លោក កឹម សុខា អតីតប្រធានគណបក្សសង្គ្រោះជាតិ បានអំពាវនាវឲ្យលោក សម រង្ស៊ី និងក្រុមរបស់លោក ឈប់បំពានមកលើរូបលោកដោយយកឈ្មោះ និងរូបថតទៅប្រើប្រាស់ភ្ជាប់ជាមួយសកម្មភាពមហិច្ឆតានយោបាយដែលលោកមិនគាំទ្រ អាចធ្វើឲ្យសាធារណមតិជាតិ និងអន្តរជាតិមានការភ័ន្តច្រឡំ។
ការចេញសារជាលើកដំបូងរបស់លោក កឹម សុខា នៅថ្ងៃទី២៨ ខែវិច្ឆិកា នេះ ដែលនិយាយចំឈ្មោះលោក សម រង្ស៊ី គឺជាសញ្ញាដែលបង្ហាញថា ទំនាក់ទំនងនយោបាយ ឬស្មារតីគណបក្សសង្គ្រោះជាតិដែលបានបង្កើតរួមគ្នារវាងគណបក្សសិទ្ធិមនុស្សរបស់លោក កឹម សុខា និងអតីតគណបក្ស សម រង្ស៊ី របស់លោក សម រង្ស៊ី នោះ បានឈានដល់ផ្លូវបំបែកហើយ។
លោក កឹម សុខា បានបញ្ជាក់ក្នុងបណ្ដាញសង្គមរបស់លោកថា រហូតមកដល់ពេលនេះ លោក សម រង្ស៊ី និងសហការី នៅតែបន្តយកឈ្មោះ និងរូបថតរបស់លោកទៅប្រើប្រាស់ភ្ជាប់ជាមួយនឹងសកម្មភាពនានាដែលពុំមានការអនុញ្ញាត ឬគាំទ្រពីលោកឡើយ។
លោក កឹម សុខា បញ្ជាក់ថា ទង្វើរបស់ពួកគេសបញ្ជាក់ឲ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះមិនមានការគាំទ្រ ឬជាជំហររបស់លោកឡើយ។ លោកថា លោកមិនពាក់ព័ន្ធ និងមិនទទួលខុសត្រូវចំពោះសកម្មភាពរបស់លោក សម រង្ស៊ី និងក្រុមទាំងនោះឡើយ។
ក្រៅពីលោក កឹម សុខា បានចេញសារជាផ្លូវការនៅថ្ងៃទី២៨ វិច្ឆិកា នេះ ក្រុមអ្នកគាំទ្រអតីតគណបក្សសង្គ្រោះជាតិប្រចាំសហរដ្ឋអាមេរិក (CNRP-USA) កាលពីថ្ងៃទី២៦ ខែវិច្ឆិកា បានអំពាវនាវដល់លោក សម រង្ស៊ី និងក្រុមអ្នកគាំទ្ររបស់លោក ឱ្យបញ្ឈប់សកម្មភាពមួយចំនួនដែលជាការបំពានដល់លោក កឹម សុខា ផងដែរ។
សេចក្តីថ្លែងការណ៍ចេញផ្សាយកាលពីថ្ងៃទី២៦ ខែវិច្ឆិកា ឆ្នាំ២០២១ បានឲ្យដឹងថា នាពេលកន្លងមក និងពេលថ្មីៗនេះ លោក សម រង្ស៊ី និងក្រុមអ្នកគាំទ្រគាត់ នៅតែបន្តប្រព្រឹត្តច្រំដែល ដោយបានប្រើប្រាស់ឈ្មោះ និងរូបភាពរបស់លោក កឹម សុខា និងពាក្យស្លោកថា «សម រង្ស៊ី និង កឹម សុខា ជាមនុស្សតែមួយ» សម្រាប់បំភ័ន្ត និងបិទបាំងទង្វើទុច្ចរិត ដើម្បីកេងចំណេញប្រយោជន៍បុគ្គល និងបក្ខពួករបស់ខ្លួនជាបន្តបន្ទាប់។
