ជប៉ុន ធ្លាប់លុកលុយប្រទេសចិនក្នុងរវាងឆ្នាំ១៩៣៧ ដល់ឆ្នាំ១៩៤៥។ ក្នុងអំឡុងពេលនោះ ដែនដីដែលស្ថិតក្រោមនឹមអាណានិគមរបស់ជប៉ុន គឺជាដែនដីទាសកររបស់ជប៉ុន។ ក្នុងស្ថានភាពបែបនេះ សម្រាប់ចិននៅតែចងចាំការឈឺចាប់របស់ខ្លួន។ តែយ៉ាងណាក៏ដោយ ក្រោយពីសង្គ្រាមលោកលើកទី២ ដែលជប៉ុនចាញ់សង្គ្រាមសហរដ្ឋអាមេរិក និងសម្ពន្ធមិត្ត ជប៉ុនបានបញ្ចប់អនុត្តរភាពរបស់ខ្លួនទាំងស្រុងទៅលើប្រទេសចិន។
ក្រោយពីសង្គ្រាមលោកលើកទីពីរភ្លាម ជប៉ុនស្ថិតនៅក្នុងស្ថានភាពស្ងប់ស្ងាត់។ ជប៉ុនពេលនោះត្រូវបានរួមរឹតដោយភាពសម្អប់នៃប្រទេសដែលជប៉ុនធ្លាប់ដាក់អាណានិគម ជាពិសេសគឺប្រទេសចិន។
ចិនសឹងតែលើកទ័ពសងសឹកលើប្រទេសជប៉ុន ប៉ុន្តែទៅពុំរួចដោយសារតែសហរដ្ឋអាមេរិកការពារជប៉ុន។ ដូចនេះហើយបានជាក្រោយពីសង្គ្រាមលោកលើកទី២ ជប៉ុនអនុញ្ញាតឱ្យកងទ័ពសហរដ្ឋអាមេរិកមាននៅលើទឹកដីរបស់ខ្លួន។ មកទល់សព្វថ្ងៃនេះ កងទ័ពអាមេរិកនៅតែមានលើទឹកដីជប៉ុននៅឡើយប្រមាណ ៥ម៉ឺននាក់។
ឥឡូវនេះទៀត ជប៉ុនក្លាយជាសម្ពន្ធមិត្តយោធាជាមួយនឹងសហរដ្ឋអាមេរិកដ៏រឹងមាំ ហើយក៏ជាសម្ពន្ធមិត្តយោធាជាមួយប្រទេសឥណ្ឌា និងអូស្ត្រាលីទៀតផង។ ក្នុងអំឡុងពេលដែលប្រទេសចិនកំពុងតែរីកមាឌយ៉ាងខ្លាំងទាំងសេដ្ឋកិច្ច និងយោធា គឺជប៉ុន ក៏កំពុងព្រួយបារម្ភអំពីអនុត្តរភាពរបស់ចិន។ ដោយហេតុនេះ ជប៉ុនបានបង្កើនកម្លាំងកងទ័ព និងសព្វាវុធរបស់ខ្លួនយ៉ាងខ្លាំង ដោយសម្រេចធ្វើវិសោធនកម្មរដ្ឋធម្មនុញ្ញ ហើយបើកផ្លូវឱ្យកងទ័ពជប៉ុនទប់ទល់នឹងការវាយប្រហារពីសំណាក់កងទ័ពប្រទេសដែលឈ្លានពានដែនអធិបតេយ្យរបស់ជប៉ុន។
