ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន UNHCR បានសម្ដែងការខកចិត្តយ៉ាងខ្លាំងចំពោះអាជ្ញាធរថៃ ដែលបានចាប់ជនភៀសខ្លួននយោបាយខ្មែរត្រឡប់ទៅកម្ពុជាវិញ។
ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន UNHCR អះអាងថា ខ្លួនកំពុងស្វែងរកការបំភ្លឺជាបន្ទាន់ពីអាជ្ញាធរថៃ ទាក់ទងនឹងការចាប់ជនភៀសខ្លួននយោបាយខ្មែរ ហើយនិរទេសពួកគេត្រឡប់ទៅកម្ពុជាវិញ។ ជាងនេះទៅទៀត ភ្នាក់ងាររបស់អង្គការសហប្រជាជាតិមួយនេះក៏កំពុងតាមដានពីជោគវាសនារបស់អ្នកទាំងនោះ ក្រោយពីត្រូវបានឃុំខ្លួនដោយអាជ្ញាធរកម្ពុជានៅពេលនេះផងដែរ។
ប្រភពដដែលអះអាងថា UNHCR កំពុងជំរុញឱ្យរដ្ឋាភិបាលថៃ បញ្ឈប់ការនិរទេសជនភៀសខ្លួនបន្តទៀត ព្រោះថាពួកគេបានគោរពតាមកាតព្វកិច្ចអន្តរជាតិយ៉ាងពេញលេញរួចទៅហើយ។ ជាងនេះទៀត UNHCR ក៏បានដាស់តឿនអាជ្ញាធរកម្ពុជាឲ្យគោរពស្តង់ដារសិទ្ធិមនុស្សអន្តរជាតិ និងជាពិសេសអាចឲ្យអង្គការសិទ្ធិមនុស្សតាមដានសុវត្ថិភាពរបស់ជនភៀសខ្លួនដែលត្រូវបានចាប់បញ្ជូនទៅឃុំខ្លួននៅកម្ពុជាកាលពីពេលថ្មីៗនេះ។
ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន បញ្ជាក់ថា ខ្លួននឹងជំរុញឱ្យប្រទេសនានារួមទាំងប្រទេសថៃ ផង បញ្ឈប់ការបញ្ជូនជនភៀសខ្លួនត្រឡប់ទៅទឹកដីណាដែលជីវិត ឬសេរីភាពរបស់ពួកគេនឹងត្រូវបានគំរាមកំហែងបន្តទៀត ត្បិតការបញ្ជូនជនភៀសខ្លួនត្រឡប់ទៅកម្ពុជាវិញដោយបង្ខំដូចរដ្ឋាភិបាលថៃ បានធ្វើនៅពេលនេះ គឺជាហានិភ័យធ្ងន់ធ្ងរនៃការធ្វើទុក្ខបុកម្នេញពីសំណាក់រដ្ឋាភិបាលកម្ពុជាលើជនភៀសខ្លួននយោបាយទាំងនោះ។
ការអះអាងរបស់ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួនបែបនេះ ធ្វើឡើងបន្ទាប់ពីអាជ្ញាធរថៃ បានចាប់បញ្ជូនជនភៀសខ្លួននយោបាយខ្មែរទៅកម្ពុជាវិញ ដែលបង្ហាញឱ្យឃើញពីការធ្លាក់ចុះការគោរពសិទ្ធិជនភៀសខ្លួនយ៉ាងធ្ងន់ធ្ងរក្នុងពេលបច្ចុប្បន្ននេះ។
ក្នុងខែវិច្ឆិកា ឆ្នាំ២០២១ នេះ សកម្មជនសង្គម និងសកម្មជននយោបាយដែលបានភៀសខ្លួនទៅជ្រកកោននយោបាយនៅប្រទេសថៃ ត្រូវបានអាជ្ញាធរថៃ និងអាជ្ញាធរកម្ពុជា សហការគ្នាចាប់ខ្លួនបញ្ជូនទៅកម្ពុជាវិញជាបន្តបន្ទាប់ ដូចជាសកម្មជនព្រៃឡង់ លោក វឿន វាសនា សកម្មជនបក្សប្រឆាំង លោក វឿង សំណាង មេឃុំជាប់ឆ្នោតគណបក្សសង្គ្រោះជាតិ អ្នកស្រី ឡាញ់ ថាវរី និងបន្តទៅចាប់ខ្លួនយុវជនបក្សប្រឆាំងនៅប្រទេសថៃ លោក ម៉ិច ហៀង កាលពីថ្ងៃចន្ទ ទី២២ វិច្ឆិកា នេះថែមទៀត។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី២៣ វិច្ឆិកា នេះថា រដ្ឋាភិបាលកម្ពុជាមិនគួរប្រើច្បាប់ព្រហ្មទណ្ឌដែលខ្លួនបានបង្កើតឡើង ដើម្បីចាប់សកម្មជននយោបាយ និងសកម្មជនសង្គមដូចសព្វថ្ងៃនេះទេ ព្រោះថាអ្វីដែលរដ្ឋាភិបាលត្រូវធ្វើសម្រាប់ពលរដ្ឋខ្មែរ គឺត្រូវធានាឱ្យបាននូវការរក្សាសន្តិភាព សុវត្ថិភាព និងយុត្តិធម៌សង្គមជូនពលរដ្ឋរបស់ខ្លួនឱ្យបានពេញលេញ។
លោក មាជ សុវណ្ណារ៉ា អះអាងថា ការប្រើកណ្ដាប់ដៃដែករបស់រដ្ឋាភិបាលកម្ពុជា តាមចាប់សកម្មជននយោបាយដែលបានភៀសខ្លួននយោបាយបែបនេះ នឹងមិនមានផលចំណេញដល់កម្ពុជានោះទេ តែនឹងបង្កឱ្យមានការរិះគន់ពីមជ្ឈដ្ឋានជាតិ និងអន្តរជាតិ និងការដាក់ទណ្ឌកម្មលើកម្ពុជាកាន់តែខ្លាំងទៅវិញប៉ុណ្ណោះ។
ស្ថានភាពនយោបាយនៅកម្ពុជា ក្រោយគណបក្សសង្គ្រោះជាតិត្រូវបានរំលាយរហូតដល់សព្វថ្ងៃនេះ ត្រូវគេសង្កេតឃើញថា សកម្មជន និងមន្ត្រីគណបក្សប្រឆាំងត្រូវរងការធ្វើទុក្ខបុកម្នេញពីសំណាក់អាជ្ញាធររបស់លោក ហ៊ុន សែន ជាបន្តបន្ទាប់ រហូតឈានដល់ការវាយដំច្រំធាក់ដែលបណ្តាលឲ្យជនរងគ្រោះខ្លះធ្លាក់ខ្លួនពិការ និងបាត់បង់ជីវិតថែមទៀតផង៕