សហភាពសូវៀត គឺជាមហាអំណាចមួយដែលចាញ់សហរដ្ឋអាមេរិកក្នុងល្បែងសង្គ្រាមត្រជាក់។ ឆ្នាំ១៩៨៩ គឺជាការបិទបញ្ចប់ល្បែងសង្គ្រាមត្រជាក់។ សហភាពសូវៀត គឺជាមេខ្លោងកុម្មុយនីស្តធំជាងគេនៅលើពិភពលោក។
ក្រោយពីរបបកុម្មុយនីស្ត វិមានក្រឹមឡាំង ដួលរលំ គឺសាធារណរដ្ឋសង្គមនិយមសហភាពសូវៀត បានដូររូបភាពរបបដឹកនាំទៅជារបបប្រជាធិបតេយ្យសេរីពហុបក្ស គឺសហព័ន្ធរុស្ស៊ី។ ទោះជាបែបនេះក្ដី រុស្ស៊ីនៅតែជាមហាអំណាចមួយនៅពេលនេះ។
ចាប់តាំងពីឆ្នាំ១៩៩០ មកដល់ពេលនេះ គឺមានការបោះឆ្នោតប្រធានាធិបតី និងសមាជិកសភាបានចំនួន ៧លើកមកហើយ។ ក្នុងការបោះឆ្នោតប្រធានាធិបតីចំនួន ៧លើកនេះ គឺមានតែម្តងគត់នៅឆ្នាំ១៩៩៦ ដែលជាការបោះឆ្នោតឈានដល់ជុំទីពីរ។ ការបោះឆ្នោតនៅពេលនោះ មានការប្រកួតគ្នាយ៉ាងល្អ និងស្វិតស្វាញ ដែលប្រកបដោយភាពសេរី និងត្រឹមត្រូវ។
មកដល់ពេលនេះរយៈពេល ៣១ឆ្នាំ ប្រទេសមហាអំណាចមួយនេះមានប្រធានាធិបតីតែ ៣រូបប៉ុណ្ណោះ គឺលោក Boris Yeltsin លោក Dmitry Medvedev និងលោក Vladimir Putin។ តែមានតែលោក Putin ដែលបានកាន់អំណាចយូរជាងគេតាំងពីជាប់ឆ្នោតម្ដងទៀតនៅឆ្នាំ២០១២ គឺរហូតមកដល់ពេលនេះ។
បុរសខ្លាំងរូបនេះអាចនឹងឈ្នះឆ្នោតទៀតនៅក្នុងការបោះឆ្នោតឆ្នាំ២០២៤ ដែលគិតថាពុំមានលទ្ធិប្រជាធិបតេយ្យ និងសេរីត្រឹមត្រូវ ខណៈបុរសខ្លាំងរូបនេះគាបសង្កត់ចាប់ដាក់គុកអ្នកនយោបាយប្រឆាំងជាច្រើនសិបនាក់។ ការបោះឆ្នោតសភាកាលពីថ្ងៃទី១៧ ខែកញ្ញា គណបក្សរុស្ស៊ីរួបរួម ជាបក្សកាន់អំណាចរបស់លោក Putin បានបន្តឈ្នះឆ្នោតទៀតក្រោមការបោះឆ្នោតបំបាត់សំឡេងប្រឆាំងធំជាងគេ គឺកម្លាំងអ្នកប្រជាធិបតេយ្យរបស់មេបក្សប្រឆាំង Alexei Navalny។
លោក Alexei Navalny នៅពេលនេះកំពុងជាប់ក្នុងរនាំងដែក។ ការបោះឆ្នោតនេះ ក្រុមប្រទេសលោកខាងលិច និងសហរដ្ឋអាមេរិក មិនឱ្យតម្លៃជាគុណប្រយោជន៍ដល់ប្រព័ន្ធប្រជាធិបតេយ្យឡើយ ព្រោះជាការបោះឆ្នោតគ្រាន់តែជាល្បែងប្រជាធិបតេយ្យឆ្ពិនភ្នែករបស់បុរសខ្លាំងមួយនេះតែប៉ុណ្ណោះ គឺប្រធានាធិបតី Vladimir Putin។
