ព្រះតេជព្រះគុណ បូរ បេត ដែលសកម្មក្នុងការងារការពារបរិស្ថាន និងសង្គម ត្រូវបានអាជ្ញាធរថៃ ចាប់ខ្លួនផ្សឹក និងត្រៀមបញ្ជូនខ្លួនឲ្យអាជ្ញាធរក្រុងភ្នំពេញ វេលាម៉ោង ៨យប់ ថ្ងៃទី១ ខែធ្នូ ឆ្នាំ២០២១។
ក្រុមអង្គការសង្គមស៊ីវិលដែលធ្វើការផ្នែកសិទ្ធិមនុស្សនៅកម្ពុជា កំពុងតាមដានស្ថានការណ៍នេះយ៉ាងយកចិត្តទុកដាក់ចំពោះករណីចាប់ផ្សឹកព្រះសង្ឃដែលសកម្មក្នុងកិច្ចការសង្គម និងបរិស្ថានអង្គនេះ។
តាមព័ត៌មានឲ្យដឹងថា ព្រះសង្ឃ បូរ បេត គង់នៅវត្តព្រែកសា ក្រុមទី៣ បុរីពុទ្ធរក្សា ឃុំព្រែកសា ស្រុកមឿងសមុទ្រប្រាកាន ខេត្តសមុទ្រប្រាកាន ប្រទេសថៃ។
ព្រះសង្ឃ បូរ បេត បានភៀសព្រះកាយចាកចេញពីប្រទេសកម្ពុជា អំឡុងពាក់កណ្ដាលខែវិច្ឆិកា ឆ្នាំ២០២០ ទៅគង់នៅប្រទេសថៃ ក្រោយពេលដែលអាជ្ញាធររបស់លោក ហ៊ុន សែន តាមចាប់ខ្លួនក្រោយពេលព្រះអង្គចូលរួមទាមទារឲ្យដោះលែងលោក រ៉ុង ឈុន។
សារព័ត៌មាន The Cambodia Daily នឹងបន្តផ្សាយដំណឹងទាក់ទងនឹងករណីនេះជូនប្រិយមិត្តបន្ថែមទៀតនៅពេលដែលទទួលបានបច្ចុប្បន្នភាពព័ត៌មាន៕