អតីតនាយករដ្ឋមន្ត្រីម្នាក់ដែលចាប់ផ្ដើមពង្រឹងកងទ័ពជប៉ុនខ្លាំងក្លាមកដល់សព្វថ្ងៃនេះ គឺលោក ស៊ីនហ្សូ អាបេ។ អំឡុងនៃការកាន់អំណាចរបស់លោកជាង ១០ឆ្នាំមកនេះ ប្រទេសជប៉ុនបានចំណាយលើវិស័យការពារជាតិដល់ទៅ ៥១ពាន់លានដុល្លារអាមេរិក ហើយក៏បានក្លាយជាប្រទេសលំដាប់ទី៥ ក្នុងចំណោមប្រទេសដែលមានសក្ដានុពលផ្នែកយោធាធំៗចំនួន ៣០ប្រទេសនៅទូទាំងពិភពលោក។
បើតាមគេហទំព័រ Global Fire កញ្ចប់ថវិការបស់ជប៉ុន ហក់ឡើងរហូតដល់ទៅជិត ៥២ពាន់លានដុល្លារ។ ទំហំថវិកានេះបាននាំឱ្យជប៉ុនមានសព្វាវុធធំៗ និងទំនើបៗយ៉ាងច្រើន។ សព្វាវុធរបស់ជប៉ុនផលិតខ្លួនឯងក៏មាន និងទិញពីសហរដ្ឋអាមេរិកក៏មានដែរ។ ជប៉ុនមានទាំងនាវាមុជទឹក នាវាផ្ទុកយន្តហោះ នាវាចម្បាំង យន្តហោះចម្បាំង រថក្រោះ រថពាសដែក និងកាំភ្លើងធំរាប់រយគ្រឿង។
យ៉ាងណា ជប៉ុននៅពុំទាន់ស្មើទំហំនៃវិស័យការពារជាតិរបស់ចិននោះទេ ដែលថវិកាយោធាចិន នៅពេលនេះមានចំនួន ២៥២ពាន់លានដុល្លារ មានអាវុធគ្រប់ប្រភេទទាំងអស់ ហើយមានចំនួនច្រើនជាងជប៉ុនដល់ទៅជាង ២ដង។ បើចំនួនកងទ័ពវិញ ជប៉ុនមាន ២៥ម៉ឺននាក់ ទ័ពបម្រុង ៥ម៉ឺននាក់ និងទ័ពបម្រុងទី២ គឺ ២៧លាននាក់។
ចំណែកឯចិនមានទ័ពជាង ២លាននាក់ ទ័ពបម្រុងមាន ៨លាននាក់ ទ័ពបម្រុងទី២ មានចំនួន ៣៨៥លាននាក់ គឺមានទំហំធំធេងណាស់បើធៀបទៅនឹងជប៉ុន។ ចិនឈរនៅលំដាប់ទី៣ នៃប្រទេសដែលមានអំណាចខ្លាំងផ្នែកវិស័យការពារជាតិ។ ប៉ុន្តែសំណួរសួរថា តើជប៉ុនដែលមានកងទ័ព និងសព្វាវុធប៉ុណ្ណឹងគ្រប់គ្រាន់ហើយឬនៅក្នុងការការពារដែនអធិបតេយ្យរបស់ខ្លួន ដើម្បីធ្វើសង្គ្រាមជាមួយនឹងចិន។
ការពិត ចំនួនកងទ័ពជប៉ុនត្រឹមនេះទំនងមិនអាចទៅរួចទេជាមួយនឹងចិន។ ចុះហេតុអ្វីបានជាមេដឹកនាំជប៉ុនអួតអាងថា ខ្លួនគេនឹងជួយការពារដែនកោះតៃវ៉ាន់ បើកងទ័ពចិនលើកទ័ពចូលទៅកាន់កាប់កោះតៃវ៉ាន់?
អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ បានថ្លែងនៅលើវេទិកាមួយអំពីដែនកោះតៃវ៉ាន់កាលពីពេលថ្មីៗនេះ ដោយទទូចឱ្យរដ្ឋាភិបាលជប៉ុនបច្ចុប្បន្ននេះត្រៀមខ្លួនដើម្បីប្រឆាំងនឹងប្រទេសចិន ដែលមានផែនការលើកទ័ពកាន់កាប់កោះតៃវ៉ាន់។ អតីតនាយករដ្ឋមន្ត្រីជប៉ុនរូបនេះបានព្រមានថា បើកោះតៃវ៉ាន់ធ្លាក់ក្នុងកណ្ដាប់ដៃប្រទេសចិន គឺកោះទាំងឡាយរបស់ជប៉ុន នៅជាប់នឹងកោះតៃវ៉ាន់ វានឹងអាចក្លាយជាដែនកោះរបស់ចិនទៅថ្ងៃមុខ។ លោក អាបេ បានទទូចថា ជប៉ុនត្រូវតែត្រៀមលក្ខណៈដើម្បីសង្គ្រាម គឺសង្គ្រាមប្រឆាំងនឹងអនុត្តរភាពរបស់ចិន។
ជាមួយនឹងការប្រកាន់ជំហរបែបនេះ លោក អាបេ ក៏ទទូចដល់សហរដ្ឋអាមេរិកត្រូវឈរជាមួយនឹងជប៉ុន គឺឱ្យបានរឹងមាំប្រឆាំងនឹងចិន។ ក្នុងន័យនេះហើយដែលជប៉ុនសម្រេចចិត្តថា បើកោះរបស់ជប៉ុននៅជាប់នឹងកោះតៃវ៉ាន់ត្រូវកងទ័ពចិនចូលកាន់កាប់ក្នុងអំឡុងដែលកងទ័ពចិនលុកលុយកោះតៃវ៉ាន់នោះ គឺជប៉ុនចាំបាច់ត្រូវតែលើកទ័ពវាយកម្ទេចកងទ័ពរបស់ចិន ដែលនៅលើដែនកោះរបស់ជប៉ុន។
លោក អាបេ បានទទូចទៅសហរដ្ឋអាមេរិកថា ត្រូវរួមគ្នាដើម្បីជួយកោះតៃវ៉ាន់។
យោងតាមលក្ខណៈនៃការពង្រឹងកងទ័ព គឺជប៉ុនទំនងពង្រឹងកងទ័ពរឹងមាំរួចទៅហើយក្នុងការធ្វើសង្គ្រាម ប៉ុន្តែអ្វីដែលជប៉ុនអាចធ្វើទៅបាន គឺជប៉ុនពឹងលើសហរដ្ឋអាមេរិកជាធំ និងពឹងលើសម្ពន្ធភាពនៃក្រុមចតុភាគីដែលមានឥណ្ឌា និងអូស្ត្រាលីផងដែរ។
សម្រាប់អូស្ត្រាលី បានប្រកាសថា ខ្លួនគេទោះជាមិនលើកកងទ័ពអន្តរាគមន៍ជួយកោះតៃវ៉ាន់ដោយផ្ទាល់ទេ តែអូស្ត្រាលីត្រូវតែជួយសហរដ្ឋអាមេរិកក្នុងការឆ្លើយតបនឹងសង្គ្រាម។
រដ្ឋមន្ត្រីការពារជាតិអូស្ត្រាលី លោក Peter Dutton បានព្រមានចិនថា អូស្ត្រាលីប្រាកដណាស់នឹងជួយសហរដ្ឋអាមេរិកដែលទប់ទល់នឹងសង្គ្រាមពីសំណាក់កងទ័ពចិន។ ប្រមុខការពារជាតិអូស្ត្រាលីរូបនេះព្រមានទៀតថា ចិនមិនត្រូវលើកទ័ពចូលឈ្លានពានកោះតៃវ៉ាន់ដាច់ខាត ព្រោះពេលនេះ តៃវ៉ាន់ជារដ្ឋដែលមានប្រជាធិបតេយ្យភាពច្បាស់លាស់។ អ្វីដែលអូស្ត្រាលីត្រូវជួយសហរដ្ឋអាមេរិក និងជប៉ុនការពារកោះតៃវ៉ាន់ គឺអូស្ត្រាលីក្នុងនាមជាសមាជិករបស់អង្គការយោធាចតុភាគី។