សេចក្តីថ្លែងការណ៍បានចោទប្រកាន់ថា លោក សម រង្ស៊ី និងក្រុមគាំទ្ររបស់លោក បានចាកចេញទៅបង្កើតចលនាខុសច្បាប់លើកបន្តុបតួនាទីខ្លួនឯង បានប្រមាថព្រះមហាក្សត្រ និងពេលថ្មីៗនេះ បានប្រកាសគាំទ្រគណបក្សនយោបាយផ្សេងដែលបញ្ជាក់ឲ្យឃើញកាន់តែច្បាស់នូវទង្វើប្រាសចាក និងដើរផ្ទុយពីស្មារតីដើមនៃការរួបរួមជាមួយលោក កឹម សុខា តទៅទៀតហើយ។
គណបក្សសង្គ្រោះជាតិ ត្រូវបានបង្កើតឡើងដោយការច្របាច់បញ្ចូលគ្នារវាងគណបក្សសិទ្ធិមនុស្សរបស់លោក កឹម សុខា និងគណបក្ស សម រង្ស៊ី របស់លោក សម រង្ស៊ី ដែលបានប្តូរទៅជាគណបក្សភ្លើងទៀន ក្នុងពេលបច្ចុប្បន្ននេះ កាលពីថ្ងៃទី១៧ ខែកក្កដា ឆ្នាំ២០១២ នៅក្នុងទីក្រុងម៉ានីល ប្រទេសហ្វីលីពីន។
គណបក្សនេះត្រូវតុលាការកំពូល ប្រកាសរំលាយទាំងអយុត្តិធម៌ពីបទក្បត់ជាតិតាមប្រសាសន៍លោក ហ៊ុន សែន និងបានហាមឃាត់សិទ្ធិធ្វើនយោបាយមន្ត្រីជាន់ខ្ពស់បក្សនេះចំនួន ១១៨រូបផងដែរនៅថ្ងៃទី១៦ ខែវិច្ឆិកា ឆ្នាំ២០១៧។
ក្រោយការរំលាយគណបក្សនេះ អ្នកនយោបាយជាន់ខ្ពស់ខ្លះបានរត់ភៀសខ្លួនទៅក្រៅប្រទេស ដើម្បីតស៊ូនយោបាយ ចំណែកឯលោក កឹម សុខា ត្រូវរឹតត្បិតសេរីភាពនយោបាយ និងការដើរហើរ ចំណែកឯសកម្មជននយោបាយគណបក្សនេះ ត្រូវអាជ្ញាធររដ្ឋាភិបាលលោក ហ៊ុន សែន ធ្វើទុក្ខបុកម្នេញ ប្រើហិង្សា សម្លាប់ និងចាប់ដាក់គុក ហើយខ្លះទៀតបានភៀសខ្លួនចេញទៅក្រៅប្រទេស ដោយពួកគេសង្ឃឹមការតស៊ូរបស់ថ្នាក់ដឹកនាំថា គណបក្សសង្គ្រោះជាតិអាចមានឱកាសចូលប្រឡូកក្នុងឆាកនយោបាយវិញ ក្រោមការដឹកនាំរបស់លោក កឹម សុខា និងលោក សម រង្ស៊ី ក្នុងស្មារតីគណបក្សសង្គ្រោះជាតិ។
ទោះយ៉ាងណា អតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានលើកឡើងឲ្យដឹងដែរថា ការចាប់ផ្តើមដើរចេញរបស់គណបក្សភ្លើងទៀនពីដៃគូគណបក្សសិទ្ធិមនុស្ស ក្នុងដួងព្រលឹងសង្គ្រោះជាតិ ដែលមជ្ឈដ្ឋានជាតិ និងអន្តរជាតិសន្និដ្ឋានថា ក្រុមម្ខាងលែងគោរពកិច្ចសន្យា លក្ខន្តិកៈ និងអាចបំភ្លេចនូវឆន្ទៈពលរដ្ឋម្ចាស់ឆ្នោត ដោយសារមើលទៅគ្មានក្តីសង្ឃឹមថាគណបក្សសង្គ្រោះជាតិរស់ឡើងវិញ៕