគ្រប់ខេត្តក្រុងហើយ អ៊ីចឹងសង្ឃឹមថា យើងនឹងមានទង់ជាតិពីរបង្ហូតឡើងក្នុងពេលតែមួយដូចប្រទេសឡាវ ដែរ»។
ទោះយ៉ាងណា លោក យួង សូដា អំពាវនាវឱ្យមន្ត្រីអនុវត្តច្បាប់គ្រប់លំដាប់ថ្នាក់ទាំងអស់ គួរតែប្រើវិជ្ជាជីវៈរបស់ខ្លួនបម្រើពលរដ្ឋដោយស្មោះត្រង់ ជាជាងធ្វើតាមតែបញ្ជារបស់អ្នកមានអំណាច។ លោកថា អ្នកអនុវត្តច្បាប់គប្បីប្រើវិជ្ជាជីវៈស្របតាមមនសិការរបស់ខ្លួនក្នុងនាមជាមន្ត្រីរបស់រដ្ឋការពារយុត្តិធម៌ជូនសង្គមជាតិ បើមិនដូច្នោះទេ ប្រព័ន្ធយុត្តិធម៌នេះនឹងនៅតែទទួលរងការរិះគន់ពីគ្រប់មជ្ឈដ្ឋានជាតិ និងអន្តរជាតិដដែល។
ទាក់ទិននឹងបញ្ហានេះ ក្រុមអ្នកឃ្លាំមើលសង្គមលើកឡើងថា រដ្ឋធម្មនុញ្ញបានចែងយ៉ាងច្បាស់អំពីសិទ្ធិ និងករណីយកិច្ចរបស់ពលរដ្ឋខ្មែរ ប៉ុន្តែរដ្ឋាភិបាលកម្ពុជាបង្កើតច្បាប់ក្រមព្រហ្មទណ្ឌស្ដីពីការញុះញង់ឱ្យប្រព្រឹត្តបទល្មើសមាត្រា៤៩៤ និង ៤៩៥ គឺក្នុងចេតនាដើម្បីបំបិទសិទ្ធិ និងករណីយកិច្ចរបស់ប្រជាពលរដ្ឋខ្មែរទាំងស្រុង ដែលជាច្បាប់រំលោភលើរដ្ឋធម្មនុញ្ញយ៉ាងធ្ងន់ធ្ងរ។
ដោយឡែកមន្ត្រីជាន់ខ្ពស់អង្គការឃ្លាំមើលសិទ្ធិមនុស្សប្រចាំតំបន់អាស៊ី លោក ហ្វីល រ៉ូបឺតសុន ធ្លាប់បានរិះគន់នៅក្នុងសម័យប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីចុងឆ្នាំ២០២០ ថា ការចោទប្រកាន់របស់អាជ្ញាធរកម្ពុជាលើការសម្ដែងមតិរបស់ពលរដ្ឋខ្មែរដោយអហិង្សា គឺជាការប្រើប្រាស់បទបញ្ញត្តិនៃក្រមព្រហ្មទណ្ឌមិនត្រឹមត្រូវ ដើម្បីតែការពាររដ្ឋាភិបាល ជាជាងការធានាសិទ្ធិបញ្ចេញមតិដោយសន្តិវិធីរបស់ពលរដ្ឋ។
មាត្រា៣៥ នៃរដ្ឋធម្មនុញ្ញ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ ហើយសេចក្តីស្នើទាំងឡាយរបស់ប្រជាពលរដ្ឋត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