លោក ហ៊ុន សែន បានលើកឡើងនៅថ្ងៃខួប ៤៥ឆ្នាំនៃការស្លាប់កូនរបស់លោកក្នុងរបបខ្មែរក្រហមថា ក្នុងនាមជាឪពុក លោកមិនអាចសុំមេបញ្ជាការរបស់ខ្លួនយកសាកសពកូនខ្លួនឯងទៅបញ្ចុះឱ្យបានត្រឹមត្រូវឡើយ ដែលករណីនេះជាសោកនាដកម្មមួយធ្វើឱ្យលោកមិនអាចបំភ្លេចបាន ខណៈអ្នកឃ្លាំមើលសង្គមលើកឡើងថា លោកមិនត្រូវដឹកនាំប្រទេសឲ្យដូចទៅនឹងការឈឺចាប់របស់ខ្លួននោះឡើយ។
លោក ហ៊ុន សែន បានសរសេរលើទំព័រ Facebook របស់លោកនៅថ្ងៃទី១០ វិច្ឆិកា នេះថា ក្នុងរបបប្រល័យពូជសាសន៍ ប៉ុល ពត ប្រជាជនទូទាំងប្រទេសមានសិទ្ធិតិចជាងសត្វឆ្កែ ឬឆ្មាទៅទៀត ដែលសត្វទាំងនោះមានសិទ្ធិការពារកូនខ្លួនឯងច្រើនជាងមនុស្ស ប៉ុន្តែលោកត្រូវតែទ្រាំអត់ធ្មត់ដើម្បីរំដោះប្រជាជនកម្ពុជាទូទាំងប្រទេសចេញពីរបបឃោរឃៅនេះ។
លោកអះអាងថា ដើម្បីទឹកដី និងពលរដ្ឋខ្មែររាប់លាននាក់មានជីវិតរស់ លោកត្រូវតែអត់ធ្មត់ធ្វើតាមបញ្ជារបស់ពួកឃាតក ហើយការអត់ធ្មត់នេះបានជួយឱ្យលោកអាចរួមចំណែកដឹកនាំចលនាតស៊ូរំដោះជាតិ និងប្រជាជនពីរបបប្រល័យពូជសាសន៍ ប៉ុល ពត និងកសាងប្រទេសបានរីកចម្រើនរហូតដល់សព្វថ្ងៃនេះ។
មេដឹកនាំបក្សកាន់អំណាច លោក ហ៊ុន សែន បានត្អូញត្អែរពីទុក្ខសោកខ្លួនឯងនៅថ្ងៃទី១០ ខែវិច្ឆិកា ឆ្នាំ២០២១ នេះ ស្របពេលនៃខួប ៤៥ឆ្នាំនៃការស្លាប់កូនប្រុសរបស់លោកនៅក្នុងរបបប្រល័យពូជសាសន៍ ប៉ុល ពត កាលពីឆ្នាំ១៩៧៦ ដែលលោកបានចាត់ទុកថាជារបបសាហាវឃោរឃៅបំផុតនៅកម្ពុជា។
ទោះជាបែបនេះក្តី ក្រុមអ្នកសង្កេតការណ៍រិះគន់ថា ការដឹកនាំរបស់រដ្ឋាភិបាលឯកបក្សដែលជ្រោមជ្រែងដោយវៀតណាមខុសពីការដឹកនាំក្នុងរបបប្រល័យពូជសាសន៍ ប៉ុល ពត តែរូបភាពប៉ុណ្ណោះ ប៉ុន្តែរបៀបដឹកនាំ និងការគ្រប់គ្រង គឺដូចគ្នាទាំងស្រុង ដូចជាការបំបិទសិទ្ធិសេរីភាពពលរដ្ឋលើការបញ្ចេញមតិ ការចាប់ខ្លួនសកម្មជនសង្គមតាមអំពើចិត្ត ការបណ្តោយឲ្យមានអំពើនិទ្ទណ្ឌភាព និងអំពើពុករលួយតាំងពីថ្នាក់លើរហូតដល់ថ្នាក់ក្រោម។
កាលពីថ្ងៃទី១៩ ខែវិច្ឆិកា ឆ្នាំ២០១៩ អតីតមេកម្មាភិបាលខ្មែរក្រហម លោក ហ៊ុន សែន ធ្លាប់បានគំរាមថា លោកស្តាយណាស់ដែលមិនបានសម្លាប់មេដឹកនាំបក្សប្រឆាំងដែលបានរៀបផែនការផ្ដួលរំលំរដ្ឋាភិបាលរបស់លោក។
រហូតមកទល់ពេលនេះ សមត្ថកិច្ចនៅតែមិនព្រមរកយុត្តិធម៌ដល់សកម្មជនសង្គមល្បីៗមួយចំនួនដែលត្រូវបានសម្លាប់ ដូចជាអ្នកស្រី ពិសិដ្ឋ ពិលីកា លោក ឈុត វុទ្ធី លោក ជា វិជ្ជា បណ្ឌិត កែម ឡី ការសម្លាប់កម្លាំងទ័ពរបស់គណបក្សរាជានិយមក្នុងព្រឹត្តិការណ៍បង្ហូរឈាមឆ្នាំ១៩៩៧ រាប់រយនាក់ ដែលបានសារភាពចុះចាញ់ និងមនុស្សជាច្រើនទៀត។