ឥឡូវនេះគេមើលឃើញថា មិនត្រឹមតែអូស្ត្រាលីទេបានសន្យាជួយសហរដ្ឋអាមេរិក បើកោះតៃវ៉ាន់ធ្លាក់ក្នុងសង្គ្រាមជាមួយចិន ឥណ្ឌាក៏ត្រូវបានរាយការណ៍មកថានឹងជួយសហរដ្ឋអាមេរិកផងដែរ។
យ៉ាងណា អង់គ្លេសដែលជាមហាអំណាចនៅខាងក្រៅតំបន់ឯណោះវិញ ក៏បានសម្រេចចូលពាក់ព័ន្ធនឹងជម្លោះប្រទេសចិន និងតៃវ៉ាន់ផងដែរ។ អង់គ្លេសមានកតិកាសញ្ញាយោធាជាមួយអាមេរិក និងអូស្ត្រាលី។ អង់គ្លេសដែលបានផ្ដល់សញ្ញាដូចនេះហើយ គឺយ៉ាងហោចណាស់ធ្វើឱ្យជប៉ុនគិតថា ជប៉ុនមានសម្ពន្ធមិត្តយោធារឹងមាំមួយទៀត គឺប្រទេសអង់គ្លេស។ យោងតាមទឡ្ហីករណ៍ទាំងអស់នេះ នាំឱ្យមេដឹកនាំជប៉ុនដែលកំពុងកាន់អំណាច និងលោក អាបេ អះអាងថាខ្លួនគេបានត្រៀមអស់ហើយដើម្បីសង្គ្រាមពីសំណាក់កងទ័ពចិន។
សម្ពន្ធភាពដែលជប៉ុនមានក្នុងដៃនេះ គឺសម្ពន្ធភាពចតុភាគី និងត្រីភាគី។ សម្ពន្ធភាពនេះហើយទំនងជប៉ុនអះអាងប្រាប់ថា ខ្លួនគេមានលក្ខណៈគ្រប់គ្រាន់ គឺត្រៀមរួចហើយដើម្បីសង្គ្រាមដែលចាំបាច់។
ជប៉ុនត្រូវធ្វើសង្គ្រាមដើម្បីការពារដែនអធិបតេយ្យរបស់ខ្លួនផង និងដើម្បីប្រឆាំងអនុត្តរភាពរបស់ចិននៅក្នុងតំបន់ផងដែរ។ ជប៉ុនមានអំនួតដូចនេះ បើមើលទៅដូចជាការប្រថុយពិតមែនជាមួយចិន។
តើសម្រាប់ចិនវិញ ត្រៀមខ្លួនហើយឬនៅ? ការពិត ចិនត្រៀមខ្លួនរួចរាល់អស់ហើយដើម្បីសង្គ្រាម គឺសង្គ្រាមលុកលុយកោះតៃវ៉ាន់ និងសង្គ្រាមវាយកាន់កាប់ទីតាំងកន្លែងណាដែលចិនត្រូវយកឱ្យបានត្រឡប់មកវិញ ដូចជាបញ្ហាជម្លោះនៅសមុទ្រចិនខាងកើតលើប្រជុំកោះស៊ិនកាគូ ដែលភាសាចិនហៅថា ទាវយូ គឺប្រជុំកោះទាំងនេះបានបាត់នៅក្រោមការកាន់កាប់របស់ជប៉ុន នៅក្នុងសង្គ្រាមលោកលើកទី២។ ចិន បានប្រាប់ទៅជប៉ុនថា កោះទាំងនេះគួរតែត្រឡប់មកឱ្យចិនគ្រប់គ្រងវិញ ប៉ុន្តែជប៉ុនប្រឆាំងដាច់ខាត។
ចិនតែងតែបញ្ជូននាវាល្បាត និងយន្តហោះចម្បាំង ហោះទៅដែនកោះទាំងនោះដែលជាការបង្ហាញអំពីគោលបំណងរបស់ចិន ចង់បានកោះនេះត្រឡប់មកវិញ។ តែជប៉ុនមិនដែលចុះថយឡើយ។ ទីក្រុងតូក្យូ បានបញ្ជូនយន្តហោះចម្បាំង និងនាវាចម្បាំងរបស់ខ្លួនហោះទៅដេញយន្តហោះចម្បាំង និងនាវាចម្បាំងរបស់ចិន ឱ្យចេញពីតំបន់នោះ។ ភាពតានតឹងដោយសារជម្លោះកោះស៊ិនកាគូ នេះ បាននាំឱ្យចិន ចិញ្ចឹមចិត្ត និងពង្រីកសក្ដានុពលផ្នែកកងទ័ពរបស់ខ្លួនចង់កាន់កាប់មកវិញនូវដែនកោះដែលខ្លួនបាត់ទៅលើប្រទេសជប៉ុន ក្នុងសង្គ្រាមលោកលើកទី២៕