ដោយអំណាចណែនក្នុងដៃ គឺទាំងសភា ទាំងតុលាការក៏នៅក្រោមបង្គាប់របស់បុរសខ្លាំងរូបនេះ ហើយខណៈនេះប្រទេសរុស្ស៊ី បានសម្រេចលេងល្បែងសង្គ្រាមជាមួយយោធាណាតូ លើករណីប្រទេសអ៊ុយក្រែន ដែលធ្លាប់ស្ថិតនៅក្រោមចំណុះរបស់សហភាពសូវៀត។ ក្រោមអំណាចរបស់អតីតប្រធានចារកម្មសម្ងាត់ KGB អ៊ុយក្រែនកាន់តែរងាភ័យខ្លាចនឹងការលើកទ័ពរបស់រុស្ស៊ីចូលឈ្លានពានដែនដីអ៊ុយក្រែន។
យ៉ាងណា អង្គការយោធាណាតូ គឺជាសម្ពន្ធភាពមានសមាជិក ៣០ប្រទេសដែលសហរដ្ឋអាមេរិក អង់គ្លេស បារាំង អាល្លឺម៉ង់ កាណាដា ហុឡង់ដ៍ អ៊ីតាលី គឺជាប្រទេសមានអំណាចខ្លាំងខាងយោធា និង ២៣ប្រទេសទៀតដែលមើលទៅក៏ចង់លេងល្បែងសង្គ្រាមនឹងរុស្ស៊ី ផងដែរ។ ដោយឡែកប្រទេសអ៊ុយក្រែន ដែលនឹងក្លាយជាសមាជិកណាតូ ទី៣១ កំពុងក្លាយជាជនរងគ្រោះដែលរុស្ស៊ីចាប់លេងជាមួយណាតូ។
ខណៈនេះ រុស្ស៊ី បានដាក់ពង្រាយកងទ័ពឡោមព័ន្ធអ៊ុយក្រែន គឺមានជាង ១០ម៉ឺននាក់ និងសព្វាវុធមានទាំងកាំជ្រួច S-400 រថក្រោះ រថពាសដែក កាំភ្លើងធំ កាំជ្រួចហ្វូង បានទៅដល់ព្រំដែនជាប់ប្រទេសអ៊ុយក្រែនអស់ហើយ។ មូលហេតុដែលនាំឱ្យរុស្ស៊ី ដាក់ពង្រាយកងទ័ព គឺក្រោមហេតុផលសន្តិសុខព្រំដែន គឺដើម្បីចង់ដឹងអំពីវត្តមានរបស់យោធាណាតូ ដែលល្បីថានឹងមាននៅលើទឹកដីអ៊ុយក្រែនឆាប់ៗនេះ។
ប៉ុន្តែគ្រាន់តែជាលេសប៉ុណ្ណោះ ព្រោះមហាអំណាចមួយនេះគាបសង្កត់អ៊ុយក្រែន គឺចង់រឹបអូសយកតំបន់ដូនបាស់ ពីអ៊ុយក្រែន ដែលក្រុងមូស្គូ ធ្លាប់បានជោគជ័យក្នុងការដណ្ដើមយកតំបន់គ្រីមៀរ ពីអ៊ុយក្រែន កាលពីឆ្នាំ២០១៤ តាមរយៈការបោះឆ្នោតប្រជាមតិនៅពេលដែលឧបទ្វីបនេះក្លាយជាតំបន់ស្វយ័តរបស់អ៊ុយក្រែន ដែលមានពលរដ្ឋរុស្ស៊ី រស់នៅជិត ៨០ភាគរយហើយនោះ។
ដោយចង់ច្រៀកយកទឹកដីអ៊ុយក្រែន គឺរុស្ស៊ីសន្សំចិត្តឈ្លានពានប្រទេសជិតខាងមួយនេះជាមួយនឹងការនៅពីក្រោយកម្លាំងប្រដាប់អាវុធប្រឆាំងនឹងរដ្ឋាភិបាលអ៊ុយក្រែន។ យ៉ាងណា អ៊ុយក្រែនដែលដឹងច្បាស់ពីល្បិចរុស្ស៊ី ក៏បានសម្រេចបញ្ជូនទ័ព និងសព្វាវុធទៅកាន់តំបន់ដូនបាស់ កាន់តែច្រើនឡើង ដែលទីក្រុងគៀវ សច្ចាមិនឱ្យរបូតដូនបាស់ ទៅរុស្ស៊ី ដាច់ខាត ទោះជាធ្លាក់ក្នុងសង្គ្រាមក៏ដោយ។ តាមសារព័ត៌មានរបស់រុស្ស៊ី RT កងទ័ពអ៊ុយក្រែន នៅតាមព្រំដែនជាប់នឹងរុស្ស៊ី ជាពិសេសនៅតំបន់ដូនបាស់ មាន ១២ម៉ឺន ៥ពាន់នាក់ ហើយសព្វាវុធគឺមានដូចនឹងកងទ័ពរុស្ស៊ី ផងដែរ។
