 ដែលប៉ុនប៉ងរំលាយរចនាសម្ព័ន្ធថ្នាក់ដឹកនាំសហជីព និងកាត់បន្ថយបុគ្គលិកជាប្រព័ន្ធជាង ១៣០០នាក់ដោយអយុត្តិធម៌ក្នុងអំឡុងពេលដែលកម្ពុជាបានរងវិបត្តិ Covid-19។){kind=link}
ក្រុមអង្គការសមាគម និងសម្ព័ន្ធសហជីពជាង ២០អង្គភាព បានបង្ហាញការសោកស្ដាយចំពោះក្រុមហ៊ុន ណាហ្គាវើលដ៍ (Naga world) ដែលប៉ុនប៉ងរំលាយរចនាសម្ព័ន្ធថ្នាក់ដឹកនាំសហជីព និងកាត់បន្ថយបុគ្គលិកជាប្រព័ន្ធជាង ១៣០០នាក់ដោយអយុត្តិធម៌ក្នុងអំឡុងពេលដែលកម្ពុជាបានរងវិបត្តិ Covid-19។
អង្គការសមាគមទាំងនោះ បានចាត់ទុកថាការប៉ុនប៉ងបែបនេះ គឺជាការរំលោភច្បាប់ជាតិ និងអន្តរជាតិទាំងស្រុង។
សេចក្ដីថ្លែងការណ៍រួមដែលបានចេញផ្សាយនៅថ្ងៃទី១ ខែធ្នូ របស់អង្គការសមាគម និងសហជីពជាង ២០ នោះ បានឱ្យដឹងថា កាលពីថ្ងៃទី៨ ខែមេសា ឆ្នាំ២០២១ តំណាងក្រុមហ៊ុន ណាហ្គាវើលដ៍ ប្រកាសគម្រោងកាត់បន្ថយបុគ្គលិកជាថ្នាក់ដឹកនាំសហជីព និងកម្មករនិយោជិតចំនួនសរុប ១៣២៩នាក់ក្នុងចំណោមបុគ្គលិកសរុបជាង ៨ពាន់នាក់ ក្រោមហេតុផលកម្ពុជាកំពុងជួបវិបត្តិ Covid-19។
ការលើកហេតុផលកាត់បន្ថយបុគ្គលិកនេះ ត្រូវសហជីព និងបុគ្គលិកជំទាស់ និងមិនសមហេតុផល ពីព្រោះក្រុមហ៊ុនមិនបានប្រឈមនឹងការខាតបង់លើមុខជំនួញរបស់ខ្លួនឡើយ។ ពួកគេថា ជាក់ស្ដែងកាលពីឆ្នាំ២០២០ ក្រុមហ៊ុនរកប្រាក់ចំណេញសុទ្ធ ១០២លានដុល្លារ ហើយបើគិតត្រឹមរយៈពេល ២ខែដើមឆ្នាំ២០២១ ក្រុមហ៊ុនក៏ទទួលបានប្រាក់ចំណេញសុទ្ធជាង ១២៧លានដុល្លារអាមេរិកផងដែរ។ ពួកគេបានបញ្ជាក់ទៀតថា បុគ្គលិកត្រូវកាត់បន្ថយម៉ោងការងាររហូតទៅ ៦០ភាគរយ ដើម្បីកាត់បន្ថយការចំណាយរបស់ក្រុមហ៊ុន និងទទួលបានប្រាក់ឈ្នួលទៅតាមចំនួនថ្ងៃជាក់ស្ដែងដែលបានចូលធ្វើការ។
