អតីតមេដឹកនាំបក្សប្រឆាំង លោក សម រង្ស៊ី អះអាងថា កម្ពុជាបានក្លាយទៅជាទីលានឃោសនានយោបាយសម្រាប់វ៉ាក់សាំងចិន ដោយយកពលរដ្ឋខ្មែរធ្វើជាសត្វកណ្តុរដើម្បីពិសោធវ៉ាក់សាំងទាំងនោះ ខណៈលោក ហ៊ុន សែន សម្ដែងមោទកភាពចំពោះវ៉ាក់សាំងរបស់ចិនពេញទំហឹង។
អតីតប្រធានគណបក្សសង្គ្រោះជាតិ លោក សម រង្ស៊ី បានសរសេរលើទំព័រ Facebook របស់លោកនៅថ្ងៃទី១៩ ខែវិច្ឆិកា នេះថា គ្រោះថ្នាក់សម្រាប់សុខភាពសាធារណៈរបស់ពលរដ្ឋខ្មែរតែងតែកើតមានឡើងនៅពេលណាដែលអ្នកកាន់អំណាចយករឿងនយោបាយ មកលាយឡំជាមួយរឿងសុខាភិបាលដូចមេដឹកនាំបក្សកាន់អំណាចនៅកម្ពុជាកំពុងតែធ្វើសព្វថ្ងៃនេះ។
អតីតមេដឹកនាំបក្សប្រឆាំងរូបនេះអះអាងថា ករណីនៅប្រទេសកម្ពុជាបង្ហាញឲ្យឃើញយ៉ាងច្បាស់ថា ជនផ្ដាច់ការតែងតែធ្វើសេចក្តីសម្រេចគ្រប់បែបយ៉ាងតែម្នាក់ឯង និងដោយអត្តនោម័តិ ជាពិសេសក្នុងវិស័យដែលទាមទារឲ្យមានចំណេះដឹងបច្ចេកទេស និងបទពិសោធន៍ដែលជនផ្ដាច់ការមិនចេះ គឺជាគ្រោះមហន្តរាយដ៏ធំសម្រាប់សុខភាពពលរដ្ឋខ្មែរទូទាំងប្រទេស។
ការអះអាងរបស់អតីតមេបក្សប្រឆាំងនេះ ធ្វើឡើងគឺផ្ទុយស្រឡះពីជំហររបស់ប្រមុខរដ្ឋាភិបាលកម្ពុជាទាំងស្រុង ដែលតែងតែបង្ហាញពីមោទកភាពក្នុងការប្រើប្រាស់វ៉ាក់សាំងប្រឆាំងវីរុស Covid-19 របស់ប្រទេសចិន សព្វថ្ងៃនេះ។
កាលពីថ្ងៃទី១៧ ខែវិច្ឆិកា ឆ្នាំ២០២១ កន្លងទៅ ប្រមុខរដ្ឋាភិបាលលោក ហ៊ុន សែន អះអាងថា ក្នុងរយៈពេលជិត ២ឆ្នាំមកនេះ រដ្ឋាភិបាលកម្ពុជាបានកំណត់យកការចាក់វ៉ាក់សាំងជាវិធានការគន្លឹះបន្ថែមលើវិធានការសំខាន់ៗដទៃទៀត ដើម្បីទប់ស្កាត់ការឆ្លងរីករាលដាលជំងឺ Covid-19 ក្នុងការជួយសង្គ្រោះអាយុជីវិតប្រជាពលរដ្ឋខ្មែរ។
គិតត្រឹមថ្ងៃទី១៧ ខែវិច្ឆិកា ឆ្នាំ២០២១ នេះ កម្ពុជាបានបញ្ជាទិញវ៉ាក់សាំងប្រឆាំងវីរុស Covid-19 ពីប្រទេសចិន សរុបមានចំនួន ៣៦លាន ៨សែនដូសហើយ ក្នុងនោះ ៨លាន ៣សែនដូស គឺជាជំនួយរបស់ចិនសម្រាប់កម្ពុជាផងដែរ។
នាយកប្រតិបត្តិរបស់អង្គការអភិវឌ្ឍន៍ផ្នត់គំនិត បណ្ឌិត សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៩ វិច្ឆិកា នេះថា ការរិះគន់របស់អតីតមេដឹកនាំបក្សប្រឆាំងអាចជាការប្រើវោហារស័ព្ទនយោបាយរបស់ខ្លួន ដើម្បីស្វែងរកការចាប់អារម្មណ៍ ឬទាញយកប្រជាប្រិយភាពពីពលរដ្ឋត្រឡប់មកវិញតែប៉ុណ្ណោះ។
លោកបន្តថា សម្រាប់ការរិះគន់រវាងអ្នកនយោបាយខ្មែរមួយចំនួន ច្រើនតែប្រើវិធីសាស្ត្របែបប្រជាភិថុតិ ជាជាងប្រើការរិះគន់បែបវិទ្យាសាស្ត្រ ដើម្បីប្រជែងយកការគាំទ្រពីពលរដ្ឋ ហើយផលប្រយោជន៍របស់ពលរដ្ឋត្រូវបានអ្នកនយោបាយទាំងនោះយកចិត្តទុកដាក់តិចតួចបំផុត។
ជុំវិញបញ្ហានេះ ក្រសួងសុខាភិបាលកម្ពុជាបានបង្ហាញរបាយការណ៍របស់ខ្លួននៅថ្ងៃទី១៩ ខែវិច្ឆិកា ឆ្នាំ២០២១ នេះថា អ្នកស្លាប់ថ្មីដោយសារជំងឺ Covid-19 មានចំនួន ៤នាក់ប៉ុណ្ណោះ ហើយពួកគេមិនបានចាក់ថ្នាំបង្ការជំងឺ Covid-19 នោះទេ ខណៈអ្នកស្លាប់ដោយសារជំងឺនេះសរុបបានកើនឡើងដល់ជិត ៣ពាន់នាក់ហើយនៅពេលនេះ៕