តែបែបនេះក្ដី ប្រធានាធិបតីអ៊ុយក្រែន Volodymyr Zelensky បើទោះជាស្វែងរកការចរចាជាមួយសមភាគីរុស្ស៊ី លោក Vladimir Putin ដើម្បីកាត់បន្ថយភាពតានតឹង តែលោកបានសុំស្នើឱ្យអង្គការយោធាណាតូ ជួយអន្តរាគមន៍ បើកងទ័ពរុស្ស៊ី បើកការវាយលុកកាន់កាប់តំបន់ដូនបាស់។ ឥឡូវនេះឃើញថា ស្ថានការណ៍កងទ័ពកាន់តែផុយស្រួយជាខ្លាំង ព្រោះតែអ៊ុយក្រែន មិនខ្លាចរុស្ស៊ីឡើយ គឺដោយសារតែណាតូនៅពីក្រោយ។
កាលពីថ្ងៃអង្គារ ទី៣០ វិច្ឆិកា អគ្គលេខាធិការអង្គការណាតូ លោក យែន ស្តុលទែនប៊ែរ និងរដ្ឋមន្ត្រីការបរទេសអាមេរិក លោក Antony Blinken បានចេញមុខព្រមានរុស្ស៊ីថា បើរុស្ស៊ីហ៊ានលើកទ័ពឈ្លានពានអ៊ុយក្រែន គឺរុស្ស៊ីនឹងត្រូវទទួលផលវិបាកធ្ងន់ធ្ងរ។ ការព្រមានរបស់មេដឹកនាំណាតូ និងអាមេរិក បានធ្វើឡើងមុនណាតូ បើកកិច្ចប្រជុំថ្នាក់រដ្ឋមន្ត្រីការបរទេសក្នុងទីក្រុងរីហ្គា ប្រទេសឡេតូនី។
តាមលោក ស្តុលទែនប៊ែរ គេអាចប្រើវិធានការប្រឆាំងរុស្ស៊ី ដូចដែលគេធ្លាប់បានធ្វើកន្លងមក ក្នុងនោះមានវិធានការសេដ្ឋកិច្ច ហិរញ្ញវត្ថុ និងនយោបាយការទូត។
ជាមួយគ្នានេះ ប្រមុខការទូតអាមេរិក ព្រមានទុកជាមុនថា រាល់ការឈ្លានពានថ្មីទៀតរបស់រុស្ស៊ីលើអ៊ុយក្រែន គឺជាបង្កឲ្យមានផលវិបាកធ្ងន់ធ្ងរ។ តាមលោក Blinken គឺអាមេរិកនឹងពិគ្រោះយោបល់ជាមួយក្រុមសម្ពន្ធមិត្ត និងក្រុមប្រទេសដៃគូរបស់ណាតូ អំពីវិធានការផ្សេងទៀតនាពេលខាងមុខ ដើម្បីពង្រឹងការការពារសម្ពន្ធមិត្តមួយនេះ។
ប្រឈមនឹងការព្រមានរបស់មេដឹកនាំ និងរដ្ឋមន្ត្រីការបរទេសអាមេរិក ឃើញថារុស្ស៊ី មិនបាននៅស្ងៀមឡើយ។ ក្រុងមូស្គូ ចាត់ទុកការព្រមាននេះជាការគំរាមកំហែងមកលើសន្តិសុខរបស់ខ្លួន និងព្រមានបកវិញថា រុស្ស៊ីមានខ្សែបន្ទាត់ក្រហមដែលណាតូ មិនត្រូវដើរឆ្លងកាត់ឡើយ។ ក្រុងមូស្គូ ព្រមានថា ខ្លួនគេអាចលេងល្បែងគ្រប់ស្ថានការណ៍ទាំងអស់ជាមួយណាតូ បើអ៊ុយក្រែនអាងណាតូព្រហើនដាក់រុស្ស៊ី៕