អ្នកវិភាគនយោបាយ សង្គម និងជាអនុប្រធានចលនាពលរដ្ឋដើម្បីប្រជាធិបតេយ្យ (PMD) លោក គឹម សុខ បានសរសេរលើគណនីហ្វេសប៊ុករបស់លោកនៅថ្ងៃទី១០ វិច្ឆិកា នេះថា កាយវិការដែលលោក ហ៊ុន សែន ធ្វើបុណ្យសែនព្រេនរាល់ឆ្នាំ ឧទ្ទិសកុសលដល់វិញ្ញាណក្ខន្ធកូនរបស់គាត់ គឺជាគុណធម៌ក្នុងនាមជាឪពុក។
លោក គឹម សុខ បញ្ជាក់ថា អំពើដែលមេដឹកនាំឧស្សាហ៍គំរាមសម្លាប់ពលរដ្ឋខ្លួនរូបនេះ បានប្រព្រឹត្តបាបកម្មនយោបាយកម្ទេចប្រជាជាតិខ្មែរ គឺជាអំពើអគុណធម៌ក្នុងនាមជាមេដឹកនាំខ្មែរ ហើយពួកកូនៗដែលនៅមានជីវិតរបស់លោក ហ៊ុន សែន ដែលបានចូលរួមប្រព្រឹត្តបាបកម្មទាំងនេះ នឹងទទួលបានផលកម្មតបស្នងវិញដោយចៀសមិនផុតឡើយ។
ចំណែកសកម្មជនបក្សប្រឆាំង លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី១០ វិច្ឆិកា នេះដែរថា ការរំឭកពីការឈឺចាប់របស់លោកនាយករដ្ឋមន្ត្រី ហ៊ុន សែន ក្នុងរបបប្រល័យពូជសាសន៍ ប៉ុល ពត គួរតែជាមេរៀនដ៏សំខាន់សម្រាប់ភាពជាអ្នកដឹកនាំរបស់គាត់ ដែលកំពុងដឹកនាំកម្ពុជានៅពេលនេះ ព្រោះថាពលរដ្ឋខ្មែរសុទ្ធតែរងការឈឺចាប់ខ្លោចផ្សាដោយសារការបាត់បង់សមាជិកគ្រួសាររបស់ខ្លួនក្នុងសម័យនោះ ហើយការដឹកនាំដែលជាន់ឈ្លីជាតិសាសន៍ឯងបែបនេះ ពលរដ្ឋខ្មែរគ្រប់ស្រទាប់វណ្ណៈមិនចង់ឱ្យកើតមានទៀតនោះទេ។
សកម្មជនគណបក្សសង្គ្រោះជាតិរូបនេះអះអាងថា ការជិះជាន់គាបសង្កត់ដើម្បីបំបិទសំឡេងរិះគន់របស់រដ្ឋាភិបាលបច្ចុប្បន្ននេះ គឺមិនខុសពីអតីតកាលដែលមេដឹកនាំគណបក្សកាន់អំណាចគ្រប់គ្នាបានឆ្លងកាត់នោះដែរ ហើយបទពិសោធន៍នៃការឈឺចាប់របស់មេដឹកនាំទាំងនោះក្នុងអតីតកាល គួរណាស់តែពួកគេយល់ពីការឈឺចាប់របស់ពលរដ្ឋខ្មែរដែលកំពុងរងការគាបសង្កត់ក្រោមការដឹកនាំរបស់ខ្លួនសព្វថ្ងៃនេះ។
លោក ហ៊ុន កុសល បញ្ជាក់ថា ទោះបីការដឹកនាំបច្ចុប្បន្នមិនដូចរបប ប៉ុល ពត ក៏ដោយ ប៉ុន្តែការគំរាមកំហែង និងការចោទប្រកាន់ចាប់ដាក់គុកយ៉ាងអនាធិបតេយ្យបច្ចុប្បន្ននេះ បានគំរាមកំហែងដល់អ្នករិះគន់ការដឹកនាំមិនត្រឹមត្រូវរបស់រដ្ឋាភិបាលយ៉ាងធ្ងន់ធ្ងរ ដែលជាសកម្មភាពមួយបង្ហាញឱ្យឃើញនូវការរំលោភបំពានសិទ្ធិមនុស្ស និងសិទ្ធិនយោបាយរបស់ពលរដ្ឋខ្មែរដែលការពារដោយរដ្ឋធម្មនុញ្ញយ៉ាងជាក់ច្បាស់មិនអាចប្រកែកបាន៕