លោក ហ៊ុន សែន អះអាងថា អាស៊ានមិនមែនជាចំណាប់ខ្មាំងនៃបញ្ហានៅប្រទេសភូមានោះទេ ត្បិតកិច្ចការរបស់អាស៊ាន មិនមែនត្រូវដោះស្រាយតែបញ្ហាប្រទេសភូមានោះដែរ។ ក្រៅពីនេះទៀត អាស៊ានឆ្នាំ២០២២ នេះ ក៏មានកិច្ចការក្នុងតំបន់ជាច្រើនដែលត្រូវដោះស្រាយជាបន្តបន្ទាប់។
មេដឹកនាំខ្មែរបានអះអាងក្នុងវេទិកាទេសចរណ៍អាស៊ានលើកទី៤០ នៅខេត្តព្រះសីហនុ កាលពីថ្ងៃទី១៨ ខែមករា ឆ្នាំ២០២២ នេះថា បញ្ហានៅប្រទេសភូមា មិនមែនដោះស្រាយបញ្ចប់ត្រឹមរយៈពេលខ្លី ឬត្រឹមដំណាក់កាលកម្ពុជាធ្វើជាប្រធានអាស៊ានក្នុងឆ្នាំ២០២២ នេះទេ។
លោក ហ៊ុន សែន អះអាងថា វាមានភាពចាំបាច់ណាស់នៃការបង្កើតអាស៊ាន ត្រយការ (troika) ដែលមានការចូលរួមពីប្រធានអាស៊ានឆ្នាំ២០២១ ប្រធានអាស៊ានឆ្នាំ២០២២ ប្រធានអាស៊ានឆ្នាំ២០២៣ និងអគ្គលេខាធិការអាស៊ាន ដែលត្រូវតែចូលរួមសហការគ្នាជាមួយប្រទេសកម្ពុជានៅពេលនេះ ព្រោះថាបញ្ហារបស់ប្រទេសភូមា ប្រាកដជានឹងធ្លាក់ទៅដល់ដៃប្រទេសឥណ្ឌូនេស៊ី ដែលជាប្រធានអាស៊ានឆ្នាំ២០២៣ ជាមិនខាន។
ការអះអាងរបស់មេដឹកនាំប្រទេសកម្ពុជាបែបនេះ ធ្វើឡើងបន្ទាប់ពីមានការរិះគន់ជុំទិសពីមជ្ឈដ្ឋានជាតិ និងអន្តរជាតិពីដំណើរទស្សនកិច្ចរបស់ខ្លួនកាលពីដើមខែមករា ថាជាទស្សនកិច្ចខុសពីគោលការណ៍របស់អាស៊ាន និងមានមហាអំណាចចិន នៅពីក្រោយ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីលទ្ធិប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី២០ មករា នេះថា សព្វថ្ងៃនេះមានតែមហាអំណាចកុម្មុយនីស្តពីរប៉ុណ្ណោះដែលមានបំណងចង់ចាប់អាស៊ានធ្វើជាចំណាប់ខ្មាំងនៃបញ្ហារបស់ប្រទេសភូមា គឺមហាអំណាចកុម្មុយនីស្តរុស្ស៊ី និងមហាអំណាចកុម្មុយនីស្តចិន ដែលជាមិត្តដែកថែបរបស់កម្ពុជាសព្វថ្ងៃនេះ។
លោក គឹម សុខ អះអាងថា សម្រាប់ប្រទេសដែលប្រកាន់របបប្រជាធិបតេយ្យគ្រាន់តែចង់ឃើញមេដឹកនាំខ្មែរប្រើឈ្មោះកម្ពុជា អនុវត្តមុខនាទីក្នុងនាមជាប្រធានអាស៊ានឱ្យបានត្រឹមត្រូវ គោរពគោលការណ៍រួមរបស់អាស៊ានក្នុងការដោះស្រាយវិបត្តិនៅភូមា បញ្ហាក្នុងតំបន់ និងសកលលោកដែលពាក់ព័ន្ធនឹងដៃគូរបស់អាស៊ានប៉ុណ្ណោះ។
អ្នកវិភាគរូបនេះបញ្ជាក់ថា លោកឯកភាពចំពោះបញ្ហាធំៗរបស់អាស៊ាន មិនមែនមានតែបញ្ហានៅប្រទេសភូមាប៉ុណ្ណោះទេ ប៉ុន្តែក៏មានបញ្ហារំលោភសិទ្ធិមនុស្សនៅកម្ពុជា នៅប្រទេសថៃ និងនៅកម្ពុជាក្រោម ដែលវៀតណាមកំពុងគ្រប់គ្រងសព្វថ្ងៃនេះផងដែរ។ លោកបន្តថា រឿងទាំងនោះគឺសុទ្ធតែជាបញ្ហាធំៗដែលត្រូវដោះស្រាយជាបន្ទាន់បន្ថែមលើបញ្ហាក្រមចរិយាបញ្ញត្តិសមុទ្រចិនខាងត្បូង ដែលតម្រូវឱ្យកម្ពុជាដោះស្រាយថែមទៀត។
លោក គឹម សុខ សង្កត់ធ្ងន់ថា ការក្រើនរំឭករបស់ប្រទេសប្រជាធិបតេយ្យចំពោះលោក ហ៊ុន សែន កន្លងមក គឺគ្រាន់តែដើម្បីតម្រង់ផ្លូវកុំឱ្យមេដឹកនាំកម្ពុជាដើរឆ្ងាយពីគោលជំហរអាស៊ានទាំង ៥ចំណុចសម្រាប់ភូមាប៉ុណ្ណោះ ហើយក៏ដើម្បីកុំឱ្យគាត់ប្រព្រឹត្តផ្ទុយពីគោលការណ៍របស់អង្គការសហប្រជាជាតិរហូតទទួលស្គាល់មេរដ្ឋប្រហារភូមា ទៅជារដ្ឋាភិបាលស្របច្បាប់នោះដែរ។ លោក គឹម សុខ ថាបើលោក ហ៊ុន សែន អនុវត្តកិច្ចការខុសពីគោលជំហរអាស៊ាន នឹងនាំឱ្យអាស៊ានជួបវិបត្តិកាន់តែខ្លាំងជាងនេះជាមិនខាន។
ក្រោយពីដំណើរទស្សនកិច្ចកាលពីដើមខែមករា ឆ្នាំ២០២២ ក្នុងការដោះស្រាយវិបត្តិនៅប្រទេសភូមា ដែលទទួលបរាជ័យយ៉ាងអាម៉ាស់ មេដឹកនាំកម្ពុជា លោក ហ៊ុន សែន ត្រូវគេមើលឃើញថា មិនសូវបញ្ចេញអាកប្បកិរិយាអួតអាងពីយុទ្ធសាស្ត្ររបស់ខ្លួនចំពោះបញ្ហានៅប្រទេសភូមាទៀតទេ៕