តំណាងអយ្យការអមសាលាដំបូងខេត្តពោធិ៍សាត់ បានចេញដីកាកោះហៅអភិបាលរងស្រុកវាលវែង ម្នាក់ឱ្យចូលបំភ្លឺនៅដើមខែវិច្ឆិកា ខាងមុខនេះ តាមបណ្ដឹងរបស់មេបញ្ជាការរងវរៈលេខ១៤៤ ពាក់ព័ន្ធនឹងការបំផ្លិចបំផ្លាញទ្រព្យសម្បត្តិនៅឃុំថ្មដា ស្រុកវាលវែង កាលពីថ្ងៃទី២០ ខែកុម្ភៈ ឆ្នាំ២០២១។
ក្នុងដីកាចុះថ្ងៃទី២១ ខែតុលា ឆ្នាំ២០២១ ព្រះរាជអាជ្ញារងអមសាលាដំបូងខេត្តពោធិ៍សាត់ លោក ខាំ វណ្ណមុន្នីរ័ត្ន បានកោះហៅអភិបាលរងស្រុកវាលវែង លោក ចាន់ វិចិត្រ ឱ្យចូលបំភ្លឺនៅសាលាដំបូងខេត្តនេះនាថ្ងៃទី០៤ ខែវិច្ឆិកា ឆ្នាំ២០២១ ពាក់ព័ន្ធនឹងករណីចោទប្រកាន់ថាបាន «បំផ្លិចបំផ្លាញទ្រព្យសម្បត្តិ» ប្រព្រឹត្តនៅចំណុចភ្លុកដំរី ក្នុងភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់ កាលពីថ្ងៃទី២០ ខែកុម្ភៈ ឆ្នាំ២០២១។
ដីកាដដែលឱ្យដឹងថា ការកោះហៅធ្វើឡើងតាមបណ្ដឹងរបស់មេបញ្ជាការរងវរៈលេខ១៤៤ ចំណុះកងពលតូចអន្តរាគមន៍លេខ១៤ លោក រ៉ាយ កន ដោយចោទអភិបាលរងស្រុកវាលវែង គឺលោក ចាន់ វិចិត្រ ថាបានបំផ្លិចបំផ្លាញទ្រព្យសម្បត្តិនៅក្នុងដីចម្ការរបស់មេបញ្ជាការរងវរៈ១៤៤ លោក រ៉ាយ កន ស្ថិតនៅចំណុចភ្លុកដំរី ភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់។
ទោះយ៉ាងណា សារព័ត៌មាន The Cambodia Daily មិនទាន់អាចសុំការបំភ្លឺពីអភិបាលរងស្រុកវាលវែង លោក ចាន់ វិចិត្រ ពាក់ព័ន្ធនឹងការចោទប្រកាន់របស់មេបញ្ជាការរងវរៈ១៤៤ លោក រ៉ាយ កន បានទេនៅថ្ងៃទី២៩ ខែតុលា នេះ៕