សេចក្ដីថ្លែងការណ៍ដដែលបញ្ជាក់ថា កម្មករចំនួន ៩៥៦នាក់ក្នុងចំណោម ១៣២៩នាក់ដែលទទួលបានការជូនដំណឹងពីក្រុមហ៊ុន ណាហ្គាវើលដ៍ បញ្ឈប់ពីការងារនោះ ពួកគេត្រូវបង្ខំចិត្តឈប់ពីការងារដោយមិនហ៊ានបន្តការតវ៉ាជាមួយក្រុមហ៊ុនឡើយ បើទោះបីជាពួកគេដឹងថា ក្រុមហ៊ុនផ្ដល់ប្រាក់បញ្ចប់កិច្ចសន្យាការងារមិនត្រឹមត្រូវតាមច្បាប់ការងារ និងរងនូវភាពអយុត្តិធម៌ក៏ដោយ។
សេចក្ដីថ្លែងការណ៍នេះបញ្ជាក់ទៀតថា កម្មករ ៣៧៣នាក់ក្នុងចំណោម ១៣២៩នាក់ដែលទទួលបានការជូនដំណឹងពីក្រុមហ៊ុនបញ្ឈប់ពីការងារដែរនោះ បានជំទាស់មិនទទួលយកប្រាក់ជាថ្នូរបញ្ចប់កិច្ចសន្យាការងារ ដោយទាមទារឱ្យក្រុមហ៊ុនអនុវត្តតាមច្បាប់ស្ដីពីការងារ និងទទួលយកពួកគាត់ឱ្យចូលធ្វើការនៅកន្លែងដើមវិញ។
ប្រភពដដែលបានឲ្យដឹងទៀតថា បន្ទាប់ពីការចរចាគ្មានដំណោះស្រាយជាច្រើនលើករវាងកម្មករនិយោជិត និងក្រុមហ៊ុន ភាគីកម្មករបានប្ដឹងទៅក្រសួងការងារ និងបណ្ដុះបណ្ដាលវិជ្ជាជីវៈ កាលពីខែមិថុនា ហើយបានបន្តនីតិវិធីទៅក្រុមប្រឹក្សាអាជ្ញាកណ្ដាលនៅដើមខែកក្កដា ឆ្នាំ២០២១។
ទោះយ៉ាងណា ក្រុមប្រឹក្សាអាជ្ញាកណ្ដាលបានចេញសេចក្ដីបង្គាប់ដោយឯកភាពតាមក្រុមហ៊ុនដែលបញ្ឈប់កម្មករ ប៉ុន្តែមិនបានបញ្ជាក់ពីមូលហេតុច្បាស់លាស់ និងយោងតាមច្បាប់ស្ដីពីការងារដែលចែងពីតួនាទីក្រុមប្រឹក្សាអាជ្ញាកណ្ដាល ត្រូវកាត់សេចក្ដីរាល់វិវាទដែលបានបញ្ជូនដោយរដ្ឋមន្ត្រីក្រសួងការងារនោះទេ។ មិនត្រឹមតែប៉ុណ្ណោះ បែរជារុញការងារនេះត្រឡប់ទៅក្រសួងការងារ ជាអ្នកដោះស្រាយវិញ។
សេចក្ដីថ្លែងការណ៍ដដែលបានអំពាវនាវទៅរដ្ឋាភិបាលពិនិត្យ និងជួយអន្តរាគមន៍ផ្ដល់ដំណោះស្រាយសមស្របដល់កម្មករ បុគ្គលិក និងសុំឱ្យថ្នាក់ដឹកនាំក្រុមហ៊ុន ណាហ្គាវើលដ៍ ចរចាជាមួយតំណាងសហជីព ដើម្បីស្វែងរកដំណោះស្រាយណាមួយដែលអាចទទួលយកបានទាំងសងខាង ប្រកបដោយភាពស្មោះត្រង់ និងបង្កើតទំនាក់ទំនងវិជ្ជាជីវៈល្អជាមួយសហជីពនៅកន្លែងការងារ។ លើសពីនេះ ក្រុមហ៊ុនត្រូវទទួលយកកម្មករ ៣៧៣នាក់ចូលបម្រើការងារវិញ និងបញ្ឈប់ការរើសអើង ឬធ្វើទុក្ខបុកម្នេញផ្សេងៗទៅលើសហជីពជាដើម៕