ក្រុមអង្គការសង្គមស៊ីវិលជិត ៧០ស្ថាប័នដែលធ្វើការលើវិស័យសិទ្ធិមនុស្ស និងបរិស្ថាននៅកម្ពុជា បានលើកឡើងថា បញ្ហាសិទ្ធិមនុស្សនៅកម្ពុជានៅតែបន្តស្ថិតក្រោមការគំរាមកំហែងឥតឈប់ឈរពីប្រព័ន្ធតុលាការ ដែលបានលម្អៀងទៅខាងនិន្នាការនយោបាយបក្សកាន់អំណាច។
អង្គការសមាគមការពារសិទ្ធិពលរដ្ឋនៅកម្ពុជា រួមមានសមាគមដីធ្លីខេត្តកោះកុង សហព័ន្ធសហជីព CATU និងសហភាពការងារ CLC ជាដើម បានចេញសេចក្តីថ្លែងការណ៍រួមគ្នានៅថ្ងៃទី២៤ ខែវិច្ឆិកា ឆ្នាំ២០២១ នេះ ដោយទាមទារឱ្យរដ្ឋាភិបាលឯកបក្សរបស់លោក ហ៊ុន សែន ធ្វើកំណែទម្រង់ដឹកនាំរបស់ខ្លួន ដើម្បីដោះលែងសកម្មជននានាដែលកំពុងត្រូវឃុំខ្លួនសព្វថ្ងៃនេះឱ្យមានសេរីភាពឡើងវិញដោយឥតលក្ខខណ្ឌ ចៀសវាងការដោះលែងឱ្យនៅក្រៅឃុំដែលសិទ្ធិសេរីភាពពួកគេនៅតែរងការរឹតត្បិតដដែលនោះ។
ប្រភពដដែលលើកឡើងថា ដើម្បីបើកលំហសេរីភាពលទ្ធិប្រជាធិបតេយ្យ និងសិទ្ធិមនុស្សឡើងវិញ រដ្ឋាភិបាលកម្ពុជាត្រូវធ្វើកំណែទម្រង់លុបចោលច្បាប់មួយចំនួនដែលរដ្ឋាភិបាលបានបង្កើតឡើងប្រាសចាកពីខ្លឹមសាររបស់រដ្ឋធម្មនុញ្ញ ដូចជាច្បាប់ស្ដីពីគណបក្សនយោបាយ ច្បាប់ស្ដីពីការបោះឆ្នោត និងច្បាប់ស្ដីពីការបង្កើតសមាគម និងអង្គការមិនមែនរដ្ឋាភិបាល ជាដើម ត្បិតច្បាប់ទាំងនេះគឺមានចេតនារារាំងដល់សិទ្ធិសេរីភាពមូលដ្ឋានរបស់ពលរដ្ឋយ៉ាងខ្លាំងក្លា។
អង្គការសមាគមខាងលើបញ្ជាក់ថា សព្វថ្ងៃនេះ ពលរដ្ឋកម្ពុជាកំពុងប្រឈមនឹងការរឹតត្បិតសេរីភាពក្នុងការប្រើប្រាស់សិទ្ធិចូលរួមជីវភាពនយោបាយ និងសិទ្ធិជ្រើសរើសអ្នកដឹកនាំដែលពួកគេពេញចិត្តយ៉ាងធ្ងន់ធ្ងរ ព្រោះថាច្បាប់ដែលគេមើលឃើញថាមានខ្លឹមសារផ្ទុយពីរដ្ឋធម្មនុញ្ញសព្វថ្ងៃនេះ ត្រូវបានរដ្ឋាភិបាលបក្សកាន់អំណាចប្រើយ៉ាងសកម្មក្នុងការចាប់ខ្លួនសកម្មជនសង្គម និងសកម្មជននយោបាយពេញប្រទេសកម្ពុជាតែម្តង។
របាយការណ៍សង្គមស៊ីវិលកាលពីពេលថ្មីៗនេះ បានរកឃើញថា សកម្មជននយោបាយ សកម្មជនដីធ្លី សកម្មជនបរិស្ថាន អ្នកសារព័ត៌មាន និងអ្នកប្រើប្រាស់បណ្ដាញសង្គមមួយចំនួន ត្រូវអាជ្ញាធររបស់លោក ហ៊ុន សែន ចាប់ឃុំខ្លួនទាំងអយុត្តិធម៌មានចំនួនជាង ៦០នាក់ហើយនៅពេលនេះ ខណៈសកម្មជនសង្គមដែលត្រូវបានដោះលែងខ្លះកាលពីពេលថ្មីៗកន្លងទៅនេះ ក៏មិនទាន់មានសេរីភាពពេញលេញដែរ ព្រោះការដោះលែងនោះគ្រាន់តែជាការព្យួរទោសប៉ុណ្ណោះ មិនមែនជាការរួចពីទោសដែលតុលាការបានចោទប្រកាន់នោះឡើយ។
អគ្គហិរញ្ញិកគណបក្សខ្មែរស្រឡាញ់ជាតិ លោក សៀវ វិសុទ្ធ បានប្រាប់សារព័ត៌មាន The Cambodia Daily នៅថ្ងៃទី២៤ វិច្ឆិកា នេះថា លោកសូមគាំទ្រយ៉ាងពេញទំហឹងចំពោះសេចក្តីថ្លែងការណ៍រួមរបស់អង្គការសង្គមស៊ីវិល ដើម្បីសុំឱ្យមានការដោះលែងសកម្មជនសង្គម និងសកម្មជននយោបាយដែលកំពុងជាប់ឃុំទាំងអយុត្តិធម៌នៅពេលនេះ។
លោកបន្តថា កម្ពុជានឹងក្លាយជាប្រធានអាស៊ាននៅពេលខាងមុខ ដូច្នេះដើម្បីមុខមាត់កម្ពុជាលើឆាកអន្តរជាតិ រដ្ឋាភិបាលគួរតែពិចារណាឡើងវិញចំពោះការបន្តឃុំខ្លួនសកម្មជនទាំងនោះ ព្រោះថាការបន្តរឹតត្បិតសេរីភាពរបស់ពួកគេ និងពលរដ្ឋខ្មែរ ជាពិសេសការបន្តរឹតត្បិតសេរីភាពមេដឹកនាំបក្សប្រឆាំង លោក កឹម សុខា ដូចសព្វថ្ងៃនេះ មិនមានផលចំណេញដល់កម្ពុជានោះទេ គឺមានតែទទួលរងនូវការរិះគន់ពីមជ្ឈដ្ឋានជាតិ និងអន្តរជាតិប៉ុណ្ណោះ។
លោកជំរុញឱ្យអង្គការសង្គមស៊ីវិលទាំងអស់ បន្តតាមដាន និងជំរុញឱ្យរដ្ឋាភិបាលកម្ពុជាទម្លាក់ចោលរាល់បទចោទទាំងអស់លើសកម្មជននយោបាយ សកម្មជនសិទ្ធិមនុស្ស សកម្មជនដីធ្លី និងអ្នកសារព័ត៌មាន ជាដើម ដើម្បីជួយផ្តល់យុត្តិធម៌ដល់ជនរងគ្រោះទាំងនោះឱ្យបានឆាប់ៗ ត្បិតពួកគេមិនបានប្រព្រឹត្តល្មើសដូចការចោទប្រកាន់នោះឡើយ៕