មន្ត្រីជាន់ខ្ពស់របស់រដ្ឋាភិបាលកម្ពុជា អះអាងថា លោក ហ៊ុន សែន និងលោក ស ខេង អនុញ្ញាតឱ្យប្រជាពលរដ្ឋគ្រប់មជ្ឈដ្ឋាន ផ្ញើសារទៅកាន់មេដឹកនាំបក្សកាន់អំណាចដោយផ្ទាល់ ដើម្បីលើកឡើងពីសេចក្ដីត្រូវការជាចាំបាច់ ឬបញ្ហាប្រឈមក្នុងមូលដ្ឋាន ដើម្បីអាចដោះស្រាយបញ្ហាឱ្យបានទាន់ពេល និងមានប្រសិទ្ធភាព ខណៈអ្នកឃ្លាំមើលបង្ហាញពីការមិនទុកចិត្តលើការអះអាងនេះ។
អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានសរសេរលើគណនី Facebook របស់ខ្លួននៅថ្ងៃទី២១ តុលា នេះថា រដ្ឋាភិបាលកម្ពុជាមានឆន្ទៈ និងការប្ដេជ្ញាខ្ពស់ប្រែក្លាយស្ថាប័នរដ្ឋាភិបាលទៅជាអ្នកផ្ដល់សេវាសាធារណៈ និងជាអ្នកបម្រើរាស្ដ្រប្រកបដោយប្រសិទ្ធភាព ឆ្លើយតបនឹងតម្រូវការ និងផលប្រយោជន៍សង្គមជាតិទាំងមូល។
លោកអះអាងថា ដើម្បីសម្រេចបាននូវចក្ខុវិស័យបម្រើរាស្ដ្រប្រកបដោយប្រសិទ្ធភាព រដ្ឋាភិបាលកម្ពុជាបានដាក់ចេញនូវយន្តការបង្កើតអ្នកនាំពាក្យក្រសួង ស្ថាប័ន រួមទាំងអ្នកនាំពាក្យរាជធានី-ខេត្ត ជាពិសេសគឺអង្គភាពអ្នកនាំពាក្យរាជរដ្ឋាភិបាលដែលមានភារកិច្ចស្នូល គឺ “ផ្សព្វផ្សាយ និងឆ្លើយឆ្លង” ដើម្បីដោះស្រាយបញ្ហាជូនប្រជាពលរដ្ឋឱ្យបានទាន់ពេល។
អ្នកនាំពាក្យរូបនេះបញ្ជាក់ថា ក្នុងការអនុវត្តនយោបាយបើកចំហបែបនេះ បង្ហាញចេញនូវភាពជិតស្និទ្ធ ការយកចិត្ដទុកដាក់ និងភក្ដីភាពរបស់រដ្ឋដើម្បីភាពសុខសាន្ដ និងសុខដុមរមនារបស់រាស្ដ្រក្នុងដំណើរការកសាង និងអភិវឌ្ឍជាតិ។
ទោះយ៉ាងណា អ្នកនាំពាក្យរបស់សមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២១ តុលា នេះថា ការដោះស្រាយកង្វល់ជូនប្រជាពលរដ្ឋ គឺរឿងល្អប្រសើរហើយ ប៉ុន្តែបើពិនិត្យលើការដោះស្រាយកន្លងមករបស់រដ្ឋាភិបាល គឺមិនទាន់មានភាពល្អប្រសើរនៅឡើយទេ ដូចជាបញ្ហារំលោភសិទ្ធិមនុស្ស បញ្ហាការចាប់ខ្លួនសកម្មជននានា គឺនៅតែកើតមានដដែល។
លោកអះអាងថា ការបញ្ចេញមេដឹកនាំជាន់ខ្ពស់របស់រដ្ឋាភិបាលឱ្យចេញមុខដោះស្រាយបែបនេះ ក៏ជាតឹកតាងមួយបញ្ជាក់យ៉ាងច្បាស់ដែរថា ប្រព័ន្ធរដ្ឋបាលនៅថ្នាក់ក្រោមជាតិរបស់រដ្ឋាភិបាល គឺគាំងរហូតប្រើការមិនកើតតែម្តង។ ជាងនេះទៀត ចំពោះការប្ដេជ្ញារបស់រដ្ឋាភិបាលនេះមិនទាន់គួរឱ្យទុកចិត្តបាននៅឡើយទេ ព្រោះថាខាងសង្គមស៊ីវិលមិនទាន់បានឃើញពីយន្តការរបស់រដ្ឋាភិបាលជាក់លាក់ណាមួយនៅឡើយ។
លោក ស៊ឹង សែនករុណា បញ្ជាក់ថា ដើម្បីដោះស្រាយបញ្ហាជូនប្រជាពលរដ្ឋឱ្យបានល្អ មិនចាំបាច់ដល់ថ្នាក់បញ្ជូនរឿងនៅមូលដ្ឋានទៅឱ្យប្រមុខរដ្ឋាភិបាលចេញមុខដោះស្រាយនោះឡើយ គ្រាន់តែចាត់វិធានការច្បាប់ឱ្យបានហ្មត់ចត់លើមន្ត្រីមូលដ្ឋានឱ្យបំពេញការងាររបស់ខ្លួនស្របតាមតួនាទីដែលខ្លួនមាននោះ គឺជាការបម្រើសេវាសាធារណៈដ៏ល្អណាស់ហើយសម្រាប់ការដោះស្រាយបញ្ហានៅមូលដ្ឋាន។
កាលពីថ្ងៃទី២០ ខែតុលា ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង បានអះអាងថា លោកបានទទួលសំណូមពរ និងសំណួររបស់ប្រជាពលរដ្ឋស្ថិតក្នុងដែនសមត្ថកិច្ចក្រសួងមហាផ្ទៃ ចំនួន ៦៩ករណី និងដោះស្រាយបាន ៣៦ករណី ដោយឡែកករណីផ្សេងទៀតដែលពលរដ្ឋលើកជាមតិយោបល់ និងសំណូមពរ កំពុងស្ថិតក្នុងដំណាក់កាលដោះស្រាយ ខណៈសំណូមពរ សំណួរ និងបញ្ហាខ្លះទៀតត្រូវបានរកឃើញថា ខុសពីសមត្ថកិច្ចក្រសួងមហាផ្ទៃ។
ក្រុមអ្នកឃ្លាំមើលសង្គមលើកឡើងថា ផែនការ និងការសន្យាចំពោះប្រជាពលរដ្ឋរបស់រដ្ឋាភិបាលកម្ពុជា ច្រើនតែបំផុសបំផុលមុនការបោះឆ្នោតមកដល់ ដើម្បីទាក់ទាញសន្លឹកឆ្នោតពីប្រជាពលរដ្ឋប៉ុណ្ណោះ ប៉ុន្តែផែនការ និងការសន្យាទាំងនោះនឹងរលាយបាត់ទៅវិញនៅពេលដែលបោះឆ្នោតបានចប់សព្វគ្រប់ ដូច្នេះផែនការថ្មីនេះក៏ប្រហែលជាមិនខុសពីលើកមុនៗនោះដែរ៕